හෝමාගම ශ්රී ලංකා බෞද්ධ හා පාලි විශ්වවිද්‍යාලයේ ඊයේ පැවැති ආගමික සහජීවනය හා සාමය පිළිබඳ අන්තර්ජාතික සම්මන්ත්‍රණය ආරම්භයේදී පන්සිල් නොගැනීමත් බෞද්ධ කොඩිය එසවීම වැළැක්‌වීම පිළිබඳවත් බොහෝ දෙනාගේ දැඩි විවේචනයට ලක්‌වී ඇත.
මෙම උත්සවය සංවිධානය කර ඇත්තේ ශ්රී ලංකාවේ ඇමරිකානු තානාපති කාර්යාලයේ අරමුදල් මතය.
බෞද්ධ විරෝධී මෙවැනි කටයුතු භික්‍ෂු විශ්වවිද්‍යාලයක සිදුවීම ගැන එහි ආචාර්ය මණ්‌ඩලයේ ද දැඩි විවේචනයට බඳුන්වී ඇත.
මෙම උත්සවය වෙනුවෙන් සකස්‌ කර තිබූ පුන්කළස්‌ පවා ඉවත් කිරීමට නියෝග ලැබී තිබිණි.
භික්‍ෂුන් වහන්සේලාට ආගමික සහජීවනය ඉගැන්වීම පිණිස පැවැත්වුණු මෙම සම්මන්ත්‍රණයේ දේශන සඳහා මුස්ලිම් පූජකයකු ද මහායාන භික්‍ෂුවක ද කැඳවා තිබුණු බව විශ්විද්‍යාල ආරංචිමාර්ග කියයි.
චතුර පමුණුව
http://www.divaina.com/2015/04/23/news33.html
වසර විසි දෙකක්‌ වැනි කාලයක්‌ තුළ මිනිසුන්ගේ මතකයෙහි රැඳී ගරු බුහුමන් ලැබීමට වාසනාවක්‌ වූයේ නම් ඔහු මිනිස්‌ වර්ගයාට ශ්‍රේෂ්ඨ සේවයක්‌ කළ අද්විතීය පුද්ගලයෙකු විය යුතුය. ලලිත් ඇතුලත්මුදලි එවැනි නායකයෙකි.
එකල පිටිසරව පැවැති කළුතර පස්‌දුන් කෝරළේ ජනිතව බැරිස්‌ටර්වරයෙකු වශයෙන් ගෞරවනීය නීති වෘත්තියට පානැඟ පස්‌දුන් කෝරළේ රාජ්‍ය මන්ත්‍රණ සභාවේ මන්ත්‍රීවරයකු වූ ඩී. ඩී. ඇතුලත්මුදලි මැතිතුමාගේ අභිලාෂය වූයේ සිය දෙටු පුතු නීතිඥ වෘත්තියට ඇතුළත් කිරීමය. රාජකීය විද්‍යාලයට ඇතුළත් වූ ළමා ලලිත් පොත පත අධ්‍යාපනයට මෙන්ම ක්‍රීඩාවට දක්‍ෂයෙක්‌ විය. ඔක්‌ස්‌ෆර්ඩ් විශ්වවිද්‍යාලයේදී ඔහු ශිෂ්‍ය සංගමයේ භාණ්‌ඩාගාරික, පුස්‌තකාලයාධිපති, ලේකම් හා සභාපති යන සියලුම තනතුරුවලට පත්කර ගන්නා ලදී. එය කළු සුදු බේදය පැවැති සමයක කළු තරුණයකු ලැබූ ජයග්‍රහණයකි. මෙය මොහු පසුව දේශපාලන දිවියේ මැනවින් ප්‍රදර්ශනය කළ කථිකත්වයට විවාද කිරීමේ හැකියාවට හා නායකත්ව දැරීමේ නැඹුරුවට පෙළගැස්‌මකි. ලක'ඹර මතු දිනක බබළවන තරුවක්‌ දුටු එස්‌. ඩබ්ලිව්. ආර්. ඩී. බණ්‌ඩාරනායක අගමැතිතුමා මෙම තරුණයාට ශිෂ්‍යත්වයක්‌ පිරිනැමීය. එයින් ලැබුණු පිටිවහල පසු දිවියේදී මහපොළ ශිෂ්‍යත්ව අරමුදල පිහිටුවා දහස්‌ ගණනක්‌ විශ්වවිද්‍යාල ශිෂ්‍යයන්ට සහන සැලසීමට පසුතලය විය.
ඔක්‌ස්‌ෆර්ඩ් විශ්වවිද්‍යාලයෙන් නීති විද්‍යාව පිළිබඳ ශාස්‌ත්‍රවේදී උපාධිය ලබා සිංගප්පූරුවේ ඉන්දියාවේ අලහබාද් හා ඊශ්‍රායලයේ හීබෲ විශ්වවිද්‍යාලවල කලක්‌ නීතිය පිළිබඳ දේශකයකු වශයෙන් සේවය කළේය. පසුව ඇමෙරිකාවේ හාවර්ඩ් විශ්වවිද්‍යාලයට බැඳී නීතිය පිළිබඳ ශාස්‌ත්‍රපති විභාගය ඉතා උත්කර්ෂ ලෙස සමත් විය.
1964 දී ඔහු ලංකාවේ අධිනීතිඥවරයකු වශයෙන් වෘත්තීයමය දිවිය ඇරඹීය. කරුණු අවබෝධ කර ගැනීමේ හැකියාව නීතිය පිළිබඳ හසළ දැනුම තීක්‍ෂණ බුද්ධිය හා වෙහෙස නොබලා වැඩ කිරීමේ හැකියාව ඔහු ඉතා ඉක්‌මනින් නීතිඥ වෘත්තියේ ඉහළ ඉණිපෙත්තට නැංවීය. 1985 දී ඔහු ජනාධිපති නීතිඥයකු වශයෙන් පත් කරන ලදී.
ඔක්‌ස්‌ෆර්ඩ් විශ්වවිද්‍යාලයේ ශිෂ්‍ය සංගමයේ තරග බිමේ පුහුණුව දේශපාලනයට නැඹුරු කිරීමට පිටිවහලක්‌ විය. ධනපති පංතියෙන් පැමිණි කර්මාන්ත හිමියන් වෙනුවෙන් කම්කරු නඩුවලදී පෙනී සිටි ඔහුට මුහුණදීමට තිබූ අභියෝග බොහෝමයකි. තවද ඔහුට පිටදේශක්‌කාරයා ය යන චෝදනාව ද නැඟුවේය. එම අභියෝග සියල්ල ජයගනිමින් ඔහු 1977 දී රත්මලාන ආසනය අති විශිෂ්ට ලෙස ජයග්‍රහණය කළේය.
1970 - 1977 රජයේ පරාජයට වෙළෙඳ අමාත්‍යාංශයේ දායකත්වය බොහෝ ය. බඩු හිඟකම, පෝළිම් යුගය, දූෂණ වැනි නොයෙකුත් චෝදනා එම අමාත්‍යාංශයට තිබිණි. ලලිත් වෙළෙඳ අමාත්‍යාංශය භාරගෙන ඔහුගේ සංකල්පයක්‌ වන විවෘත ආර්ථික ප්‍රතිපත්ති ක්‍රියාත්මක කරමින් රෙගුලාසි තුළ හිර වී සිටි නිලධාරීන්ගෙන් ව්‍යාපාර මුදවාගෙන ව්‍යාපාරික හැකියාවන් ඇති වෘත්තිකයන් යොදවා සංස්‌ථාවලට පුනර්ජීවයක්‌ දීමෙන් එම ආයතන දක්‍ෂ වැඩදායී ආයතන බවට පත් කළේය. එමගින් පුද්ගලික අංශය මෙන්ම රාජ්‍ය අංශය ද දියුණු විය. තෘප්තිමත් පාරිභෝගික ජනතාවක්‌ බිහිවිය. වෙළෙඳ අමාත්‍යාංශය ඉතා ජනප්‍රිය අමාත්‍යාංශයක්‌ බවට ජනතාව අතර ප්‍රචලිත විය.
ආර්ථික වර්ධනයට රක්‍ෂණය අත්‍යවශ්‍ය ආයතනයකි. එහෙත් වසර විස්‌සක්‌ පමණ ඒකාධිකාරි බලයක්‌ අත්කර ගෙන සිටි රක්‍ෂණ සංස්‌ථාව ඉතා දුබල තත්ත්වයකට වැටී තිබිණි. එයට ජීවයක්‌ දීමට නම් ප්‍රබල තරගකරුවෙක්‌ සිටිය යුතු යෑයි ඇමැතිවරයා සිතුවේය. ඒ සඳහා රාජ්‍ය අරමුදල් හා පාලනය ද පෞද්ගලික අංශයේ ව්‍යවසායක සහාය ද ලබා ගනිමින් ජාතික රක්‍ෂණ සංස්‌ථාව නිර්මාණය කළේය. ටික කලකදී සංස්‌ථා දෙකම ජවය ලබා ඉතා දක්‍ෂ පාරිභෝගිකයන්ට හිතකර ශක්‌තිමත් ආයතන දෙකක්‌ බවට පත්විය. රක්‍ෂණය ජනප්‍රිය වීමෙන් ව්‍යාපාර දියුණු වී එම අංශයේ රැකියා ද බහුල විය. රක්‍ෂණ වෘත්තිකයන් වශයෙන් ඉගෙනීම ලැබීමට ශිෂ්‍යයන් පෙළඹුණේය.
1983 ජාතිවාදී කෝලහාල වලින් මුළු රට ගිනිගත් විට එම අසහනයට සහන සැලසීමට හැකි ප්‍රබල රක්‍ෂණ ආයතන මෙරට පිහිටුවා තිබිණි.
ලංකාවට විශේෂයෙන් කුඩා දරුවන් සඳහා අවශ්‍ය කිරි පිටි බෙදාහරින ලද්දේ සමුපකාර තොග වෙළෙඳ සංස්‌ථාව මගින් පාලනය කළ ලක්‌ස්‌ප්‍රේ කර්මාන්ත ශාලාව මගින් ය. 1979 දී එම කර්මාන්ත ශාලාව ගිනිගෙන අළු බවට පත් විය. කිරිපිටි හිඟයක්‌ ඇතිවිය හැකි යයි මවුවරු බියට පත්වී සිටියෝ ය. එහෙත් රාජ්‍ය අංශයේ ද පුද්ගලික අංශයේද සමුපකාර ආයතනවලද සහාය ලබා ගනිමින් වෙළෙඳ ඇමැතිවරයා ලක්‌ස්‌ප්‍රේ ඇසුරුම්හල් ගණනාවක්‌ පිහිටුවා කිරිපිටි හිඟයක්‌ නොවීමට වෙළෙඳපොළ සරු කළේය.
වෙළෙඳ අමාත්‍යාංශය දක්‍ෂ ලෙස මෙහෙයවීමට උපහාරයක්‌ වශයෙන් ජනාධිපතිතුමා විසින් වෙළෙඳ ඇමැතිතුමාට වරායත් භාර දුන්නේය. මාක්‌ස්‌වාදීන්ගේ නොනවතින වැඩ වර්ජන හා වරාය සංයුක්‌ත මණ්‌ඩලයේ දුර්වල පාලනය නිසා කොළඹ වරාය ලෝකයේ දුර්වල අකාර්යක්‍ෂම වරායක්‌ බවට ප්‍රචලිතව පැවතිණි. ලලිත් වරාය භාරගත් පසු සේවකයන් සඳහා දිරි දීමනා ක්‍රමයක්‌ හඳුන්වා දුන්නේය. සේවකයන් ඉතා උනන්දුවෙන් වැඩ කළෝය. වැඩ වර්ජන ඉතිහාසයට එක්‌ විය. කාර්යක්‍ෂමතාවයෙන් ලෝකයේ 139 වැනි ස්‌ථානයේ තිබූ කොළඹ වරාය 26 වැනි වරාය බවට පත්විය.
ලලිත්ගේ නාමය සදාකල්හි රඳාපවතින්නේ ඔහු නිර්මාණය කළ මහපොළ උසස්‌ අධ්‍යාපන ශිෂ්‍යත්ව ආධාර ක්‍රමය මතය. විශ්වවිද්‍යාලවලට පැමිණෙන බොහෝ ශිෂ්‍යයන්ට තම වියදම් දැරීමට නුපුළුවන් බැවින් දෙමවුපියන් ඉඩම් පවා උකස්‌ කිරීමෙන් හෝ විකිණීමෙන් ඔවුන් නඩත්තු කළේය. එවැනි දේපොළක්‌වත් නොමැති දරුවන් ඉගෙනීම අත්හළේය. එහි ප්‍රතිඵලය වූයේ දැයේ දරුවන්ගේ දස්‌කම් ඔප්නැංවීමට අවස්‌ථාවක්‌ නොමැති වී අපතේ යැමයි. මෙම අවාසනාවන්ත ඉරණම දරුවන්ට පමණක්‌ නොව දැයට ද අත්නොවීම සඳහා විශ්වවිද්‍යාල ශිෂ්‍යයන්ට ආධාර කිරීම සඳහා මහපොළ උසස්‌ අධ්‍යාපන ශිෂ්‍යත්ව අරමුදල පිහිටුවන ලදී.
1984 දී කොටි ත්‍රස්‌තවාදය ඉතා දරුණු විය. ත්‍රස්‌තවාදී නොවන අය ආරක්ෂා කළ යුතුය. දකුණ සාමකාමී විය යුතුය. ජාත්‍යන්තරය දැනුවත් කර අහිතකර ප්‍රචාරවලට පිළිතුරු සැපයිය යුතු ය. එය කළ හැකිව තිබුණේ එකම ජනනායකයකුට පමණි. ඒ ලලිත් ය.
ඔහුට ජාතික ආරක්ෂක ඇමැති ධුරය පිරිනැමුවේය. සොල්දාදුවන් වෘත්තීයමය වශයෙන් පුහුණු කොට ආයුධ සපයා කාර්යක්‍ෂම ලෙස යුද්ධය පවත්වාගෙන ගියේය. වඩමාරච්චියේදී ලංකා යුද බලඇණි ලැබූ ජයග්‍රහණය ඉතිහාසයේ රන් අකුරින් ලියෑවී ඇත. ඔහු විසින් 1987 මැයි 05 වන දින බී.බී.සී. ආයතනයේදී කොටි ත්‍රස්‌තවාදී නායකයන් සමඟ ඉතා දක්‍ෂ ලෙස තර්ක කරමින් පෑ දස්‌කම් මුළු ලෝකයම මවිත කළේය. කරුණු පැහැදිලි ලෙස පෙළගස්‌වා තර්කානුකූලව ඉදිරිපත් කරමින් ප්‍රතිවාදීන්ගේ ස්‌ථාවරයන් දක්‍ෂ ලෙස බිඳහෙළීය.
1989 න් පසු ඇති වූ රජය ඒකාධිපති මාවතේ ගමන් කරන බව අවබෝධ කරගත් ලලිත් සිය තනතුරු අත්හැර ප්‍රජාතන්ත්‍රවාදය ආරක්ෂා කිරීම සඳහා සටනට බැස්‌සේය. ප්‍රජාතන්ත්‍රවාදී එක්‌සත් ජාතික පෙරමුණ බිහිකොට ඉතා ශක්‌තිමත් පක්‍ෂයක්‌ බවට ඉතා ටික කලකින් එය ස්‌ථාවර කළේය. ලලිත් ඇතුලත්මුදලි යටතේ එම පක්ෂයේ ජයග්‍රහණය දුටු පාලකයන් එක්‌ අඳුරු සැඳෑවක කුලියට වැඩ කරන පාතාලයේ අපරාධකරුවෙක්‌ මගින් ඔහුගේ දිවිය අවසන් කළේය. එම වෙඩි පහරින් දැයට ජනනායකයෙක්‌ නැති විය. ඔහුගේ නාමය සදා ජනතා මතකයේ රැව්දෙනු ඇත.
1978 ආණ්‌ඩුක්‍රම ව්‍යවස්‌ථාව සංශෝධනය කර ජනාධිපතිගේ අසීමිත බලතල සීමා කරමින් ප්‍රජාතන්ත්‍රවාදය ස්‌ථාපනය කිරීම වෙනුවෙන් දිවි පරදුවට තබා ඔහු පෙරමුණ ගත්තේය. ඔහුගේ අභිලාෂය ඉටු කිරීමට සුදුසු වාතාවරණය සැකසෙමින් පවතී. එය ඉටුවේවායි පතමු.
ටී. එම්. එස්‌. නානායක්‌කාර
http://www.divaina.com/2015/04/23/news21.html
ලිබියාවේදී පැහැරගනු ලැබූ ඉතියෝපියානු ක‍්‍රිස්තියානි ලබ්ධිකයින් 30 දෙනෙකු පමණ හිසගසා මරාදමනු දැක්වෙන වීඩියෝවක් ISIS සංවිධානය විසින් අන්තර්ජාලයට එක්කර ඇතැයි වාර්තා වේ.
ටක්ෆිරි සටන්කාමීන් විසින් පළ කර ඇති විනාඩි 29ක වීඞීයෝව තුළ ඉතියෝපියානුවන් 12ක් පමණ මුහුදු වෙරළ ප‍්‍රදේශයක හිස ගසා දමනු දැක්වෙන අතර තවත් 16 දෙනෙකු පමණ කාන්තාර ප‍්‍රදේශයකදී වෙඩි තබා ඝාතනය කරනු දැක්වේ.
සතුරු ඉතියෝපියානු පල්ලියේ කුරුස ලබිධිකයින් ලෙස වීඩියෝවේ යටින් සඳහන් කර තිබේ.
පිස්තෝලයක් රැගත් ත‍්‍රස්තවාදියකු ක‍්‍රිස්තියානි ලබ්ධිකයින්ට තර්ජනය කරන දසුනක්ද මෙම වීඩියෝවේ අන්තර්ගතව ඇත.
මෙහිදී ඝාතනය වූ පුද්ගලයින් ප‍්‍රමාණය හා ඔවුන්ගේ අනන්‍යතාවය ප‍්‍රසිද්ධියට පත්කර නොමැත. මින් පෙර ඉරාක, සිරියා, ඇමරිකානු, බි‍්‍රතාන්‍ය හා ජපාන ජාතිකයින් ඝාතනය කිරීම් දැක්වෙන වීඩියෝවන්ද මේ අයුරින්ම ISIS ත‍්‍රස්තවාදීන් විසින් අන්තර්ජාලයට එක්කරන ලදී.
අප්‍රෙල් 15වනදා ඉරාක පාර්ලිමේන්තු මන්ත‍්‍රී අඩෙල් කමීස් අල් මහ්ලාවි මාධ්‍ය හමුවකදී පවසා ඇත්තේ මේ වන විට ත‍්‍රස්තයින් විසින් පුද්ගලයින් 300ක් පමණ හිසගසා දමා ඝාතනය කර ඇති බවයි.
මේ අතරින් බොහෝ දෙනෙකු බටහිරදිග අන්බාර් ප‍්‍රාන්තයේ ස්වදේශික ගෝත‍්‍රිකයින් බව පැවසේ.
https://lankacnews.com/sinhala/foreign-news/130976/
අනවසරයෙන් නිවසින් බැහැරව ගමනක් ගිය පකිස්ථාන කාන්තාවක් ඇයගේ සැමියා සහ ඔහුගේ පියා විසින් පණපිටින් පුළුස්සා ඝාතනය කළ පුවතක් වාර්තා වී තිබේ.
25 හැවිරිදි ෂබානා බීබි නම් කාන්තාවක් මෙලෙස ඝාතනයට ලක්ව ඇති අතර සිදුවීම සම්බන්ධයෙන් ඇයගේ සැමියා වන මුහම්මද් සිද්දික් සහ ඔහුගේ පියා අත්අඩංගුවට ගත් බව පකිස්ථාන පොලිසිය පවසා ඇත.
පසුගිය සිකුරාදා දිනයේදී සැමියාගෙන් නොවිමසා සිය සොයුරියගේ නිවසට ගිය ෂබානා ආපසු නිවසට පැමිණි පසු කෝපයට පත් සිද්දික් සහ මාමණ්ඩිය ඇයට පහරදුන් බව ෂබානාගේ සොයුරු මුහම්මද් අසාම් පවසා ඇතැයි වාර්තා වේ.
ඉන්පසු ඇයගේ ශබ්රයට පෙට‍්‍රල් වත්කර ඇති ඔවුන් ගිනි තබා ඇති අතර සිරුරෙන් 80%ක් පමණ පිළිස්සී තිබූ ෂබානා බීබි රෝහලේදී මියගොස් තිබේ.
ෂබානා තෙවසරක් පුරා සිද්දික් සමග විවාහ දිවියක් ගෙවා ඇති අතර අසාම් පවසා ඇත්තේ දරුවකු නොලැබීම සම්බන්ධයෙන්ද දෙදෙනා අතර ගැටුම් ඇතිවූ බවයි.
පවුලේ ගරුත්වය කෙළෙසූ බවට චෝදනා කරමින් කාන්තාවන්ට එරෙහිව ගෘහස්ථ ප‍්‍රචණඩත්වය පාකිස්ථානය තුළ සුලභව ඇති අතර සෑම වසරකදීම සියගණනක් කාන්තාවන් මෙවැනි අපරාධවලට ලක්ව මියයන බව පැවසේ.
පවුලේ කැමැත්තට පිටින් විවාහයක් සිදුකරගත් කාන්තාවක් ඝාතනය කළ පුද්ගලයන් සිව්දෙනෙකුට පසුගිය නොවැම්බරයේදී මරණ දණ්ඩනය නියම කරනු ලැබිණි.
2008න් පසු කාන්තාවන් 3000ක් පමණ සිය පවුලේ සාමාජිකයින් අින් ඝාතනය වී ඇති බව කාන්තා අයිතිවාසිකම් පිළිබඳ ව්‍යාපාරයක් වන ඕරාත් පදනම පවසා තිබේ.
https://lankacnews.com/sinhala/foreign-news/131031/
නාසිවාදයට සමාන රුඩිකල් ඉස්ලාමය සටන් කර මුලිනුපුටා දැමිය යුතු බව පවසමින් ඩෙන්මාර්ක් කොන්සර්වේටිව් පක්‍ෂය විසින් විරෝධතා ව්‍යාපාරයක් ආරම්භ කර ඇතැයි වාර්තා වේ.
කොන්සර්වේටිව් පක්‍ෂ නායකයින් වන සොරෙන් පේප් පුල්සන් සහ හිටපු මන්ත‍්‍රී නසෙර් කාඩෙර් විසින් නාසි ඉස්ලාමය පරාජය කළ යුතු බවට පුවත්පතකටද ප්රකාශ කර ඇතැයි පැවසේ.
ඔවුන් පවසන්නේ නාසීන් යුදෙව් ජාතිකයින්ට වෛර කළ තර්කණයම ඉස්ලාම්වාදීන් විසින් භාවිතා කරන බවයි.
අර්ධ මනුෂ්‍යයන් ලෙස ඔවුන් විසින් නම් කරන්නන් ඝාතනය කරන ඉස්ලාමිකයන් මැදපෙරදිග පොත් පත් හා මිල කළ නොහැකි සංස්කෘතික උරුමයන් විනාශ කරන බවද ඩෙන්මාර්ක් කොන්සර්වේටිව්වාදීන්ගේ අදහසයි.
ලොව පුරා බිලියන 1.5ක් වන ඉස්ලාම් ලබ්ධිකයින් සාමාන්‍යයෙන් සාමකාමී වුවත් පිළිකාවක් වැනි භයානක දේශපාලන දෘෂ්ටිවාදයක් එය වසාගනිමින් පැතිර යන බව ඔවුන් පවසා තිබේ.
නිවේදනයක් නිකුත් කරමින් කොන්සර්වේටිව් පක්‍ෂය පවසා ඇත්තේ බොකෝ හරාම් හා ISIS වැනි කණ්ඩායම් විසින් භාවිතයට නගමින් ඇත්තේ මෙලෙස විනාශ කළ යුතු නාසි ඉස්ලාම් දහම බවයි.
ඩෙන්මාර්ක මැතිවරණ ව්‍යාපාරය මෙතෙක් ආරම්භ කර නොමැති වුවත් මෙ පැහැදිලිවම මැතිවරණය අරමුණු කරගත් ප‍්‍රචාරණ ව්‍යාපාරයක් බවත් මෙමගින් ඩෙන්මාර්ක් මුස්ලිම්වරුන් අපහසුතාවයට පත්වනු ඇති බවත් ඩෙන්මාර්ක් ඉස්ලාම් මධ්‍යස්ථානයේ සභාපති ෆටී අලෙව් පවසා ඇතැයිද වාර්තා වේ.
https://lankacnews.com/sinhala/foreign-news/130980/
ලංකා රාජාවලියේ ශ්‍රේෂ්ඨ රජකු වූ ද සේනාසම්මත වික්‍රමබාහු රජු විසින් ඇරැඹූ සෙංකඩගල රාජධානියේ දහතුන් වැනි රජු වූ ද දුම්බර ප්‍රදේශයට නොමැකෙන කීර්තියක්‌ ලබාදුන් අපේ දෙවැනි රාජසිංහ මහරජතුමාගේ අභාවයෙන් දෙසැම්බර් හය වැනි දිනට වසර තුන්සිය විසි හතරක්‌ ගතවේ. වර්ෂ 1608 දී බින්තැන්න දේවමැද්ද ගමේදී උපන් බින්තැන්නේ දෙවියන් යන ආදර නාමයෙන් වැසියන් අතර ජනප්‍රිය වූ මොහු 1635 දී අභිෂේක ලබා 1681 වන විට අවුරුදු පනස්‌ දෙකක්‌ රාජ්‍යතන්ත්‍රය හොබවා අවුරුදු හැත්තෑ නවයක්‌ ආයු වළඳා සිය පුත්‍ර දෙවැනි විමලධර්මසූරිය කුමරාට රාජ්‍යය පවරා අපෙන් සමු ගත්තේය. කුසුමාසන දේවියගේ දෙවැනි සැමියා වූ සෙනරත්ට දාව උපන් ශේ්‍රෂ්ඨ පුත්‍රරත්නය ඔහු විය.
දුටුගැමුණු මහරජතුමාට ජාතිය ගලවා ගැනීමට සිදුවූයේ එළාර දමිළ ආක්‍රමණයෙන්ය. මොනරාගල මුප්පනේ මහා විජයබාහු හෙවත් කීර්ති මුහුණ දුන්නේ සොළී ආක්‍රමණයකටය. දුම්බර බිමෙන් දැයට දායාද කළ ගලහිටියාවේ බෝධිරාජ හෙවත් තුන්වැනි විජයබාහුට රට බේරා ගැනීමට සිදුවූයේ කාලිංග ආක්‍රමණිකයකු වූ මාඝගෙන්ය. මේ රජවරුන් සියලු දෙනාම පරසතුරු උවදුරින් සිංහලේ බේරාගත් රජවරුන්ය. නමුත් අද අප සිහිපත් කරන දෙවැනි රාජසිංහ මහරජතුමා එක්‌වර සතුරු බළමුළු රැසකටම මුහුණදී ජයගත් අයෙකි. රන්දෙනිවෙල ගන්නෝරුව, බලන ආදී මර්මස්‌ථානවලදී ඔහු සාර්ථකව පෘතුගීසීන්ට මුහුණ දී ජය ලද්දේය. හතර කෝරළේ මැණික්‌කඩවර භාරව සිටි අසාවෙදෝ, කොන්ස්‌ටන්ටයින් ද සා, ඩියෝගෝ ද මැලෝ, කැස්‌ත්‍රො ආදී පෘතුගීසි රණශූරයන් රාජසිංහයන් හමුවේ මැරුම් කෑවේ අසරණ මුවපොව්වන් මෙනි. නොරෙඤෙඤො, අල්මේදා ආදී යුද්ධ නායකයන්ගේ බෙලි කපා රජතුමාට ඉදිරිපත් කළේ රිදී බන්දේසිවල තබාය. එම සිංහල රණ ශූරයන්ට ද රජතුමා අගනා ගම්බිම් මෙන්ම වෙනත් වස්‌තූන් ද ප්‍රදානය කරමින් ඔවුන්ගේ සේවයට කෘතගුණ දැක්‌වීය. පෘතුගීසීන් පලවා හැරීමට ලන්දේසීන් මෙහෙය වූ රජතුමා පසුව කීයේ එම උපක්‍රමය ඉඟුරු දී මිරිස්‌ ගත්තා වගේ කියාය. මෙම කියමන අපේ ප්‍රස්‌ථාව පිරුළු අතරට එක්‌ව භාෂාවට ද පෝෂණයක්‌ ලබාදී තිබේ. දහසය වැනි සියවසේ අග භාගය තරම වන විට උතුරේ බෙංගාල බොක්‌කේ සිට ලංකාවේ නැගෙනහිර වෙරළ දක්‌වා ඉන්දියානු, පෘතුගීසී, ලන්දේසී ආදී වෙළෙන්දෝ සිය වෙළෙඳ බඩු භාණ්‌ඩ හුවමාරු කරගැනීමේ මෙන්ම මුදලට විකුණා ගැනීමේ ක්‍රියාවලියක ද යෙදී සිටියෝය.
අපේ කුළු බඩු, ඇත්දත්, කුරුඳු, පුවක්‌ ආදී දේශීය වගා නිෂ්පාදනයන්ට වෙළෙඳපොළෙහි මහත් ඉල්ලුමක්‌ පැවතියේය. එබැවින් රාජසිංහ රජු දවස වෙළෙඳාම මෙන්ම දේශීය කෘෂි ආර්ථිකයෙන් ද රට සමෘද්ධිමත්ව පැවතිණි. මේ අතරය නැගෙනහිර කොට්‌ටියාර් වරායට "ද ඈන්" නෞකාවෙන් ඉංගී්‍රසීන් පිරිසක් පැමිණියේ. රජතුමා නැගෙනහිර භාරව සිය දිසාවේ ලවා එම පිරිස අත්අඩංගුවට ගත්තේය. එහි කපිතාන් වූ රොබට්‌ නොක්‌ස්‌ සෙංකඩගලට ගෙනවුත් ලැගුම්දෙනියේ නිවාස අඩස්‌සියේ තැබුවේය. රජතුමන්ගේ රණ ශූරත්වය උපතින්ම ලත් දායාදයකි.
රජතුමාගේ දුනු ඊතල භාවිතයේදී තිබූ ශූරත්වය දැක්‌වූ එක්‌ අවස්‌ථාවක්‌ මෙම කවියෙහි සඳහන්ය.
ලක මෙතුන් හිමි රාසිනරපති වඩිනු මඩකලපුවට සමයෙක
නෙක ගණන් දන නසා ගල්ඔය රඳන කිඹුලකු දිවනෙතින් දැක
සැක නොවී කගපතින් කොටමින් කොතවියෙන් ඇනලුවෙන් විගසක
රැක නොහී දිවි කොතවියන් සහ කිඹුලු ජලබාවිය ඇසිල්ලෙක
වයස දහසයේදී ඔහු සිය පියා සමග සටන් බිමට පිවිසියේ යාපනයේ තම ඥති සොයුරු කුමාරසිංහ හා විජයපාල දෙපළට තිබූ හිමිකමක්‌ වෙනුවෙනි. කොන්ස්‌ටන්ටයින් ද සා සමග 1624 දී රන්දෙනිවෙල සටන ජයගන්නා විට ඔහු විසි දෙහැවිරිදි තරුණයෙකි. සා ගේ ඝාතනයෙන් පසු සුදුසු අනුප්‍රාප්තිකයකු ලංකාවට එවීමට ද පෘතුගාලේ රජුට කලක්‌ ගත විය. ගන්නෝරුවේ සටනින් රජතුමා විජයග්‍රහණයක්‌ අත්කර ගන්නා විට ඔහු තිස්‌වැනි වියෙහි විය. එම සිද්ධියට මුල් වූයේ ද මැලෝ නම් සාගේ අනුප්‍රාප්තිකයා රජුගේ හොරතලා නම් ඇත්පැටවා බලහත්කාරයෙන් පැහැරගෙන යැමය.
රජතුමාගේ පාලනය
රජතුමා සිය රාජධානියට ඇතුල්වීමට හැකි ස්‌ථාන තෝරා එහි කඩවත් නමින් මුරපළවල් ඇති කළේය. නාලන්ද, රත්තොට, කයිකාවල, හුලංගමුව, කඩවත්ගම, බලකඩුව, ගිරිහාගම, කඩවත, අවිස්‌සාවේල්ල, උලපනේ, කඩුගන්නාව ආදී ස්‌ථාන එවැනි කඩවත්ය. මෙම කඩවත්වලින් ඇතුල්වීමට මඩිගේ බද්ද නමින් බද්දක්‌ අය කරන ලදී. කඩවත්වලින් ඇතුල් වූ පසු තොටමුණ ද ඊට පසු වාහල්කඩ ද විය. මේ නිසා රාජධානියට ඇතුල්වීම මෙන්ම පිටවීම ද දුෂ්කර විය. පල්ලේගම්පහේ අධිකාරම් මෙම ස්‌ථාන භාරයේ සිටි නිලධාරියා විය. මෙම හේතුවෙන් රාජ්‍ය රහස්‌ මෙන්ම තොරතුරු සතුරාට ලබාගැනීමට නොහැකි විය. රජතුමා ද පෘතුගීසි හා ලන්දේසි බස ද දැන සිටි හෙයින් රහසේ ලිපි ගනුදෙනු කිරීම ද අසීරු විය. රජුගේ ඔත්තු සේවා කොතරම් ප්‍රබලයත් ද රජුට පුතකු සිටි බව ලන්දේසීන් දැන නොසිටියේය. එබැවින් එවකට සිටි ලන්දේසි ආණ්‌ඩුකාරවර රයිකෙලාµa µන් හුන්ස්‌ සිය රජුට වාර්තා කළේ දැනට මුහුදුබඩ ප්‍රදේශ ද ලන්දේසීන් යටතේ පවතින බැවින් රජුගේ මරණයෙන් පසු උඩරට රාජධානිය ද ඉබේටම ඔවුන් සතුවන බවය. රජතුමා අද පවතින ලේඛනාරක්‍ෂක ක්‍රමය මුලින්ම ආරම්භ කළ අයෙකි. හී ලේකම් මිටිය, කඩයිම් පොත, තල්පත, තුඩපත, සන්නස්‌ විත්ති පොත්, සීට්‌ටු දිවි සීට්‌ටු ආදී රාජ්‍ය ලේඛන ආරම්භ කළේය. දිවි සීට්‌ටුව දිවුරුම් දීමේදී නිතර භාවිතය වූ රාජ්‍ය ලේඛනයකි. රජතුමාගේ පියා විසින් ආරම්භ කරන ලද නෙදර්ලන්ත ලංකා නැව් සමාගම තවදුරටක්‌ ශක්‌තිමත් කරමින් ජාත්‍යන්තර සයුරු තරණය කර ලංකා කොඩිය ලෙළදෙමින් නාවික ගමන් රතු මුහුද ඔස්‌සේ ඊජිප්තුව දක්‌වා ද දකුණු අත්ලන්තික්‌ සයුරෙහි නෙදර්ලන්තය දක්‌වා ද ඉන්දියානු සාගරයෙහි නැව් යාත්‍රා කිරීම එකල සුලබ දර්ශනයක්‌ විය.
රජතුමා සහ නෙදර්ලන්ත රජතුමා අතිනත් හුවමාරු කරගන්නා ලාංඡනය එම නැව් හඳුනා ගැනීමට යොදා ගන්නා ලදී. මේ වන විට ප්‍රංශය ද නැගෙනහිර වෙරළබඩ ඔස්‌සේ ඔවුන්ගේ වෙළෙඳ නෞකා එවීමට පියවර ගනිමින් ඒ සඳහා කොට්‌ටියාරම් බොක්‌ක මූලස්‌ථානය වශයෙන් තෝරා ගත්තේය. මේ සමගම ප්‍රංශය, මැඩගස්‌කරය ජනාවාස පිහිටුවීමට මුල්කොට ගෙන තිබිණි. ප්‍රංශයේ දහහතර වැනි ලුවී රජු රාජසිංහයන්ගේ සමකාලීනකයා වූ අතර මෙම කටයුතුවලට නායකත්වය ලාහේ අද්මිරාල්වරයා ලබා දුන්නේය. දහහතර වැනි ලුවී හෙවත් මහා ලුවී යන විරුදාවලිය ලත් ලුවී ඉතිහාසයෙහි දීර්ඝතම කාලයක්‌ වූ අවුරුදු හැත්තෑ දෙකයි මාස තුනයි දින දහඅටක්‌ රජ කළ යුරෝපා ජාතික රජකු විය. අපේ දෙවැනි රාජසිංහ රජතුමා ද අවුරුදු පනස්‌ දෙකක්‌ රජකම දරා පණ්‌ඩුකාභය හා මුටසීව රජුන්ට පමණක්‌ දෙවැනිව, අවුරුදු හැත්තෑ නවයක්‌ ආයු වළ¹ මියගිය රජතුමා ද වන්නේය. රජතුමා යුරෝපීය ජාතිකයන් සමග රාජ්‍යතාන්ත්‍රික සම්බන්ධතා මෙන්ම වෙළෙඳ සබඳතා ගොඩනඟා ගැනීමට ද සමත් විය. ඔහු පෘතුගීසි, ලන්දේසි, ඉංගී්‍රසි ආදී භාෂා හැසිරවීමට අවශ්‍ය නිපුණත්වය ලබා තිබිණි. රජතුමා සිංහල භාෂාව හා සාහිත්‍යයේ උන්නතියට ද විශාල මෙහෙයක්‌ ඉටු කළේය. බුදුගුණ වැයීමට මෙන්ම ප්‍රශස්‌ති ගායනාවලදී ද කවිය යොදා ගත්තේය. රජතුමාගේ කවි මඩුවෙහි එකල නම් දැරූ කවියන් සේවය කළේය. බින්තැන්නේ සාමි, ඌවේ කුඩා මොහොට්‌ටාල, වීරකෝන් මුදලි, තල්දෙන අදිකාරම් ආදීන් ඒ අතර විය. සුභාෂිතය, කුස ජාතකය, සැවුල් අස්‌න ආදී පොත් මෙසමෙහි විසූ අලගියවන්න මොහොට්‌ටාල අතින් රචනා විය.
වලපනේ දිසා වූ කිවුලේගෙදර මොහොට්‌ටාල උඩරට කැරැල්ලේදී අත්අඩංගුවට ගෙන 1818.09.20 දින හිස ගසා දමන ලදී. විරුදු සිංහල කාව්‍යයට එක්‌කළ කිරිමැටියේ මොහොට්‌ටාල මෙන්ම ඇලපාත මුදලි, අත්තරගම රාජගුරු යන අයවලුන් ද උඩරට රාජධානියේ සිටි උගතුන් විය. රජතුමා අපේ ගම් පළාත්වල වෙස්‌ වලාගෙන ඇවිදගොස්‌ සිය වැසියන්ගේ සුවදුක්‌ සොයා බැලුවේය. එසේ යන විට කුළු හරකකුගෙන් අනතුරක්‌ සිදුවන බව හරකාට බියෙන් ගසක්‌ උඩට නැඟගත් මිනිසකු කෑගසා කීවේ මේ යන මඟියා රජතුමා බව නොදැනය. රජතුමා කුළු හරකා විද මරා දමා අං තට්‌ටුව රැගෙන මාළිගයට පැමිණෙන මෙන් දැන්වීය. මගියා රජතුමා මාලිගාවට ගොස් බැහැදුටු අවස්‌ථාවේ එම මිනිසාට දුන් නින්දගම අංගම්මන නම් විය. රජතුමා සිය දුම්බර ඥතීන්ට උදව් උපකාර කළේ ඔවුන්ගේ ගොවිතැනට අවශ්‍ය ජලය සැපයීමට බණ්‌ඩාර ඇළ කප්පවා දීමෙනි. දුම්බර රජකු වූ මහසෙන් රජතුමා ද සිය ඥති මිත්‍රාදීන්ට ගොවිතැනට ජලය සැපයීම සඳහා මිනිපේ සිට මින්නේරි වැව දක්‌වා ඇළක්‌ කපා දී ඇත. රජතුමාට සෙංකඩගල, මැදමහනුවර, නිලඹේ, හඟුරන්කෙත ආදී ප්‍රදේශවල ද මාලිගා තිබී ඇති අතර පරසතුරු උවදුරු අවස්‌ථාවල ඒවාට පලා යැමට රහස්‌ උමං මාර්ග ද තිබී ඇත. රාජසිංහ නාමය රජුගේ සතුරන්ට බිය සන්ත්‍රාසය දැනවූ අතර එම නාමය සිංහලේ වැසියන්ට කොතරම් ගෞරව භක්‌තියක්‌ ජනිත කරවීමට සමත්වීද යත් පසුව රජ පැමිණි වඩුග රජවරු ඔවුන්ගේ පූර්වනාමයන් වූ විජයරාජ, කීර්තිශ්‍රී, රාජාධි හා ශ්රී වික්‍රම නාමයන්ට රාජසිංහ අපර නාමය ඈ¹ ගත්තෝය. ස්‌වභාව ධර්මයට ආශා කළ පරිසරවේදියකු වූ ඔහුට නොයෙක්‌ විදේශ කුරුල්ලන්, සිවුපාවුන් ආදීන්ගෙන් පිරි සත්වෝද්‍යානයක්‌ ද විය. නොයෙක්‌ රටවලින් තෑගි වශයෙන් ලැබූ අශ්වයින් ඇතුළු වන සිවුපාවුන් එහි දැකගත හැකි විය. එමෙන්ම රජතුමාට නොයෙක්‌ විදේශ රටවලින් ලැබූ ත්‍යාග වශයෙන් දර්ශනීය පිඟන් කෝප්ප ආදී භාණ්‌ඩ රැසක එකතුවක්‌ ද තිබිණි. 1665 මාර්තු 05 දින අඹන්වල රාල මෙහෙය වූ රජතුමාට විරුද්ධ කැරැල්ල නිලඹේ කැරැල්ල යනුවෙන් ඉතිහාසගතව ඇත. මෙම කැරැල්ල සමයෙහි රජතුමා සෙංකඩගලින් පැනවිත් සැඟවුණේ සිය මවගේ ගම් ප්‍රදේශය බද ගලබඩවත්තෙහිය. එහි සිට සිය පුතුගේ හා දුවගේ ආධාර උපකාරයෙන් සේනාව සංවිධාන කොට නැවතත් සෙංකඩගලට පැමිණ කැරලිකරුවන් මරා දමා රජකම භාර ගැනීමට ඔහු සමත් විය.
ඇස්‌. බී. කරල්ලියද්ද / දිවයින (04/12/2011)
http://www.sinhalaya.com/network/index.php/topic,4868.0.html
Pic
Source
පාසල් යන කාලේ පන්තියේ ගුරුතුමිය අපෙන් අහනවා, ලොකු වුනහම ඔබ කවුරු වෙන්නද කැමති කියලා. සමහර දරුවො කියනවා, මම ගුරුවරයෙක්‌ වෙන්න කැමතියි කියලා. වෛද්‍යවරයකු, ඉංජිනේරුවරයෙක්‌ වෙන්න කැමතියි කියලා. පුංචි කාලයේ මගේ කැමැත්ත තිබුණේ දේශපාලනඥයෙක්‌ වෙන්න. මට මතකයි 1977 වසරේදී මම පාසල් ශිෂ්‍යයෙක්‌. 1977 මහ මැතිවරණයේදී පංතියේ ශිෂ්‍යයන් සමග මම රුපියල් 2.00 ගානේ ඔට්‌ටු තුනක්‌ අල්ලලා තිබුණා. ඒ ඔට්‌ටු තුනෙන්ම මම පැරදුනා. මගේ සිතේ කැමැත්ත දිව්වේ ඒ දිශාවට. රට ජාතිය ආගමට ඒ දිනවල මම ගොඩාක්‌ ආදරෙයි. ළමා කාලයේ මම බොහොම කුලෑටි ශිෂ්‍යයෙක්‌. පාසලේ සාහිත්‍ය සංගමය දවසට සින්දුවක්‌ කියන්න කිව්වොත් මම හැමදාම මගහරිනවා. සභාවක්‌ ඉදිරියට යන්න හරිම ලැඡ්ජයි. එම ලැඡ්ජාශීලී බව නැතිකරලා මාව සමාජය ඉදිරියට ගත්තේ කිංස්‌ලි වික්‍රමරත්න කියන මහත්මයා. ඔහු මට ගිහි ජීවිතයේදි හුඟක්‌ උපකාර කළා.
ජීවිතය දකින්න, ජීවිතය විඳින්න, ජීවිතය කලකිරෙන්න, ජීවිතයේ නිස්‌සරණය සොයාගෙන යන්න, මට ගොඩාක්‌ම ජීවිතාවබෝධය ලබාගන්න උපකාර වූයේ කිංස්‌ලි වික්‍රමරත්න මහත්මයා. මගේ ජීවිතයේ මට ලැබුණ හැම දෙයක්‌ම, නොලැබුණ සෑම දෙයක්‌ම මට උපකාර වුණා වර්තමානයේ සිටින තැනට එන්න. භික්ෂුවගේ ජීවිතේ කොතනකවත් භික්ෂුවට වැරදිලා නැහැ. විය යුතු දෙයයි වෙලා තිබෙන්නේ. ඒ නිසා ලෝකයේ කිසිවෙක්‌ මට හොඳක්‌ කරලත් නැහැ, වරදක්‌ කරලත් නැහැ. මම කරපු දෙයයි මම ලබලා තිබෙන්නේ.
භික්ෂුව වැඩසිටින කුටියට ඉහළින් තිබෙන ගසේ මල් පිපිලා. ලොකු දඬුලේනෙක්‌ එම අතු පතර රිංගමින්, මල් ආහාරයට ගන්නවා. එයා කාලා ඉවත දමන මලේ පොත්ත, භික්ෂුව වැඩසිටින කුටියේ ඉදිරි පියස්‌සේ ඇති පොලිතින් වහලයට සට සට ගාලා වැටෙනවා. බුදුරජාණන් වහන්සේ දේශනා කරනවා රූපය මාරයා හැටියට දකින්න කියලා. එහෙම නොදැක්‌ක ස්‌වාමින් වහන්සේනමක්‌ භික්ෂුවට, ආරණ්‍යයකදී මුණගැසුනා. උන්වහන්සේගේ පැවිද්දේ අර්ථයේ එක කොටසක්‌ මෙන් තිරිසන් සතුන්ව සුරතල් කිරීමත් පෝෂණය කිරීමත්. තිරිසන් සත්ව වේෂයෙන් අප ඉදිරියට එන මාරයාව අපි හඳුනාගන්න දක්‍ෂවෙන්න ඕනේ. එම නිසා තිරිසන් සතාව නිරතුරුව මගහැරලා ජීවත් වෙන්න කියලයි බුදුරජාණන් වහන්සේ දේශනා කරන්නේ. අපි පසුපසින් බැලලියක්‌ ආවත් ඇය කාන්තාවක් හැටියට දකින්න දක්‌ෂවන්න ඕනේ. මොකද කාන්තාව තුළවත් බැලලිය තුළවත් නොවේ රාගය තිබෙන්නේ. එම රූපය කෙරෙහි ඇති චන්දරාගය නිසා, අපි තුළයි රාගය ඇතිවෙන්නේ.
ලොව්තුරා බුදුරජාණන් වහන්සේගේ මහා කරුණා ගුණය කියන්නේ බල්ලන්, බලලුන්ට වටකරගෙන කෑම දෙනවා සුරතල් කරනවාය කියන කාරණය නොවේ. බුදුරජාණන් වහන්සේ කොතනකවත් තිරිසන් සතුන්ව සුරතල් කරන්න තිරිසන් සතුනට කන්න දෙන්න ගියේ නැහැ. බුදුරජාණන් වහන්සේ තිරිසන් සතුන්ගෙන් උපස්‌ථානයක්‌ ලබලා එම තිරිසන් සතුන්ට සුගතියට මාර්ගය පාදලා දුන්නේ. බුදුරජාණන් වහන්සේ විනය කාරණාවන් උපසම්පදා භික්‌ෂුන්ට පනවා තිබෙනවා. තවත් දානය වළඳලා පාත්‍රයේ ඉතිරි ඉඳුල් ආහාර සතුන් නැති ගලාගෙන යන ජලයකට දමන්න කියලා. තණකොළ නැති පොළවකට දමන්න කියලා. ස්‌වාමින් වහන්සේලා දානය වළඳලා ඉඳුල් බත් ටික තිරිසන් සතෙකුට දෙන්න කියලා බුදුරජාණන් වහන්සේ ස්‌වාමින්වහන්සේලාට දේශනා කරලා නැහැ. මොකද තිරිසන් සතුන් උතුම් භික්‌ෂුත්වයට පලිබෝධයක්‌මයි.
බුදුරජාණන් වහන්සේලාගේ උතුම් මහා කරුණා ගුණය සකස්‌ වෙන්නේ, උන්වහන්සේ පුර්වේනිවාසානුස්‌සති ඥණයෙන් දකිනවා. මේ මනුෂ්‍ය ලෝකයේ ජීවත්වෙන සෑම මනුෂ්‍යයෙක්‌ම, සංසාරයේ මට අම්මා තාත්තා වෙලා තිබෙනවා දරුවෙක්‌ ඥතියෙක්‌ වෙලා තිබෙනවා කියලා. බුදුරජාණන් වහන්සේ පුර්වේනිවාසානුස්‌සති ඥණයෙන් දකිනවා ප්‍රේත තිරිසන් අසුර නිරය කියන සාගර අහසේ සෑම සත්වයෙක්‌ම සංසාරයේ මට අම්මා, තාත්තා, ඥතියෙක්‌, දරුවෙක්‌, වෙලා තිබෙනවා කියලා. මේ හැම දිව්‍ය, බ්‍රහ්ම තලයක සිටින සෑම දෙවියෙක්‌, බ්‍රහ්මයෙක්‌ම මට සංසාරයේ අම්මා, තාත්තා, ඥතියෙක්‌, දරුවෙක්‌ වෙලා තියනවා කියලා. මේ උතුම් දැක්‌ම තුළ සිටිමිනුයි ලොව්තුරා බුදුරජාණන් වහන්සේගේ මහා කරුණා ගුණය ලෝකයට පැතිරෙන්නේ. අපි මේවා වැරදි දුර්වල ආකාරයට තේරුම් අරගෙන තිරිසන් සතුන්ට කන්න දීම සුරතල් කිරීම මහා කරුණා ගුණය හැටියට දකිනවා වගේම මෙවැනි දේවල් නිසා අපේ භික්‌ෂුත්වයත් විනාශ කොට ගන්නවා.
භික්ෂුව මුණගැසෙන්න කුටියට, තරුණ ස්‌වාමින් වහන්සේනමක්‌ පැමිණියා. උන්වහන්සේ හුදකලාව ප්‍රිය කරණ ස්‌වාමින් වහන්සේනමක්‌. උන්වහන්සේ බොහොම නොසතුටින් වගේ ප්රකාශ කලා මේ වස්‌ කාලය සිත විසුරුණු වස්‌ කාලයක්‌ කියලා. මගේ කෙටි උපසම්පදා ජීවිතයේ නරකම වස්‌ කාලය මෙය බවයි උන්වහන්සේ ප්රකාශ කළේ. භික්ෂුව ඇසුවා ඇයි මොකද සිත විසිරෙන්න හේතුව කියලා. උන්වහන්සේ කියනවා කුටියේ කැපකරු කියන දෙය අහන්නේ නැහැ, දායක පිරිස් කුටියට එක්‌කරගෙන එනවා කියලා. භික්ෂුව ඇසුවා නිතරම දායක පිරිස එක්‌කරගෙන එනවාද කියලා. ඒ වෙලාවේ උන්වහන්සේ කියනවා එක කට්‌ටියක්‌ පමණයි කුටියට එක්‌කරගෙන පැමිණියේ කියලා. කැපකරු එක දායක පිරිසක් කුටියට එක්‌කරගෙන ආවය කියලා උන්වහන්සේගේ මුළු වස්‌ කාලයම විනාශවෙලා. මේ ගැටීම සකස්‌ වෙන්නේ මගේ හුදකලාව කියන ඇලීමේ බලවත්භාවය නිසාමයි. ඇලීමේ බලවත්භාවය නිසාමයි ගැටීමේ උච්ඡභාවය සකස්‌ වෙන්නේ. ඇලීමත් ගැටීමත් උච්ඡ තැනදී සිතේ විසිරීම ස්‌වභාවික දෙයක්‌. බුදුරජාණන් වහන්සේ දේශනා කරනවා රූපය කියන්නේ මාරයාය කියලා. එම නිසා අපි කැපකරුවන් දායක මහත්මයාත් මාරයා හැටියට දකින්න දක්‍ෂවෙන්න ඕනේ. අපිට මේ අය ප්රතික්ෂේප කරලා ජීවත්වෙන්න බැහැ. මේ අයත් අපේ පැවිදි ජීවිතයේම කොටසක්‌. අපි කැපකරුව ජයගන්න දක්‍ෂ නැතිනම් දායක පිංවතා ජය ගන්න දක්‍ෂ නැතිනම්, ඒ අය සමග ගැටෙන ස්‌වභාවයට ඇලෙන ස්‌වභාවයට යනවා නම් අපි කෙසේ සේනා සහිත මාරයාව ජය ගන්නද? මුලින්ම ඔබ කැපකරුට දායක මහතාව ජය ගන්න දක්‍ෂ වෙන්න. මේ අය සමග ගැලවීමට හැකි මායිමේ සිට ඇසුරු කරන්න දක්‍ෂ වෙන්න.
(මෙය, සංඝයා උදෙසා වැදගත්වන සටහනක්‌ තබන ලෙසින් මෙම ලිපි මාලාව සම්පාදනය කරනු ලබන ස්‌වාමීන් වහන්සේ හට සහෝදර ස්‌වාමීන්වහන්සේ නමකගෙන ලද ආරාධනයට අනුව ලියෑවුණු දීර්ඝ ලිපියේ තවත් කොටසකි. ඉකුත් සතියේ පළවූයේ සිංහල අවුරුද්ද වෙනුවෙන්, සිංහල බෞද්ධ සමාජය උදෙසා විශේෂයෙන් ලියන ලද ලිපියක්‌ බව සලකන්න)
ඉදිරිපත් කිරීම - ඉන්ද්‍රජිත් සුබසිංහ
http://www.divaina.com/2015/04/19/feature05.html
පසුගිය වසර කිහිපය තුළ බි‍්‍රතාන්‍යයේ ජීවත්වන මුස්ලිම් ප‍්‍රජාව හා මුස්ලිම් නොවන ප‍්‍රජාවන් අතර වන අසහනකාරී තත්වය ඉහළ ගොස් ඇතැයි නවතම සමීක්‍ෂණයකින් අනාවරණය වී තිබේ.
මේ සඳහා බි‍්‍රතාන්‍ය මුස්ලිම්වරුන් 1000ක් සම්බන්ධ කරගෙන ඇති අතර ස්කයි පුවත් සේවය විසින් මෙය පවත්වා ඇත.
මුස්ලිම්වරුන්ගෙන් 33%ක් පවසා ඇත්තේ වසර කිහිපයකට පෙර දැනුනාට වඩා තමන් පිළිබඳ අවිශ්වාසයක් සමාජය වෙතින් දැනෙමින් ඇති බවයි.
මුස්ලිම් ප‍්‍රජාව කෙරෙහි විරුද්ධවාදී ආකල්පයක් ඇති බව මුස්ලිම් නොවන 44%ක පිරිසක් පවසා ඇතැයි වාර්තා වේ.
ඉස්ලාම් දහම බි‍්‍රතාන්‍ය වටිනාකම් හා සැසඳෙන බව මුස්ලිම්වරුන්ගෙන් 3/4ක්ම පවසා තිබුණත් එය එසේ නොවන බව මුස්ලිම් නොවන 52%කගේ අදහසයි.
මුස්ලිම් පිරිමින් 78%ක් බි‍්‍රතාන්‍ය සංස්කෘතිය හා අනුකූලතාවය දක්වද්දී එයට එකගවී ඇත්තේ කාන්තාවන් 64%ක් විම විශේෂත්වයකි.
වයස අවුරුදු 18-34 අතර මුස්ලිම් තරුණ කොටස් අතරින් 73%ක් ද එයට එකගවී ඇතැයි පැවසේ.
සිරියාවේ සටන් වැදීම සඳහා බි‍්‍රතාන්‍යය හැර යන තරුණ ජිහාඞ්වාදීන් පිළිබඳ වන අදහස විමසීමේදී මුස්ලිම් කාන්තාවන් අතරින් 11%ක් ඔවුන් පිළිබඳව අනුකම්පා කරන බව පවසා ඇති අතර එය අගය පුරුෂ පාර්ශ්වයට අදාළව 5%ක් පමණකි.
මුස්ලිම් නොවන 4%ක්ද ජිහාඞ්වාදීන්ට අනුකම්පාව දක්වන බව අනාවරණය වී තිබේ. ස්කයි පුවත්සේවය පවසන්නේ මුස්ලිම් හා මුස්ලිම් නොවන පිරිස් දරන අදහස් පිළිබඳව සිදුකෙරුණු පළමු සමීක්‍ෂණය මෙය වන බවයි.
https://lankacnews.com/sinhala/foreign-news/130737/
Pic
Source
මුළු රටටම කොඩි විනයක්‌ බවට පත් වී ඇති මහා පරිමාණ මත්ද්‍රව්‍ය සහ මත්පැන් ජාවාරම අද පැයෙන් පැය බ්‍රේකින් නිවුස්‌ මවන මාතෘකාවක්‌ බවට පත් වී තිබේ.
අද 'දිවයින ඉරිදා සංග්‍රහය' තුළින් අපි අනාවරණය කරන්නේ කුඩු රජවරු, එතනොල් රජවරු, කසිප්පු මුදලාලිලා හෝ කැසිනෝ රජවරු ගැන නොවේ. මහා පරිමාණ මත්කුඩු ජාවාරමේ තවත් අතුරු නිෂ්පාදනයක්‌ වන එන් සී මත්කුඩු පිළිබඳවයි.
මහා පරිමාණ එන් සී මත්කුඩු ජාවාරම එළියට ආවේ පසුගිය දිනක කොළඹ සිට බගවන්තලාව දක්‌වා ධාවනය වූ වෑන් රථයක්‌ පොලිසිය විසින් නල්ලතන්නි ප්‍රදේශයේදී නතර කොට පරීක්‍ෂා කිරීමේදී එහි තිබී එන් සී මත්කුඩු ටින් හත්දාස්‌ හත්සිය හැත්තෑතුනක්‌ (7773) හමුවීමත් සමගයි.
මෙම මත්කුඩු තොගය රැගෙන ගොස් තිබෙන්නේ උඩරට වතුකරයේ පාසල් සිසුන් ඇතුළු තරුණයන්ට අලෙවි කිරීම සඳහා බව පොලිසිය විසින් සිදුකළ මූලික පරීක්‍ෂණවලදී අනාවරණය වී ඇත.
අත්අඩංගුවට ගත් එක්‌ මත්කුඩු ටින් එකක ග්රෑම් දහයක්‌ පමණ බර මත්කුඩු අසුරා තිබූ අතර, එම ටින්වලින් එක ටින් එකක්‌ රුපියල් එකසිය විස්‌සකට මෙම ජාවාරම්කරුවන් මිලදී ගෙන තිබේ. කොළඹ සිට උඩරට වතුකරයට එන් සී මත්කුඩු රැගෙන ගිය ජාවාරම්කරුවන්ගේ අරමුණ වී තිබෙන්නේ කොළඹින් රුපියල් එකසිය විස්‌සට ගත් මත්කුඩු ටින් එකක්‌ රුපියල් තුන්සියයකට වතුකරයේ තරුණයන්ට විකිණීමයි. නැත්නම් ඊටත් වැඩි මිලකට විකිණීමයි. මේ අනුව මෙම මත්ද්‍රව්‍ය ජාවාරම විශාල වශයෙන් මුදල් හම්බ කළ හැකි මහා පරිමාණ ජාවාරමක්‌ බවට කිසිම සැකයක්‌ නැත. මෙම මත්ද්‍රව්‍ය ජාවාරම අද ඊයේ ආරම්භ වූ ජාවාරමක්‌ නොව වසර ගණනාවක්‌ තිස්‌සේ ඉතා සූක්‍ෂම ලෙස රට පුරා සිදුකර ගෙන ගිය ජාවාරමක්‌ බව ඉතා පැහැදිලිය.
එන් සී. මත්ද්‍රව්‍ය රට පුරා බෙදාහරින මහා පරිමාණ ජාවාරම්කරුවන් තමන්ගේ පාරිභෝගිකයන් ලෙස තෝරා ගෙන තිබෙන්නේ මේ රටේ අනාගතය භාර ගැනීමට සිටින පාසල් දරු දැරියන් ඇතුළු තරුණ පරපුරයි. පාසල් දරු දැරියන් වරදට පොළඹවා ගැනීමට සමාජය තුළ අද තිබෙන ඉඩකඩ ඉතිහාසයේ අන් කවරදාකටත් වඩා වැඩි වී තිබේ.
මේ සඳහා 1977 න් පසු රට පාලනය කළ සියලුම දේශපාලන පක්‍ෂ නායකයන් අඩු වැඩි වශයෙන් වගකිව යුතුය. නියපොත්තෙන් කඩන්නට තිබුණ දේ එදා නිය පොත්තෙන්ම කඩා දැමුවා නම් අද අපිට කුඩු ගැන කතා කරන්න දෙයක්‌ ඉතිරි වන්නේ නැත.
නමුත් බලය තිබෙන විට මොළය නැහැ මොළය තිබෙන විට බලය නැහැ යන කියමන අද අපේ රට තුළ දේශපාලන යථාර්ථයක්‌ බවට පත් වී තිබෙන්නේ මේ රට පාලනය කළ දූෂිත දේශපාලනඥයන්, මත්ද්‍රව්‍ය ජාවාරම්කරුවන් ආරක්ෂා කරමින් නිය පොත්තෙන් කඩා දමන්නට තිබුණ දේ පොරවෙන් තියා ෙච්න්සෝ මැෂිමකින්වත් කපා ඉවත් කළ නොහැකි තත්ත්වයට පත් කිරීම හේතුවෙනි.
අද අපේ රට මුළු ලෝකයටම කුඩු බෙදන කුඩු ජාවාරම්කරුවන් රජ කරන තිප්පොළක්‌ බවට පත් වී තිබේ. මේ සඳහා දශකයක්‌ පමණ රට පාලනය කළ පසුගිය රජයේ දූෂිත පාලකයන් සම්පූර්ණයෙන් ම වගකිව යුතුය.
කුඩු රජවරුන්ට පාර්ලිමේන්තුවට යන්නට ලයිසන් දුන්නේ මේ අයයි. ඒ වගේම ආරක්ෂක අමාත්‍යාංශයේ අධීක්‍ෂණ මන්ත්‍රීකම් දුන්නේ ද මේ දූෂිත පාලකයන්මය. අද වෙලේ සුදා පොලිසිය ඉදිරියේ වමාරන්නේ මේ සත්‍යයයි. නමුත් අපිට පෙනෙන විදියට, අපිට දැනෙන විදියට කෝටි දෙකකට අධික ජනතාව හඬනගා කියන විදියට නීතියට වඩා කුඩු මුදලාලිලා බලවත් ය. එසේ නොවේය කියා ඔප්පු කිරීමට නීතිය ක්‍රියාත්මක කරන නිලධාරීන්ට සහ වර්තමාන පාලකයන්ට ද අද වනතුරු නොහැකි වී තිබේ.
පොලිස්‌ අත්අඩංගුවේ සිටින්නේ වෙලේ සුදා පමණි. නමුත් තවත් වෙලේ සුදාලා සිය ගණනක්‌ රට තුළ නිදැල්ලේ සැරිසරමින් මත්ද්‍රව්‍ය ජාවාරමේ නිරත වී සිටී. තොග සහ සිල්ලර වෙළෙඳාම ලෙස මෙය කොටස් දෙකකින් යුක්‌ත වේ. තොග වෙළෙඳාමේ නිරත වන්නේ කුඩු රජවරු සහ දූෂිත දේශපාලනඥයන් ය. පොලිස්‌ නිලධාරීන් සහ ව්‍යාපාරිකයන් ද මෙහි කොටස්‌කරුවන් වේ.
සිල්ලර වෙළෙඳාමේ නිරත වන්නේ ප්‍රධාන නගරවල උප නගරවල වතුවල, ගම්මානවල බලය පතුරුවා ගෙන සිටින ප්‍රාදේශීය දේශපාලනඥයන් සහ ඔවුන්ගේ ගෝලබාලයන් ය.
ලංකාව පුරා ක්‍රියාත්මක වන නීති විරෝධී මත්පැන් සහ මත්ද්‍රව්‍ය ජාවාරමත් පාරිභෝගිකයන් ආකර්ෂණය කර ගැනීම සඳහා විවිධ නම්වලින් තරුණ කොටස්, වැඩිහිටියන්, ළමයින් ඉලක්‌ක කොට ගෙන තම නිෂ්පාදන වෙළෙඳ පොළ වෙත මුදා හැර තිබේ. එන් සී මත්කුඩු එහි එක්‌ නිෂ්පාදනයක්‌ වේ. දුම්වැටියක්‌ හොරෙන් උරන නැත්නම් මත්පැන් වීදුරුවක්‌ දෙකක්‌ හොරෙන් බොන පාසල් ළමුන් සහ තරුණ කොටස් මීට දශක දෙක තුනකට පමණ පෙර සිටියේ නගරයේ ජනප්‍රිය පාසල්වල සහ නාගරික ප්‍රදේශවල පමණි. නමුත් අද මෙම තත්ත්වය සම්පූර්ණයෙන් ම වෙනස්‌ වී රට පුරා පාසල් සිසුන් පමණක්‌ නොව ශිෂ්‍යාවන් ද මත්පැන් සහ මත්ද්‍රව්‍ය භාවිතයට ගොදුරු වී තිබේ.
අද රාත්‍රි සමාජශාලා වෙත යන එසේත් නැත්නම් නයිට්‌ ක්‌ලබ් වෙත යන තරුණ කණ්ඩායම් අතර පාසල් ශිෂ්‍ය ශිෂ්‍යාවන් ද විශාල වශයෙන් සිටී. අද මේ ලෙස පොඩිහිටියන්, වැඩිහිටියන් බවට පත්වී තිබෙන්නේ මුළු මහත් සමාජයම අද කුඩු මුදලාලිලාගේ එතනෝල් මුදලාලිලාගේ සහ කැසිනෝ මුදලාලිලාගේ ග්‍රහණයට හසු වී තිබීම හේතුවෙනි.
රට පුරා මහා පරිමාණයෙන් කුඩු බෙදා හරින කුඩු විකුණන නැත්නම් නීති විරෝධී මත්පැන් සහ මත්ද්‍රව්‍ය විකුණන මුදලාලිලා සිදුකරන්නේත් මේ රටේ අනාගතය බාර ගැනීමට සිටින තරුණ පරපුර සහ ළමා පරපුර මංමුළා කොට ඔවුන්ව මත්පැන් පානය කරන නැත්නම් මත්ද්‍රව්‍ය භාවිතා කරන තමන්ගේ පාරිභෝගිකයෙක්‌ ලෙස පත් කර ගැනීමයි. මෙම අභියෝගය අපිට ජය ගත හැකි වන්නේ මත්ද්‍රව්‍ය ජාවාරම්කරුවන්ගේ සහ ජාවාරම්කාර දූෂිත දේශපාලනඥයන් විසින් තමන්ගේ යකඩ සපත්තුවෙන් පාගා ගෙන සිටින මේ රටේ නීතිය, ජනතා පරමාධිපත්‍යය ඉන් මුදා ගෙන නැවත ගොඩනැඟීම තුළින් පමණි. මේ සඳහා පෙරමුණ ගත යුත්තේ මේ රටේ මහා සංඝරත්නය ඇතුළු සිවිල් ජනතාවයි. කූඩැල්ලන් මෙට්‌ටේ උඩ තියන්න බැරිවා සේ දේශපාලන වශයෙන් නන්නත්තාර වී ඇති දූෂිත දේශපාලනඥයන් අනෝතත්ත විලෙන් පැන් ගෙනවිත් නහවා අලුතෙන් සළු පිළි අන්දවා ගත්තත් මේ රටටවත්, ජනතාවටවත් සෙතක්‌ නම් වන්නේ නැත.
ජනාධිපති මෛත්‍රීපාල සිරිසේන මහතා නීති විරෝධී මත්පැන් සහ මත්ද්‍රව්‍ය භාවිතය වැළැක්‌වීම සඳහා පියවර ගනිමින් සිටින බව දක්‌නට ලැබේ. නමුත් එම පියවරවල් තුළ ඇත්තේ ඇල් මැරුණු ස්‌වභාවයකි. එම නිසා ජනතාව දුන් ජන වරමට අනුව ජනාධිපතිවරයා දැඩි පියවර ගත යුතුයි යන්න ජනතාවගේ මතයයි.
ප්‍රියදර්ශන ලියනගේ
http://www.divaina.com/2015/04/05/feature06.html
ස්‌වාමින් වහන්සේගෙන් ප්‍රශ්නයක්‌ ඇසුවා. අපි නිවීමේ මාර්ගයේ ගමන් කිරීමේදී එම ගමන සාර්ථක කර ගැනීමට සුදුසු ස්‌ථානයක්‌ තිබිය යුතුද කියලා. අතීතයේ රහතන් වහන්සේලා දහස්‌ ගණනින් වැඩ සිටි පැරණි ගල්ලෙන් සහිත ආරණ්‍යය ගල්කුටි නිවන් මාර්ගය වැඩීමේදී අපිට හුඟාක්‌ උපකාරී වෙනවා. මෙවැනි පරිසරයන් තුළ නිවිච්ච ස්‌වභාවයක්‌ කැටිව තිබෙනවා. ඒ වගේම හුදකලා වනවාසී කුටි අපේ ගමනට ශක්‌තියක්‌ වෙනවා. එම නිසා අපේ සිත ද ධර්මය තුළ වැඩෙන සුදුසු ස්‌ථානයක්‌ අපි සොයාගත යුතු වෙනවා. මට සුදුසුයි කියන තැනදීම එතැන තෘෂ්ණාව බැසගෙන තිබෙනවා. මොකද මම කැමැති තැනකුයි සොයන්නේ. මෙතනදී ඔබ ප්‍රවේශම් වෙන්න ඕනේ. ඔබට ලැබෙන තැන සුදුසු තැන බවට පත් කොට ගන්න. භික්ෂුවට භික්‍ෂු ජීවිතයේදී ලැබුණ හුඟාක්‌ තැන් සුදුසු තැන් නොවේ. නමුත් ලැබුණ තැන සුදුසු තැනක්‌ බවට පත් කොට ගැනීමට භික්ෂුව දක්‍ෂ වුණා. අපි හොඳ තැන් සොය සොයා යන්නේ අපේ තෘෂ්ණාව හඳුනා නොගැනීම නිසාම බව සිහියට නගාගන්න. අවම වශයෙන් සතර අපායෙන් මිදෙනතුරු තැන් තැන්වල ඇවිදිමින් ගත කරන්න යන්න එපා. සුදුසු තැන් සොයමින් ආරණ්‍යයෙන් ආරණ්‍යයට, කුටියෙන් කුටියට යන්න එපා. එය බොහෝම අන්තරාකාරී ක්‍රියාවක්‌. එම නිසා කළ්‍යාණමිත්‍ර ආශ්‍රය ලැබෙන විනය කාරණාවන් සුරකෙන සිත නිවෙන තැනක අරමුණ ඉටු වෙන තෙක්‌ නවතින්න. සංචාරකයෙක්‌ කියන තැනින් මිදී, භව ගමන නවතන අරමුණු කෙරෙහි සිත යොමු කරන්න. භික්ෂුව කුටියකට ආරණ්‍යයකට වැඩම කිරීමට පෙරාතුව අධිෂ්ඨානයක්‌ ඇති කොට ගන්නවා මේ ආරණ්‍යයේ මාසයක්‌ එහෙම නැත්නම් මාස දෙකක්‌ වැඩ සිටිනවා කියලා. එහෙම අධිෂ්ඨානයක්‌ ඇති කරගෙනයි ආරණ්‍යයට, කුටියට වඩින්නේ. එහෙම වැඩම කරලා, අනිවාර්යයෙන්ම අධිෂ්ඨානය කළ කාලය එහි වැඩසිටිනවා. මොනම අපහසුතාවක්‌ , ගැටලුවක්‌, නොසලකාහැරීමක්‌, පැමිණියත් හැරෙන්නේ නැහැ. ආපසු එන්නේ නැහැ. ඕනෑම අපහසු තැනක්‌ තුළ, මගේ පාඩුවේ මම වැඩ සිටිනවා. මෙතැන තමයි කුටියක්‌ ආරණ්‍යයක්‌ තෝරා ගැනීමේදී භික්ෂුවගේ ස්‌වභාවය වුණේ.
භික්ෂුව පැවිදි භූමියට පත් වූයේ වයස අවුරුදු 44 දී. ඒ හේතුව නිසාම ආරණ්‍ය ජීවිතයේදී කටුක අත්දැකීම් භික්ෂුව ලබලා තියෙනවා. භික්ෂුව කොතැන ගියත් මුකුත්ම නොදන්න කෙනෙක්‌ හැටියටයි හැසිරුණේ. දන්නා බවක්‌ පෙන්වන්න ගියේ නැහැ. භික්ෂුවට මතකයි එක ආරණ්‍යයකදී පිංවත් ස්‌වාමින්වහන්සේ නමක්‌ කියනවා මේ හාමුදුරුවො වැඩිය කතා කරන්නෙත් නැහැ. මුහුණ දෙන්නෙත් නැහැ. සිවුරු හැරලා යන්නද කොහෙද හදන්නේ කියලා. තැනකට ගිහිල්ලා එතන චරිතයක්‌, වීරයෙක්‌ වෙන්න නොවේ අපට අවශ්‍යය. අපේ නිවීමේ අරමුණ ඉටු කොට ගන්නයි.
භික්ෂුවට මතකයි එක ආරණ්‍යයක වැඩසිටිනකොට එහි සාමනේර ස්‌වාමින්වහන්සේලා දහනමක්‌ පමණ වැඩසිටිය. මේ අය ටිකක්‌ දඟකාරයි. මේ ආරණ්‍යයේ සැමදාම රාත්‍රී 7.00 ට වන්දනාව තිබෙනවා. භික්ෂුව සාමනේර අවධියේ හැමදාම වන්දනාවේ යනවා. වන්දනාව අවසානයේ පැය 1/2 ක භාවනාවක්‌ තිබෙනවා. භික්ෂුව ඇස්‌ දෙක පියාගෙන භාවනා කළා. මේ බුදු මැදුරේ මදුරුවන් සිටින නිසා, මදුරු දඟර පත්තුකොට තිබෙනවා. භික්ෂුව භාවනා කරමින් සිටින කොට, භික්ෂුවට දැනෙනවා යමෙක්‌ මගේ නාසයට මදුරු කොයිල් දුම අල්ලනවා කියලා. මදුරු කොයිල් දුම මොළය විනිවිද යනවා. ඒත් භික්ෂුව ඇස්‌ දෙක ඇරියේ නැහැ. ඒ සාමනේර හිමිවරු ඒ ක්‍රියාව කරලා හිනා වුණා. ඒ අය අදටවත් දන්නේ නැහැ ඒ අය කරපු ඒ ක්‍රියාව භික්ෂුව දන්නවා කියලා. තවත් දවසක භික්ෂුව භාවනා කරනකොට, සාමණේර හාමුදුරුනමක්‌ භික්ෂුව පිටිපසට ඇවිත් හිසට ඉහළින් ඇඟිලි පහ දික්‌කරලා, භික්ෂුවට අං ඇවිල්ල කියලා පෙන්නලා, අනෙක්‌ සාමනේර හිමිවරු සමග එම විහිළුවට සිනාසුණා. ඒත් භික්ෂුව ඇස්‌ දෙක ඇරියේ නැහැ. ඒ අය තාම දන්නේ නැහැ, ඒ අය කරපු විහිළුව භික්ෂුව දන්නවා කියලා. තවත් ආරණ්‍යයකදී භික්ෂුව දවල් දානය බෙදා ගන්න දානශාලාවට නියමිත වේලාවට වැඩියාම, දානය සියල්ලම පාත්‍රවලට බෙදලා අවසන් කරලා. මට බෙදාගන්න දානය මේසය මත තිබුණේ නැහැ. බත් බේසමේ බත් දංකුඩ තිබුණා. වම්බටු ව්‍යංජනය තිබූ භාජනයේ වම්බටු ටිකක්‌ තිබුණා. මම ඒ ටික සතුටින් බෙදා ගත්තා. දානේ ශාලාවේ දොරකඩින් පාත්‍රය රැගෙන එළියට එනකොට එම ක්‍රියාව සිදු කළ සාමනේර හාමුදුරුවො මගෙන් අහනවා, අද හාමුදුරුවන්ට දානේ නැහැ නේද කියලා. ඒ වෙලාවේ භික්ෂුව ප්රකාශ කළේ, මම වළඳලා තිබෙන දානයත් එක්‌ක. මේ දානය රාජ භෝජනයක්‌ය කියලා. එහෙම කරලත් භික්ෂුව ගැටුණේ නැහැ. මෙවැනි නුසුදුසු තැනුත් භික්ෂුව , සුදුසු තැනක්‌ බවට පත් කොටගෙන ජීවත් වුණා. මේ සෑම ක්‍රියාවක්‌ම භික්ෂුව ධර්මය හැටියටයි දැක්‌කේ. ධර්මය සමඟ ගැටෙන්න ගියේ නැහැ. සංසාරයේ අපිම කරපු දේවල්, අපි පස්‌සෙන් එනවිට, අපි ඒවා සතුටින් පිළිගන්න ඕනේ. නුසුදුසු තැනක්‌ අපට ලැබුණාය කියන්නේ එය අපේ අකුසල් සංස්‌කාරයන් විපාකදීමක්‌. මෙය අපේම, අකුසල් සංස්‌කාරයක්‌ බව දකින්න දක්‍ෂතාවය තිබෙනවා නම්, අකුසල් නිසා අපි තව තව සුදුසු තැන් සොයමින් ඇවිදින්නේ නැහැ. මොකද අපි සංසාරයේ පැවිදි වෙලා අපේම තැන්වල අපි වැඩසිටිනකොට, අනෙකුත් ස්‌වාමීන් වහන්සේලාට අපි අනේකවිධ බාධාවන් සිදු කොට තිබෙනවා. මේ අකුසල් විපාකයනුයි අපේ පසුපස විපාකය පිණිස පැමිණෙන්නේ. මේ බාධාවන්ම කමටහන් කොටගෙන ධර්ම මාර්ගය ශක්‌තිමත් කොට ගන්න දක්‍ෂවෙන්න.
ඉදිරිපත් කිරීම - ඉන්ද්‍රජිත් සුබසිංහ
http://www.divaina.com/2015/04/05/feature05.html
ඉරාකයේ අයිසිස්‌ ත්‍රස්‌තයන්ගේ පාලනයේ පවතින මොසුල් නගරයේ ජනතාවට අන්තර්ජාලය භාවිතා කිරීම සහ රැවුල කැපීම තහනම් කර ඇත. මේ හැර පිහිනුම් තටාකවල පිහිනීමද තහනම් කර තිබේ. මොසුල් නගරයේ ජනතාවට දිනකට විදුලිය සැපයෙන්නේ පැය බාගයක්‌ පමණි. මෙලෙස දැඩි නීතිරීති පැනවීම නිසා නගරවාසීන් රැසක්‌ වෙනත් ප්‍රදේශවලට පැන ගොස් ඇත.
අයිසිස්‌ ත්‍රස්‌තයන්ගේ ප්‍රධාන කේන්ද්‍රස්‌ථානය මොසුල්ය.
http://www.divaina.com/2015/04/01/forign04.html
Pic
Source
නොමිලේ රැහන් රහිත අන්තර්ජාල පහසුකම් (වයි-ෆයි) ලබාදීමේ පළමු අදියර ලබන සඳුදා (30දා) කොළඹ කොටුව දුම්රිය ස්‌ථානයෙන් ආරම්භ කරනු ලැබේ.
ඒ අනුව ලබන සඳුදා (30දා) පෙරවරු 9.30ට කොළඹ කොටුව දුම්රිය ස්‌ථානය අසලදී අගමැති රනිල් වික්‍රමසිංහ මහතාගේ ප්‍රධානත්වයෙන් නොමිලේ වයි-ෆයි ලබාදීමේ පළමු අදියර ආරම්භ කෙරේ.
මීට අමතරව රටේ තෝරාගත් ස්‌ථාන දහසක පමණ මෙම වයි-ෆයි කලාප ස්‌ථාපිත කරනු ලබයි.
විශ්වවිද්‍යාල, වෙනත් වෘත්තීය අධ්‍යයන ආයතන, ප්‍රධාන පෙළේ දුම්රිය ස්‌ථාන, බස්‌නැවතුම්පළවල්, සියලුම ශික්‍ෂණ, දිස්‌ත්‍රික්‌ හා ඒ ශ්‍රේණියේ මූලික රෝහල්, මහජන උද්‍යාන, මහජන පුස්‌තකාල, මහජනයා බහුල ලෙස පැමිණෙන රජයේ කාර්යාල, දිස්‌ත්‍රික්‌ ලේකම් කාර්යාල හා කෞතුකාගාර ආදී ස්‌ථානවල මෙම වයි-ෆයි කලාප විවෘත කිරීමට නියමිතය.
ප්‍රභාත් විතාන
http://www.divaina.com/2015/03/28/news04.html
Pic
Source
සබැඳි ලිපි -
[
සඳුදා සිට නොමිලේ ‘වයි ෆයි‘ - ලබා දෙන ප්‍රදේශ මෙන්න...http://denethharinna.blogspot.com/2015/03/blog-post_72.html
]
අන්තවාදී පිරිස්‌වල ක්‍රියාවන් හේතුවෙන් නැගෙනහිර මුහුදේ මසුන් අල්ලන සංක්‍රමණික දකුණේ ධීවරයන් විශාල පිරිසක් දැඩි දුෂ්කරතාවකට මුහුණ දී ඇතැයි වාර්තා වේ.
ධීවර පවුල් 400 - 500 ත් අතර ප්‍රමාණයකට නැගෙනහිර මුහුදේ මසුන් ඇල්ලීමට ඉඩ නොදීම නිසා මෙම තත්ත්වය හට ගෙන ඇතැයි සඳහන් වේ.
කාලයක්‌ තිස්‌සේ හලාවත හා මීගමුව ප්‍රදේශවල සංක්‍රමණික සිංහල ධීවරයන් නැගෙනහිර මුහුදේ මසුන් ඇල්ලූ බවත්, දැනට දින කිහිපයක්‌ තිස්‌සේ නැගෙනහිර ක්‍රියාත්මක අන්තවාදී පිරිස්‌වල විරෝධතා හේතුවෙන් ධීවර කටයුතුවල නිරත වීමට හැකියාවක්‌ නැති බවත් ධීවරයෝ පවසති.
ජාතිවාදය මතු කරමින් නැගෙනහිර ක්‍රියාත්මක ඇතැම් අන්තවාදී පිරිස්, රජයේ ප්‍රබල මුස්ලිම් හා දෙමළ ජාතික සන්ධාන මන්ත්‍රීවරුන් මෙන්ම ප්‍රාදේශීය දේශපාලනඥයන් ද මෙම විරෝධය පිටුපස සිටින බව සඳහන් කරන ධීවරයෝ කාලයක්‌ තිස්‌සේ කරගෙන යන ධීවර රැකියාව දැන් කරගෙන යැමට නොහැකි තත්ත්වයක්‌ මතුව ඇතැයි ද සඳහන් කරති.
ත්‍රිකුණාමය දිසාපති හා ධීවර අධ්‍යක්‍ෂවරයා ඉවත් කරන ලෙසට ඉල්ලා මෙම අන්තවාදී පිරිස් උද්ඝෝෂණ ව්‍යාපාරයක නිරතව සිට ඇතැයි ද සඳහන් වේ.
නැගෙනහිර මුහුදේ මසුන් අල්ලමින් සිටි සංක්‍රමණික ධීවරයන්ගේ බෝට්‌ටුවකට ද ගිනි තබා විනාශ කිරීමට මෙම අන්තවාදී පිරිස් පසුගියදා පියවර ගෙන තිබිණි.
කෙසේ නමුත් ත්‍රිකුණාමලය දිසාපති, ප්රදේශයේ ධීවර අධ්‍යක්‍ෂ ඇතුළු ධීවර සංගම් එක්‌ව කළ සාකච්ඡාවකින් පසුව ධීවර යාත්‍රා 48 කට නැගෙනහිර මුහුදේ මසුන් ඇල්ලීම සඳහා අවසර ලබාදී ඇති අතර, යාත්‍රා 10 කට නීත්‍යානුකූලව අවසර ලබා දීමට පියවර ගෙන ඇත.
නැගෙනහිර ක්‍රියාත්මක මෙම අන්තවාදී පිරිස්‌වලට එරෙහිව පියවර ගන්නා ලෙසට ඉල්ලමින් හලාවත හා මීගමුව යන ප්‍රදේශවල ධීවරයන් උද්ඝෝෂණ ව්‍යාපාරයක ද නිරතව ඇත.
ලසිත දුමින්ද - සමන් මල්ලවආරච්චි
http://www.divaina.com/2015/03/28/provin.html
Pic
Source
සබැඳි ලිපි -
[
බෝට්‌ටු ගිනි තබා සංචාරක ධීවරයන් පන්නා දැමූ මූසලු අන්තවාදයේ ත්‍රීකුණාමලයේ අවනඩුවhttp://denethharinna.blogspot.com/2015/03/blog-post_8.html
]
ශ්රී ලංකා යුද හමුදා ඉතිහාසයට නව පිටුවක්‌ එක්‌කරමින් ප්‍රථම වරට යුද හමුදා නිලධාරියකු වෙත ෆීල්ඩ් මාර්ෂල් නිලය ප්‍රදානය කිරීම පසුගියදා සිදුවිය.
මෙතෙක් මෙරට යුද හමුදා නිලධාරියකු දරන ඉහළම නිලය ලෙස තිබූ ජෙනරාල් නිලය අභිබවා ප්‍රථම වරට ෆීල්ඩ් මාර්ෂල් නිලයෙන් පිදුම් ලැබූ සරත් ෆොන්සේකා ලොව සිටින සීමිත ෆීල්ඩ් මාර්ෂල්වරුන් කීපදෙනා අතරට පැමිණියේ ශ්රී ලංකාවට ගෞරවයක්‌ සහ කීර්තියක්‌ද අත්කර දෙමිනි.
එතෙක්‌ තරු හතරේ ජෙනරාල් නිලය දරමින් සිටි ජෙනරාල් සරත් ෆොන්සේකාට තරු පහේ ෆීල්ඩ් මාර්ෂල් නිලය පිරිනැමීම එක්‌තරා ආකාරයක ආන්දෝලනාත්මක සිදුවීමක්‌ බවට ද පත්විය.
ඇතැමුන් එයට දේශපාලන මුහුණුවරක්‌ දීමටද උත්සාහ දැරූහ. එමෙන්ම එයින් ත්‍රිවිධ හමුදා අතර ප්‍රශ්නයක්‌ ඇති කිරීමට ද ඇතැමුන් කටයුතු කළහ. ඒ නාවික හා ගුවන් හමුදාවේ හිටපු හමුදාපතිවරුන් වන වයිස්‌ අද්මිරාල් වසන්ත කරන්නාගොඩට සහ එයාර් චීප් මාර්ෂල් රොෂාන් ගුණතිලකටද ෆීල්ඩ් මාර්ෂල් නිලයට සමාන නිල පිරිනැමිය යුතු බව පවසමිනි.
ජෙනරාල් සරත් ෆොන්සේකාට ෆීල්ඩ් මාර්ෂල් නිලය හිමිවීම සැබැවින්ම එක්‌තරා දෛවෝපගත සිදුවීමක්‌ ලෙස ද සැලකිය හැක.
තිස්‌ වසරක ශාපකාරී කුරිරු යුද්ධය තුන් වසරක කෙටි කාලයකින් අවසන් කර ඓතිහාසික යුද විජයග්‍රහණයත්, රටට සම්පූර්ණ නිදහසක්‌ ලබාදීමට ප්‍රමුඛ යුද නායකත්වය දුන් එවක හිටපු යුද හමුදාපතිවරයා වූ ලුතිනන් ජෙනරාල් සරත් ෆොන්සේකා ජෙනරාල් නිලයට උසස්‌වී කෙටි කලකින් එම නිලය පමණක්‌ නොව සියලුම යුදමය තත්ත්වයන් අහිමි වී නිකම්ම නිකං සරත් ෆොන්සේකා බවට පත්විය.
ඔහුගේ නිලයන් සියල්ල අහිමිකර ඔහුගේ නම ඡායාරූප පවා යුද හමුදා මූලස්‌ථානය ඇතුළු සියලුම හමුදා කඳවුරුවලින් ඉවත් කෙරිණි. යුද විජයග්‍රහණයට අදාළ උත්සවවලදී ඔහුගේ නම පවා ප්රකාශ කිරීම තහනම් විය. සමරු කලාප, ලිපි ලේඛන ආදියෙහිද ඔහුගේ නම සඳහන් කිරීමට ඉඩක්‌ නොවීය.
කොටින්ම 2005 - 2009 කාලයේ ශ්රී ලංකා යුද හමුදාවට යුද හමුදාපතිවරයකු නොසිටියේ සේ කටයුතු සිදුකෙරිණි. යුද හමුදාව එසමයේ යුද්ධය කර ඇත්තේ යුද හමුදාපතිවරයකු සහ යුද නායකත්වයයවක්‌ නොමැති ඕපපාතික තත්ත්වයක්‌ තුළ බව සිතෙන අයුරින් ජෙනරාල් ෆොන්සේකාගේ නාමය යුද හමුදාවෙන් මකා දමන ලදී.
යුද්ධයට අදාළ වීඩියෝපට, ඡායාරූප ඔහු නොමැති ඒවා තෝරා ප්‍රචාරය කළේය. කොටින්ම සරත් ෆොන්සේකා වැනි කෙනෙක්‌ යුද හමුදාවේ කවදාවත් සිටියේම නැති ලෙසට සියලු කටයුතු සිදුවිය.
මෙහිදී සිදුවූ තවත් එක්‌තරා සිදුවීමක්‌ සිහියට නැගේ. එය මීට අදාළ නිසා සටහන් කරමි.
2010 සිට 2014 දක්‌වා කාලයේ පැවැති යුද හමුදා සංවත්සරයනට අදාළ විශේෂ ලිපියක්‌ මවිසින් වාර්ෂිකව 'දිවයින' පුවත්පතේ පළකිරීමට කටයුතු කළ අතර ඒ සඳහා හමුදා ඉතිහාසයට අදාළ තොරතුරු සටහනක්‌ යුද හමුදා ජනමාධ්‍ය අංශයෙන් ගෙන්වා ගතිමි. සෑම වසරකම එවූ එම සටහනෙහි ජෙනරාල් සරත් ෆොන්සේකාගේ නම නොවීය. අංක 01 සිට පිළිවෙළින් හිටපු යුද හමුදාපතිවරුන්ගේ නම් ඇතත් අංක 18 ක් සහ ඒ යටතේ හමුදාපතිවරයකුගේ නමක්‌ද නොවීය. 17 ට පසු ඇත්තේ 19 වැනි හමුදාපතිවරයාගේ නමයි.
නමුත් මේ කරුණ මේ මගේ සිත් ගත්තේ නැත. මා ලිව් සෑම ලිපියකටම හමුදා ලේඛනයේ නැති අංක 18 ට අදාළ යුද හමුදාපති වශයෙන් ජෙනරාල් සරත් ෆොන්සේකාගේ නම සඳහන් කිරීමට මම වග බලා ගතිමි.
එසේ මකා දමා තිබූ ඒ නාමය නැවත හමුදා ඉතිහාසයේ ලියෑවී දෛවෝපගත ආන්දොලනාත්මක ලෙස ඔහුට ෆීල්ඩ් මාර්ෂල් නිලයද හිමිවිය. අහිමි කළ ජෙනරාල් නිලය ද ආපසු හිමිවී, ඉන් නොනැවතී මෙරට යුද හමුදාවේ ප්‍රථම ෆීල්ඩ් මාර්ෂල්වරයා ලෙස ඉහළම තැනට ඒමට වරම් හිමිකර දීමට තරම් සරත් ෆොන්සේකා සෙන්පතිඳුන්ගේ දෛවය ඔහුට බොහෝ කාරුණික විය.
මේ අතර යුද හමුදාවට කාලයක පටන් බලපෑ ප්‍රධාන ප්‍රශ්නයකට එක්‌තරා විසඳුමක්‌ ලබාදීමට ජනාධිපති මෛත්‍රීපාල සිරිසේන මහතා විසින් සේනාධිනායකයා ලෙස වැදගත් පියවරක්‌ ගෙන ඇත.
ඒ නිවාඩු නොමැතිව සේවය හැරගොස්‌ සිටින යුද හමුදා සෙබළුන්ට හා නිලධාරීන්ට නිත්‍යනුකූලව සේවයෙන් අස්‌වීම සඳහා පොදු සමා කාලයක්‌ ප්‍රකාශයට පත්කිරීමයි.
මෙම පැනගොස්‌ සිටින සෙබළුන්ගේ ප්‍රශ්නය දෙස මානුෂිකව හා සංවේදීව බලා එම සෙබළුන්ට ගෞරවාන්විතව සේවයෙන් අස්‌වී සමාජය වෙත ගොස් නිදහසේ ජීවත්වීමට වැඩපිළිවෙළක්‌ ක්‍රියාත්මක කරන ලෙස ජනාධිපතිවරයා අවධානයෙන් යුතුව උපදෙස්‌ දී ඇත.
ඒ අනුව යුද හමුදාපති ලුතිනන් ජෙනරාල් ක්‍රිශාන්ත ද සිල්වාගේ මෙහෙයවීම මත සාර්ථක වැඩපිළිවෙළක්‌ සකස්‌කර අප්‍රේල් 02 වැනිදා සිට 16 වැනිදා දක්‌වා ක්‍රියාත්මක කිරීමට නියමිතව ඇත.
ඒ අනුව මේ වන විට 41,330 ක් වන නිවාඩු නොමැතිව සේවය හැර ගොස් සිටින හමුදා සාමාජිකයන් පිරිසකට නීත්‍යනුකූලව අස්‌වීමට මහඟු අවස්‌ථාවක්‌ හිමිවී ඇත.
නිවාඩු නොගෙන සේවයට නොපැමිණෙන අයවලුන් අස්‌කිරීමේ පිළිවෙළට අනුව සිදුකෙරෙන වර්ග කිරීම්
1. යුද්ධ හමුදාව වෙත කිසිදු මුදලක්‌ ගෙවීමට නොමැති සහ අස්‌කිරීම් සඳහා නීතිමය බාධාවක්‌ නොමැති අයවලුන්
2. කිසිදු නීතිමය බාධාවක්‌ නොමැති ඒකක අනිවාර්ය ඉතිරිකිරීම්, යුහ යහ සාධක අරමුදල සහ සුවසහන වෛද්‍ය යෝජනා ක්‍රමයේ ඇති ඉතිරි මුදලින් යුද්ධ හමුදාව වෙත ගෙවිය යුතු මුදල් පියවා ගැනීමට හෝ ඇපකරුවන්/ළඟම ඥාතීන්ගෙන් අයකිරීම සිදුකර අස්‌කිරීමට හැකියාවක්‌ ඇති අයවළුන්
3. නීතිමය චෝදනා නොමැති ඒකක අනිවාර්ය ඉතිරි කිරීම්, යුද යහ සාධක අරමුදල සහ සුවසහන අරමුදලින් හෝ වෙනත් ඉතිරි කිරීම් මුදලින් යුද්ධ හමුදාව වෙත ගෙවිය යුතු මුදල් පියවා ගැනීමට හෝ ඇපකරුවන්/ළඟම ඥාතීන්ගෙන් අයකර පියවා ගැනීමට කටයුතු කර තවදුරටත් රු. 50,000.00 ට වඩා නොවැඩි රජය වෙත හෝ යුද්ධ හමුදාව වෙත මුදල් අයවීමට ඇති අයවලුන්ගේ එම අයකිරීම් කපාහැර ඔවුන් යුද්ධ හමුදාව වෙතින් අස්‌ කිරීමට කටයුතු කිරීම
4. නීතිමය ගැටලු ඇති විනය කඩකිරීම්වලට ලක්ව වංචා, දූෂණ/අක්‍රමිකතා, සාපරාධී ක්‍රියාවන්ට සම්බන්ධ අයවලුන් පවතින නීතිමය ප්‍රතිපත්තීන්ට අනුව ක්‍රියාකර යුද්ධ හමුදාවෙන් අස්‌කිරීම
මේ පිළිබඳව අදහස් දැක්‌වූ යුද හමුදා මූලස්‌ථානයේ විධායක ජෙනරාල් මේජර් ජෙනරාල් මහින්ද හතුරුසිංහ කියා සිටියේ පොදු සමා කාලයේ පැමිණෙන සෙබළුන් රඳවා තබා ගැනීමත් හෝ දඬුවම් ලබාදීමක්‌ සිදු නොකරන බැවින් කිසිදු බියක්‌ සැකක්‌ නොමැතිව පැමිණෙන ලෙස දන්වා සිටින බවයි.
මෙම පොදු සමා කාලයේ නොපැමිණෙන සෙබළුන් අත්අඩංගුවට ගෙන නීතිමය දඬුවම් ලබාදීමට ක්‍රියාකරන බවද මේජර් ජෙනරාල් හතුරසිංහ අවධාරණය කළේය.
සිරිමෙවන් කස්‌තුරිආරච්චි
http://www.divaina.com/2015/03/28/feature02.html
සබැඳි ලිපි -
[
තරුවක්‌ වටා පළඳන තරු පහ... ෆීල්ඩ් මාර්ෂල්, මාර්ෂල් ඔෆ් ද ෆිලීට්‌, මාර්ෂල් ඔෆ් ද එයාර් ෆෝර්ස්‌http://denethharinna.blogspot.com/2015/03/blog-post_23.html
]
.jpg)
.jpg)
