සිරිපා මළුව අලෝකවත් කිරීම පිණිස අඩු වෝල්ටීයතාවකින් යුත් විශේෂ විදුලි පහන් පද්ධතියක්‌ සැකසේ.
ශ්‍රී පාදස්‌ථානාධිපති බෙංගමුවේ ධම්මදින්න නාහිමියන්ගේ පූර්ණ අනුශාසනා මත මෙම විදුලි පද්ධතිය පිහිටුවීමට නියමිතය.
විදුලි බල මණ්‌ඩලයේ ඉංජිනේරුවන්ගේ උපදෙස්‌ මත මෙම විදුලි බල පද්ධතිය සැකසේ. මෙම අඩු වෝල්ටීතාව කින් යුත් විදුලි බල පද්ධතිය මගින් කුඩා කෘමියකුට පවා පීඩාවක්‌ නොවන බව පැවසේ. මෙම කාර්යය විදුලි බල හා බල ශක්‌ති ඇමැතිනි පවිත්‍රා වන්නිආරච්චි මහත්මියගේ උපදෙස්‌ හා නිර්දේශ මත සිදුකෙරේ.
ලකී වෛද්‍යසේකර - අම්බලන්තොට අතිරේක
http://www.divaina.com/2014/01/01/provin05.html
Pic
Source
කරන්දෙණිය ප්‍රාදේශීය ලේකම් කොට්‌ඨාසයේ පසුගිය වසර තුළ කාන්තාවන් දෙදහසක්‌ විදේශගත වී ඇති අතර මෙසේ විදේශගත වන කාන්තාවන්ගෙන් සියයට අසූවකගේ පවුල් ජීවිත අසාර්ථක බැව් කරන්දෙණිය ප්‍රාදේශිය ලේකම් සම්පත් සමරකෝන් මහතා ඉකුත්දා පැවැසීය.
ඒ මහතා මේ අදහස්‌ පළ කළේ පසුගියදා ගාල්ල අතිරේක දිසාපති මාලනී ලොකුපෝතාගම මහත්මියගේ ප්‍රධානත්වයෙන් පැවැති ගාල්ල දිස්‌ත්‍රික්‌ ළමා සංවර්ධන කමිටුවේදී අදහස්‌ දක්‌වමිනි.
මෙහිදී වැඩිදුරටත් අදහස්‌ දැක්‌වූ සම්පත් සමරකෝන් මහතා මෙසේද පැවැසීය.
කරන්දෙණිය ප්‍රාදේශීය ලේකම් කොට්‌ඨාසයේ තියෙන බරපතළම සමාජ ප්‍රශ්නය තමයි කාන්තාවන් විදේශගතවීම. අපි මොනතරම් මෙම තත්ත්වය අවම කිරීමට උත්සාහ කළත් මෙම කාන්තාවන් විදේශගතවීම පාලනය කිරීමට අපහසු වෙලා තියෙනවා.
පසුගිය වසර තුළ කාන්තාවන් දෙදහසක්‌ පමණ විදේශගත වෙලා තියෙනවා. මෙසේ විදේශගත වන කාන්තාවන්ගේ පවුල්වලින් සියයට අසූවක්‌ අසාර්ථක තත්ත්වයේ තියෙන්නේ.
මේ තත්ත්වය ප්‍රදේශයේ තිබෙන දැවැන්ත ප්‍රශ්නයක්‌. සමහර කාන්තාවන් ඉන්නවා වාර අටකට විදේශගතවූ. නමුත් ඔවුන්ගේ ආර්ථිකය යහපත් වෙලත් නෑ. විදේශගත වුණාට ඔවුන් හිටපු තැනට වඩා ඉහළ ලොකු දියුණුවක්‌ ලබලත් නෑ.
බොහෝ වෙලාවට කාන්තාවන් රට යන්නේ අතරමැදියන් මගින්. ඒ නිසා මේ අයගේ මුදල් සූරා කෑමද සිදුවෙනවා. අපි නිරන්තරයෙන් උත්සාහ කරනවා මේ විදේශගත වීම් පාලනය කරන්න. නමුත් ටික දවසකින් දැනගන්න ලැබෙනවා රට ගිහින් කියලා.
ගාල්ල අතිරේක දිසාපති මාලනී ලොකුපෝතාගම මහත්මිය - ඇත්තටම කරන්දෙණියේ තියෙන ඔය කියන තත්ත්වය බරපතළ ප්‍රශ්නයක්‌. ඇයි මේ අය විදේශගත වන්නේ කියල සොයලා බලලා ප්‍රශ්නයට විසඳුම් සෙවීමට කටයුතු කරන්න.
ගාල්ල - එස්‌. කේ. කළුආරච්චි, ලලිත් චාමින්ද
http://www.divaina.com/2014/01/01/provin04.html
ශ්‍රී ලංකාවේ ප්‍රවීණ චිත්‍රශිල්පී කලාසූරී ජයසිරි සේමගේ තමාගේ ඒක පුද්ගල චිත්‍ර ප්‍රදර්ශනයක්‌ වරක්‌ ස්‌වීඩනයේ දී පැවැත්විණි. එක්‌ වයසක කාන්තාවක්‌ දිගු කබායක්‌ පොරවාගෙන සීතලෙන් ගැහි ගැහී ප්‍රදර්ශනය නැරඹීමට පැමිණියාය. "කරුණාව" මැයෙන් චිත්‍රයක්‌ මිලට ගැනීමට තිබෙනවාදැයි කියා මිල ගණන් කොපමණ දැයි කියාත් ඇය සේමගේ ගෙන් විමසුවාය. ශ්‍රී ලංකා මුදලින් රු. ලක්ෂයක් පමණ වන බව සේමගේ ඇයට කීවේය. කෙසේ හෝ මෙම චිත්‍රය මිලට ගැනීමට අවශ්‍යම බවත් ඇය පැවසූ විට, චිත්‍ර ශිල්පියාගේ සිතද උණුවී චිත්‍රය ඇයට කියූ මුදලට වඩා අඩුවට දීමට පොරොන්දු වීය. ඇයට මෙම චිත්‍රයම මිලට ගැනීමට ඇති වුවමණාව කුමක්‌දැයි ඇගෙන් ඇසූවිට කීවේ, "මම මීට වසර පහකට පමණ පෙර ශ්‍රී ලංකාවට ගියා. එහිදී ජයසිරි සේමගේ නම් සුප්‍රකට චිත්‍ර ශිල්පියාගේ චිත්‍ර ප්‍රදර්ශනයක්‌ නරඹන්නට ගියා, මගේ සිත තදින්ම ඇලී ගියේ මේ "කරුණාව" නමැති චිත්‍රයටයි. මම එය මිලට ගත්තා. මම ඒ චිත්‍රයට කෙතරම් ආදරේදැයි කියතොත් බිත්තියේ එල්ලා නරඹමින් රස විඳිනවා. ඒ අතරතුර මගේ සොයුරිය ඒ චිත්‍රය සොරකම් කරගෙන ගොස්‌ ඇය මහලු නිවාසයකට යන විට ඒ චිත්‍රයද රැගෙන ගියා. ඇය එහිදී මිය ගියා. දැන් ඒ චිත්‍රයට මොනවා වුණා දැයි මම දන්නේ නැහැ" යි ඇය පැවසුවාය.
මෙම "කරුණාව" නමැති චිත්‍රයේ නැවත අඳින ලද චිත්‍රයක්‌ද ඇතුළත් කලාසූරී ජයසිරි සේමගේ ගේ චිත්‍ර ඇතුළත් ප්‍රදර්ශනයක්‌ මෙම ජනවාරි මස 3, 4, 5 දිනවල මහනුවර "කැන්ඩි සිටි සෙන්ටර්" හි පැවැත්වෙනු ඇත. මීට තවත් චිත්‍ර ශිල්පීහු රැසක්‌ සහභාගි වෙති.
http://www.divaina.com/2014/01/01/news11.html
ජිනීවා මානව හිමිකම් සමුළුවේදී බටහිර රටවල් විසින් ශ්‍රී ලංකාවට එරෙහිව ඉදිරිපත් කෙරෙන යෝජනාවට විරුද්ධව රුසියාව කොන්දේසි විරහිතව සහාය දක්‌වන බව රුසියානු ආරංචි මාර්ග පවසයි.
කොන්දේසි රැසක්‌ මත රුසියාව විසින් ශ්‍රී ලංකාවට සහාය දක්‌වන බවට දියත් වී ඇති ප්‍රචාරය රුසියානු බලධාරීන් ප්රතික්ෂේප කර තිබේ.
රුසියානු ජනාධිපති වැලඩමිර් පුටින් මහතා රුසියාවේ ස්‌ථාවරය දැනටමත් ප්‍රකාශ කර ඇත.
ඇමරිකාව ප්‍රමුඛ බටහිර රටවල උපදෙස්‌ පිළිපැදීමට රුසියාව සූදානම් නැතැයි එම ආරංචි මාර්ග කියා සිටී.
වන්නි මෙහෙයුම සමයේ රුසියානු රජය ශ්‍රී ලංකාවට සහාය දක්‌වා ඇත.
මෙවර 2014 මානව හිමිකම් කවුන්සිලයේ සාමාජික රටවල් අතරට රුසියාව, චීනය, වියට්‌නාමය, කියුබාව යන රාජ්‍යයන්ද එක්‌වී ඇත.
කීර්ති වර්ණකුලසූරිය
http://www.divaina.com/2014/01/01/news05.html
මසුන් ඇල්ලීම සඳහා දියඹට යන සියලු ධීවරයන්ට ආරක්‍ෂිත කබා පැළඳීම අද (01 වැනිදා) සිට අනිවාර්ය කර ඇත. ධීවර ජලජ සම්පත් පනතෙහි සඳහන් නීති රීති යටතේ කබා නොපළඳින ධීවරයන්ට දඬුවම් ලබාදෙන බව ධීවර හා ජලජ සම්පත් අමාත්‍යාංශයේ ප්‍රකාශකයෙක්‌ පැවැසීය.
1996 අංක 02 දරන ධීවර පනත, 2008.10.09 දින ප්‍රකාශයට පත් කළ ගැසට්‌ නිවේදනයට අනුව මෙම තීරණය වහාම ක්‍රියාත්මක වන අතර යම්කිසි ධීවර බෝට්‌ටු හිමිකරුවකුට මෙම නව නීතිය පිළිබඳ ප්‍රශ්න තිබේනම් ඒ පිළිබඳ ධීවර නිලධාරීන් සමග සාකච්ඡා කර ගැනීමට අවස්‌ථාව ලබාදී ඇතැයි ද එම ප්‍රකාශකයා කියා සිටියේය.
පසුගිය කාලයේදී ධීවරයින් අනතුරට පත්ව මිය යැම සැලකිල්ලට ගනිමින් අද (1 දා) සිට ධීවරයන්ට ආරක්‍ෂිත කබා පැළඳීම අනිවාර්ය කිරීමට ඇමැති රාජිත සේනාරත්න මහතා තීරණය කර ඇත.
මේ වන විට රජය මැදිහත් වී ධීවර යාත්‍රාවලට එක්‌ ආරක්‍ෂිත කබාය බැගින් පිරිනමා ඇති අතර යාත්‍රා හිමිකරුවන් විසින් අවශ්‍ය ඉතිරි කබා ධීවර කාර්මිකයන්ට ලබාදීමට පියවර ගත යුතු බවද අමාත්‍යාංශය පවසයි.
මේ වන විට බහුදින යාත්‍රා 4080 ක්‌ ද, කුඩා ධීවර යාත්‍රා 3773 ක්‌ ද ඇති අතර මෙම නව නීතිය සියලුම යාත්‍රාවල ධීවරයන්ට පොදු බවද එම ප්‍රකාශකයා කියා සිටියේය.
ශිරාන් රණසිංහ
http://www.divaina.com/2014/01/01/news07.html
ජගත් මෝටර් රථ තරග ධාවන ඉතිහාසයේ දක්‍ෂතම ක්‍රීඩකයකු ලෙසින් සැලකෙන මයිකල් ෂූමාකර් හදිසි අනතුරකට ලක්‌වීම හේතුවෙන් ඉතා අසාධ්‍ය තත්ත්වයෙන් පසුවන බව විදෙස් වාර්තා සඳහන් කරයි.
'ෆොමියුලා වන්' තරග ධාවන අංශයේ හත්වරක්‌ ලෝක ශූරයා බවට පත්ව 2012 දී ක්‍රීඩාවෙන් සමුගත් මේ වන විට 44 වැනි වියේ පසුවන මෙම ජර්මානු ජාතිකයා ප්‍රංශයේ ඇල්ෆ්ස්‌ කඳු ආශ්‍රිතව නිවාඩුවක්‌ ගතකරමින් හිම මත ලිස්‌සා යැමේ ක්‍රියාකාරකමක යෙදී සිටියදී මෙම අනතුරට මුහුණදී තිබේ.
සිය 14 හැවිරිදි පුත්‍රයා සමග මෙලෙස විනෝද වෙමින් සිටි ෂූමාකර් ලිස්‌සා ඇද වැටී හිස ගලක වැදීම හේතුවෙන් මේ තත්ත්වයට මුහුණ පා ඇත.
හිම මත ලිස්‌සා යැමට ඉතා රුචිකත්වයක්‌ දැක්‌වූ මෙම හිටපු ධාවන ශූරයා අදාළ අනතුරට මුහුණදුන් සැනින් ඉන් සැතපුම් 80 බටහිරට වන්නට පිහිටි රෝහලකට හෙලිකොප්ටරයක්‌ යොදාගනිමින් ගෙන යන ලදී.
හිස ගල මත වැදීමත් සමග ඔහු සිහි විෂඥ තත්ත්වයට පත්ව ඇති බව සිද්ධිය ඇසින් දුටු අය පවසා තිබේ.
මයිකල් ෂූමාකර්ව රෝහල් ගත කළ සැනින් මොළය පිළිබඳ ප්‍රධාන පෙළේ ශෛල්‍ය වෛද්‍යවරයෙක්‌ විසින් පරීක්‍ෂාවට ලක්‌කර ඇති අතර මොළයේ අභ්‍යන්තර ලේ වහනයක්‌ හේතුවෙන් ෂූමාකර්ගේ තත්ත්වය ඉතා බරපතළ බව ඔහු විසින් ප්‍රකාශ කර තිබුණි.
අනතුර සිදුවී විනාඩි 8ක්‌ තුළ වෛද්‍යාධාර සහිත හෙලිකොප්ටරය පැමිණ ඔහුව රැගෙන යන විටද ඔහුගේ හිස්‌ ආවරණය ඇතුළින් ලේ කාන්දු වෙමින් තිබූ බව පැවසේ.
කෙසේ වෙතත් හිම මත ලිස්‌සා යැම සඳහා යෝග්‍ය වන ලෙසින් සකසා ඇති පථයට පිටින් ඔහු මෙම ක්‍රියාකාරකමේ යෙදී තිබීම අනතුර මේ සා දරුණු වීමට හේතුව බව ඔහු සිය විවේකය ගත කළ අදාළ හෝටලයේ ප්‍රකාශකයකු පවසා තිබේ. අනතුර සිදුවන අවස්‌ථාවේ ඔහු හිස්‌ ආවරණ පැළඳ සිටීම, අනතුර සිදුවී කෙටි කලකින් රෝහල්ගත කිරීමට හැකියාව ලැබීම සහ අදාළ වෛද්‍ය ක්‍ෂේත්‍රයේ පුමඛ පෙළේ වෛද්‍යවරුන් වහා ඔහුට ප්‍රතිකාර පිණිස පැමිණීම ආදී හේතූන් මත ෂූමාකර්ගේ ජීවිතය මේ දක්‌වා ආරක්‍ෂා වුණිද ඔහු ජීවිතයත් මරණයත් අතර සටනක යෙදෙන බව අදාළ වාර්තාවල සඳහන් වේ.
http://www.divaina.com/2013/12/31/sports02.html
සබැඳි ලිපි -
[
ෆෝර්මියුලා ශූරතාව 7 වතාවක් දිනූ මයිකල් ෂූමාකර් හිම මත ලිස්සීමේදී හදිසි අනතුරකින් කෝමා තත්වයේ.. මොළයේ සැත්කමක්http://denethharinna.blogspot.com/2013/12/7.html
]
38 හැවිරිදි ඇන්ඩර්සන් සිල්වා යනු මිශ්‍ර සටන් කලා ක්‍ෂේත්‍රයේ එදා මෙදා තුර බිහි වූ අද්විතීය චරිතයකි. ඔහුගේ අත්දඬු - පාද යකඩ මෙන් සවිමත් විය. එහි ශක්‌තිය සැබැවින්ම දැනුණේ ඔහුගේ ප්‍රතිවාදියාටය. මේ සුපිරි ක්‍රීඩකයා සහභාගි වූ තරගයක්‌ පෙරේදා ලාස්‌ වේගාස්‌හී පැවැත්විණි. මිලියන ගණනක්‌ මිනිසුන් ලොව පුරා සජීවීව විකාශය කළ මේ තරගය නැරඹූහ. මෙහිදී ඔහුගේ ප්‍රතිවාදියා වූයේ ක්‍රිස්‌ වීඩ්මෑන්ය තරගය ක්‍රියාත්මක අතරවාරයේ අවස්‌ථාවකදී ඇන්ඩර්සන් සිය වම් පාදයෙන් ක්‍රිස්‌ට ජවාධික පහරක්‌ එල්ල කළේය. ක්‍රිස්‌ සිය පාදය යොදා එය ආවරණය කළේය. සිදුවූයේ කිසිවෙකුත් නොසිතූ දෙයකි.
ඇසිපිය හෙලන වාරයේ එම පහර එල්ල කළ සැනින් ඇන්ඩර්සන් දැඩි වේදනාවෙන් සිය පාදය අල්ලාගෙන බිම ඇදවැටුණි. සිදුව තිබුණේ කුමක්‌ද?
අදාළ පහරේ වේගය සමග එයට ආවරණයෙන් ලැබුණු ප්‍රතිරෝධය ඉදිරියේ ඇන්ඩර්සන්ගේ යකඩ දණ්‌ඩක්‌ මෙන් වූ පාදය ලා දණ්‌ඩක්‌ ලෙසින් කැඩී යාමයි.
මෙම සිද්ධියෙන් පසු එම සිදුවීමේ පුනර්රූපණය මන්දගාමී දර්ශන මගින් පෙන්වද්දී මොහොතකට පෙර ක්‍රීඩාව රස කරමින් බැලු සියල්ලන්ගේම මුහුණු ඇඹුල් විය. අනතුරක්‌ නැත්තේ කොතැනද? යදඬු වන් පාද සැනෙකින් බිඳී යා නම්... අප මේ දරා සිටින්නේ කොතැනදී, කොයි මොහොතකදී හෝ කැඩී බිඳී යන ශරීරයක්‌ම නොවේද? සිතන්න...
http://www.divaina.com/2013/12/31/sports03.html
හොඳට හෝ නරකට හෝ කිරිපිටි යනු අප රටට තවමත් පානයක්‌ පමණක්‌ නොවේ, ආහාරයක්‌ද වෙයි. එහෙයින් දියර කිරෙන් රට ස්‌වයංපෝෂිත නොවී ඇති තත්ත්වයක්‌ තුළ කිරිපිටි හිඟයක්‌ ඇතිවීම රටේ ළමා ලෝකයට බැමිණිටියා සාය ඇතිවීමක්‌ වැන්නකි.
දැන් ගමේ ගොඩේ කඩවල තබා නගරයේ සුපර් මාර්කට්‌ තුළවත් කිරිපිටි නැත. ඕනෑම කාලයක කඩයක හෝ සුපර්මාර්කැට්‌ටුවක හෝ දිග රාක්‌ක සරසවා ආඩම්බරයෙන් වැජඹෙමින් සිටි කිරිපිටි ටින් සහ පැකට්‌ටු මේසා ඉක්‌මනින් අතුරුදන් වූයේ කෙසේද?
එයට එක්‌තරා ආකාරයක පිළිතුරක්‌ සපයන අතරම, යම් පිළියමක්‌ද යෙදීමට උත්සාහ කරන අභ්‍යන්තර වෙළෙඳ හා පාරිභෝගික කටයුතු පිළිබඳ අමාත්‍යාංශය ප්‍රකාශ කරන්නේ තමන්, සැඟවූ කිරිපිටි තොග වැටලීම් නොකඩවා සිදුකරන බවය.
සැඟවූ කිරිපිටි තොග සොයා මේ නොකඩවා සිදු කෙරෙන වැටලීම්වලින් අල්ලාගත් එකදු කිරිපිටි පැකට්‌ටුවක්‌ තවමත් නැතත්, කිරිපිටි සමාගම්වල සියලුම ගබඩා පරීක්‍ෂා කරන ලෙසට තම පාරිභෝගික අධිකාරියේ නිලධාරීන්ට අදාළ අමාත්‍යවරයා කළ නියෝගය ඉතා වැදගත්ය.
එහෙත්, අමාත්‍යවරයා කොහොම සිතුවත් සාමාන්‍යයෙන් අප රටේ වැටලීම් සිදුවන්නේ වැටලීම් සිදුවන ස්‌ථානයට ඒ වැටලීම් සංවිධානය කරන ස්‌ථාන විසින් කළින් ඒ බව දැනුම් දෙන ලැබීමෙන් අනතුරුව නිසා කිසිවකුත් ඒවා "සීරියස්‌ ලෙස" භාරගන්නේද නැත.
කෙසේ වුවත් දැන් කිරිපිටි නැත. රාක්‌ක හිස්‌ ය. පොඩි උන්ගේ බඩවල් ද හිස්‌ ය.
මේ හිස්‌ බව නිර්මාණය කළ හිස්‌ මිනිසුන් හෙවත් කිරිපිටි සමාගම්, කිරිපිටි කිලෝවක්‌ රුපියල් දෙසිය පනහකින් ඉහළ දමන ලෙසට රජයෙන් ඉල්ලා සිටින්නේය. කිරිපිටි බොන රටේ දුප්පත් මිනිසුන්ට තමන් දැනදු ඉතා අපහසුවෙන් මිලදී ගන්නා කිරිපිටි පැකට්‌ටුවට තවත් වැඩිපුර දෙසිය පණහක්‌ ගෙවීමට වඩා වස ටිකක්‌ බීම ලාභය. සාමාන්‍යයෙන්, මනුෂ්‍යත්වය ගැන තබා තමන් බොහෝ කලක්‌ සුරැකි පාරිභෝගික ජනතාව පිළිබඳව වත් මෙලෝ හැඟීමක්‌ නැති දුෂ්ට බහුජාතික සමාගම් රෑනකට තම හිතුමතයට කටයුතු කිරීමට ඉඩ නොදීම මේ දුෂ්කර තත්ත්වයේදී රජයට ලකුණු ලැබෙන්නක්‌ වෙයි.
එහෙත්, මෙහිදී වැඩ වරද්දාගෙන සිටින්නේ ද රජයම මිස අනෙකකු නොවන බව කීමටද අපට සිදුවෙයි. බහු ජාතික සමාගම් මගින් මෙරටට ගෙන එනු ලබන කිරිපිටිවල මිනිස්‌ සිරුරට ඉතාම අයෝග්‍ය රසායනික ද්‍රව්‍ය අඩංගු යෑයි මහා කලබැගෑනියක්‌ සිදු වූ කාලයේ මිනිස්‌සු මොන අපහසුකම් මධ්‍යයේ වුවද ආනයනික කිරිපිටි පරිභෝජනයෙන් වැළකී සිටියහ. විය යුතු පරිද්දෙන්ම ඒ කාලයේ ශ්‍රී ලංකාවේ නිෂ්පාදනය කෙරෙන දියර කිරි පරිභෝජනයේ අගය නැවත නැවත ප්‍රකාශ කෙරුණු අතර දියර කිරි භාවිතා කිරීම පිළිබඳව මුළුමහත් සමාජයේම වූ එක්‌තරා එකඟතාවක්‌ද දැකිය හැකි විය.
බහුජාතික සමාගම් තම කිරිපිටි ව්‍යාපාරවලට එල්ල වූ රසායනික මිශ්‍රණ පිළිබඳ චෝදනා මොන සෙප්පඩ විඡ්ජාවකින් හෝ නිශේධනය කරගන්නා විට රජය කළේ යළිත් එම සමාගම් පාවඩ එළා පිළිගැනීමය. මෙය හරියට දූෂණ චෝදනා එල්ලවී රිමාන්ඩ් භාරයට පත්වන ප්‍රාදේශීය සභා සභාපතිවරයකු ඇප ලබා නිදහස්‌ වන විට මල් මාලා දමා පිළිගැනීමකට සමානය.
කුමන කාරණාවක්‌ නිසා හෝ ලෝක වෙළෙඳපළ සතු කිරිපිටිවලට හදිසි වැඩි ඉල්ලුමක්‌ ලැබීම තම නිත්‍ය පාරිභෝගික සමාජයක්‌ තඹයකට නොතකා හැරීමට හේතුවක්‌ කරගන්නා අධම ව්‍යාපාරයක්‌ වෙනුවෙන් පෙනී නොසිටීම මහජන රජයක යුතුකම හා වගකීම වෙයි.
කිරිපිටි මිල වැඩි කිරීමට සමාගම් ගෙනෙන යෝජනාවට එකඟ නොවීම මිනිසුන් රජයෙන් අපේක්‍ෂා කරයි. මිල වැඩි කළ පසු ඉතාම පහත්ම වර්ගයේ ලාභයක්‌ උදෙසා සැඟවූ කිරිපිටි එළියට දැමීම වැනි කාරණා අරභයා රජය කොන්ද කෙළින් තබා සටන් කළ යුතුය. ඒ අතර මේ මළඉලව් කිරිපිටි ඒකාධිකාරය නැත්තටම නැතිකර දියර කිරෙන් රට පෝෂණය කෙරෙන සංවර්ධනීය ව්‍යාපාරයකට ඉක්‌මනින් ම එළඹිය යුතුය.
http://www.divaina.com/2013/12/31/editor.html
Pic
Source
සබැඳි ලිපි කිහිපයක් -
[
ෆොන්ටෙරා සමාගම නිපදවන කිරිපිටි නොවන කිරිපිටිhttp://denethharinna.blogspot.com/2013/09/blog-post_6902.html
පිටි කිරිත් එපා - දියර කිරිත් එපාhttp://denethharinna.blogspot.com/2013/08/blog-post_1228.htmlකිරි, මෙලමයින් සහ DCD - ඇත්ත මොකක්ද?http://denethharinna.blogspot.com/2013/08/dcd.html
ඉතා වැදගත් කියවිය යුතු ලිපියක් - දිවි නසා ගන්නට ඕන නම් කිරිපිටි බිව්වට කමක්‌ නෑ! - වෛද්‍ය පාලිත සමන් ජයකොඩිhttp://denethharinna.blogspot.com/2013/08/blog-post_9700.htmlදේශීය කිරිපිටි නිෂ්පාදනය ඉහළ නැංවීම අර්බුදයට විසඳුමයිhttp://denethharinna.blogspot.com/2013/08/blog-post_6292.html
]
වසර තිහක්‌ තිස්‌සේ යුද්ධයේ කළු දුමාරයෙන් වැසී ගිය වව්නියාවටත්, අනුරාධපුරයටත් මායිම් වූ තම්මැන්නාකුලම කනිටු විද්‍යාලයට පසුගිය දවසක හිමිදිරි උදැසනක දුම්බර කඳුවැටිය පිස හැමූ සීත සුළඟ සමග රන්වන් හිරු රැස්‌ පතිත වී මුළු පාසල් භූමියම රන් පැහැයෙන් ඒකාලෝක විය. ඒ දුම්බර මිතුරෝ තෑගි බෝගත් රැගෙන තම්මැන්නාකුලමට නෑගම් ගිය අවස්‌ථාවේදීය. පාසල් දරු දැරියන්ගේ අඳුරු මුහුණුවල හසරැලි මල් පිපී තම්මැන්නාකුලම ගම්මානය පුරා ඒ මල්වල සුවඳ පැතිරෙන්නට වූයෙන්, මුළු ගමම එක්‌ නිමේෂයකින් පාසලට එක්‌රොක්‌ වන්නට ද විය. රුදුරු ගිනි අවි ප්‍රහාර මධ්‍යයේ කොටි ත්‍රස්‌තවාදීන්ගෙන් නිරතුරුව ගුටි බැට පීඩා අත්විඳිද්දීත් ගම අතහැර නොගිය සිංහල වැසියන් අද ගමත්, ගමේ පාසලත් රකිමින් මහත් පරිශ්‍රමයකින් යුතුව ජීවන අරගලයක නිරතව සිටිති. වසර 1956 දී පමණ ආරම්භ කළ තම්මැන්නාකුලම විද්‍යාලයේ එවකට පළමු ශ්‍රේණියේ පටන් අට වැනි ශ්‍රේණිය දක්‌වා දරු දැරියන් අධ්‍යාපනය ලැබූ ද්විතීක පාසලක්‌ වූ නමුත්, ත්‍රස්‌තවාදී තර්ජන එල්ලවීම නිසා වසර විසිපහකට වැඩි කාලයක්‌ මෙම පාසල වසා දමා තිබිණි. යුද ප්‍රහාරයන් සහ වල් බිහිවීම හේතුවෙන් පාසලට හිමිව තිබූ ගොඩනැඟිලි ද ටිකෙන් ටික දිරා ගොස්‌ බිමට සමතලා විය. 1999 වසරේදී මෙම පාසල යළි ආරම්භ කළ නමුත් ගුරුවරුන් නොමැතිවීම හේතුවෙන් යළිත් වසා දැමිණි. 2011 වසරේ ජනවාරි 21 වැනිදා යළි විවෘත කළ මෙම පාසලේ 1,2 හා 3 ශ්‍රේණි ආරම්භ කිරීමට උතුරු මැද පළාත් හිටපු මහ ඇමැති බර්ටි ප්‍රේමලාල් දිසානායක මහතා මූලික වී තිබිණි. මේ වනවිට කේ. ධර්මදාස විදුහල්පතිතුමාගේ අප්‍රතිහත ධෛර්යයෙන් හතර වන ශ්‍රේණිය දක්‌වා පන්ති පවත්වාගෙන යන අතර 2014 වසරේදී පස්‌ වන ශ්‍රේණි සඳහා ද පන්ති ආරම්භ කිරීමට සියලු කටයුතු සූදානම් කර ඇත. රජයේ උපාධිධාරී ගුරුපත්වීම් වැඩපිළිවෙළ යටතේ මෙම පාසලට ද ගුරුවරියන් දෙදෙනකු ලැබී ඇති අතර ගමේම ජීවත්වන ස්‌වෙච්ඡා සේවයෙන් දරුවන්ගේ දැස්‌ පෑදූ ගුරුවරියන් කිහිපදෙනෙක්‌ ද මේ වන විට එම පාසලේම ස්‌ථිර ගුරුවරියන් ලෙස අපරිමිත මෙහෙවරක්‌ ඉටු කරති. පසුගිය 23 වැනිදා අප මෙම පාසලට ගොඩ වූයේ දුම්බර මිතුරෝ පරිසර සංවිධානයේ ක්‍රියාකාරී සාමාජිකයන්ද වශයෙනි. දුම්බර මිතුරෝ පරිසර සංවිධානය හුදෙක්‌ දුම්බර අසිරිය රැක ගැනීමෙහිලා බැඳුණු සංවිධානයක්‌ නොව රටේ සෑම ප්‍රදේශයකම පරිසර සංරක්‍ෂණය සොබා සෞන්දර්යයේ වටිනාකම මිනිසාට සංවේදී කරවීම, අධ්‍යාපනයෙන් සහ ගුණදම් වලින් පිරුණු පරිසර හිතකාමී දරු පිරිසක්‌ ඇති කිරීම, පරිසර සන්නිවේදන ව්‍යාපෘති හා වැඩමුළු මෙහෙයවීම, ආපදා කළමනාකරණය ආදී අරමුණු රැසක්‌ මුල්කොට ගනිමින් නිමල් කණහැරආරච්චි මහතාගේ සංකල්පයක්‌ සහ සභාපතිත්වයෙන් යුතුව පවත්වාගෙන යන කිසිදු මූල්‍යමය ප්‍රතිලාභයක්‌ අපේක්‍ෂා නොකරන සංවිධානයකි. එම සංවිධානය නියෝජනය කරමින් අප තම්මැන්නාකුලම පාසලට ගියේ අඩුපාඩු රැසක්‌ මධ්‍යයේ මහත් උනන්දුවකින් අධ්‍යාපන කටයුතු කරගෙන යන දරු දැරියන්ට ධෛර්යත්, දැනුම් සම්භාරයත් සහ පාසල් පොත් උපකරණ ඇතුළු ද්‍රව්‍ය ද රැසක්‌ රැගෙනය. එදා දවස පුරා පුංචි දරු පැටවුන්ගේ දැනුම සතුට නංවාලන වැඩසටහන් අපි ක්‍රියාත්මක කළෙමු. සිංහල බෞද්ධ දරු දැරියන් 38 දෙනකුගෙන් යුතු මෙම පුංචි පාසලේ තුන ශ්‍රේණියේ ඉගෙනුම ලබන්නේ එක දියණියක පමණි. සියලුම දරුවන් පාහේ ගමේ සිවිල් ආරක්ෂක කමිටු සාමාජිකත්වය දරන දෙමව්පියන්ගේ දරුවන්ය. දුම්බර මිතුරෝ සංවිධානය සමග මේ නෑගමනට µqල්ඩා ශිෂ්‍ය සහන පදනම, කින්ඩ ජෝයි සමාගම, හර්ෂ කරුණාරත්න මහතා, රතුකුරුස සංවිධානය, ජයන්ත විඡේසිංහ මහතා, නෙවිල් මීවතුර මහතා, රංග මහතා ඇතුළු පිරිසක්‌ ද එක්‌වෙමින් තෑගි බෝග ආදිය සඳහා ද අනුග්‍රහය දැක්‌වීය. දුම්බර මිතුරෝ සංවිධානයේ සාමාජිකයන්ගේ දරුවන් දෙදෙනෙක්‌ ද මේ නෑගමනට එක්‌ වීම විශේෂ කාරණාවක්‌ මෙන්ම තම්මැන්නාකුලම පාසලේ දරු දැරියන්ගේත්, එහි විදුහල්පතිතුමා ඇතුළු ගුරු දෙමාපියන්ගේත් මහත් ප්‍රීතියට හේතු විය. අපේ දැරියන් දෙදෙනා ද පාසල් නිල ඇඳුම්වලින් සැරසී බුලත් හුරුලු ද අතැතිව එම පාසලේ විදුහල්පතිතුමා හා ගුරුවරුන්ට වැඳ ආචාර දැක්‌වීමත්, එම පාසලේ දරු දැරියන් ද බුලත් හුරුලු රැගෙන දුම්බර මිතුරෝ සාමාජිකයන් ප්‍රමුඛ කණ්‌ඩායම බැතියෙන් පිළිගැනීමත් දෙපාර්ශ්වයේ සෑම දෙනකුගේම පාහේ දැස්‌වල සතුටු කඳුළු පුරවාලූ අතිශය මිත්‍රශීලී වූත්, සංවේදී වූත් අවස්‌ථාවක්‌ම විය. සිංහල චාරිත්‍ර වාරිත්‍රවලින් බැඳුණු අපේකමට කළ නොහැක්‌කක්‌ නොමැති බව එයින් තහවුරු කෙරිණි. පාසලේ දරු දැරියන්ගේ මවුපියවරුන් තම වගාවන්ගෙන් නෙළාගෙන අවුත් පිසූ නැවුම් එළවළුවලින් සපිරි ඉතා ගුණවත් වූත්, රසවත් වූත් දිවා ආහාරවේලක්‌ ද තේ පැන් සංග්‍රහයකින්ද සැලකූහ. කුඩා දරුවන් ඉතා උෙද්‍යාaගීව වැඩමුළුවට දායක වූ අතර ඔවුන්ගේ විවිධ ප්‍රසංගයක්‌ ද පැවැත්විණි. කලබලකාරී වාතාවරණය අවසන විදුහල්පති කේ. ධර්මදාස මහතා "දිවයින" පුවත්පතට විශේෂ ස්‌තුතිය පළ කරමින් කතා කළේය.
"මම එක දවසක්‌ "දිවයින" පුවත්පත් ආයතනයේ සොබාසර අතිරේකයට කතා කරලා අපේ පාසලට පරිසරය සම්බන්ධ වැඩමුළුවක්‌ කරන්න කියලා ඉල්ලීමක්‌ කළා. එහි සංස්‌කාරක මහතා "දුම්බර මිතුරෝ" සංවිධානය මගින් එම වැඩමුළුව කිරීමට පොරොන්දු වුණා. අපේ දරුවන්ට තෑගි බෝගත් අරගෙන ඇවිත් දවසක්‌ම මේ දරුවෝ වෙනුවෙන් මහන්සි වෙලා දරුවන්ගේ උනන්දුව වැඩි දියුණු කළාට බොහෝමත්ම පිං සිදු වෙනවා. අපේ පාසලට පුස්‌තකාලයකදැඩි අවශ්‍යතාවක්‌ තියෙනවා. ගොඩනැඟිල්ලක්‌ අලුතින් හදා ගැනීමටත් අවශ්‍යයි. පන්ති කාමර වෙන් කරගන්න ඕනෑ. ළමයි තිස්‌ අට දෙනාට ඇති තරමට ඩෙස්‌ පුටු නම් තියෙනවා. තියෙන ගොඩනැඟිල්ලේ වහලය හදාගන්න ඕනේ. ගමේ හැමෝම පුළුවන් උපරිමයෙන් පාසල දියුණු කරන්න උනන්දු වෙනවා. මගේ ගුරුවරු දිවා රෑ නොබලා දරුවන්ට උගන්වනවා. හවස එකහමාරට පාසල ඇරුණත් ගුරුවරු ගෙවල්වලට නොගිහින් දරුවන්ව හවසට පාසලේම රඳවාගෙන නොමිලේ උගන්වනවා. මේ අය නම් ගුරුවරු නොවෙයි ගුරු දෙවිවරු කිව්වොත් නිවැරැදියි. උතුරු මැද පළාත් මහ ඇමැති එස්‌. එම්. රංජිත් මහතා, උතුරු මැද පළාත් වර්තමාන අධ්‍යාපන ඇමැති කේ. එච්. නන්දසේන මහතා 2011 වසරේදී මේ පාසල නැවත ආරම්භ කිරීම සඳහා මුල් වුණා. වන්නි දිස්‌ත්‍රික්‌ ජ්‍යෙෂ්ඨ පොලිස්‌ අධිකාරී ෂ අමරසිරි සේනාරත්න මහතා, වර්තමාන මැදවච්චිය පොලිස්‌ ස්‌ථානාධිපති දිසානායක මහතා, කලාප අධ්‍යාපන අධ්‍යක්‍ෂ හේමපාල ගුණවර්ධන මහතා, කොට්‌ඨාස අධ්‍යාපන අධ්‍යක්‍ෂ මැදවච්චිය ටී. බී. ජයනන්ද මහතා, සිවිල් ආරක්ෂක කලාප අණදෙන නිලධාරී කර්නල් මිල්ලවාන මහතා, සෙට්‌ටිකුලම හා මාන්කුලම පොලිස්‌ ස්‌ථාන, සිවිල් ආරක්ෂක නිලධාරීන්, කරුණා පදනම, පසන් තක්‍ෂලා වැඩසටහන, සසෙක්‌ස්‌ පාසල් ජාලය, අගමැති කාර්යාලය, බැසිල් රාජපක්‍ෂ මහතාගේ කුඩා පාසල් නවීකරණ වැඩසටහන මේ පාසල වෙනුවෙන් උදව් කළා. ඒ හැමෝටම මම විදුහල්පති හැටියට ස්‌තුතිවන්ත වෙනවා. "දිවයින" පුවත්පත කියවන පාඨක ජනතාවගෙන් මම ඉතා ආයාචනාත්මකව ඉල්ලා සිටින්නේ සිංහල බෞද්ධ දරුවන් ඉගෙන ගන්න මේ පුංචි පාසල දියුණු කරන්න හැකි ඕනෑම ආකාරයකින් උදව් කරන්න කියායි" යනුවෙන් විදුහල්පති ධර්මදාස මහතා කීවේය.
බොහෝ කලෙකින් මහත් පිංකමක්‌ කරගත්තා යෑයි ප්‍රීති ප්‍රමෝදයකින් යුතුව අප තම්මැන්නාකුලම පාසලෙන් නික්‌ම ආවේ යළිත් දිනක ඒ පාසලේ දරු පැටවුන්ට උදව් කරන්නට යැමේ දැඩි අදිටනින් ද යුතුවය.
තුෂාරී කළුබෝවිල
http://www.divaina.com/2013/12/31/feature03.html
මෑතක සිට නිතර නිතර අසන්නට දකින්නට ලැබෙන ඉතාමත් ශෝචනීය ප්‍රවෘත්තියකි අලි ඇතුන් විනාශ වීම. එදා අලි ඇතුන්ගේ ගජමුතු, දළ, කෙඳි, හම් ලබා ගැනීම සඳහා අලි දඩයමේ ගියවුන් නිසා ඔවුන්ට එල්ල වූ තර්ජන අද එල්ල වන්නේ ඊට වඩා හාත්පසෙකින්ම වෙනස්‌ වූ වෙනත් මුහුණුවරකිනි. දළට, ගජමුතු ලොබ බැඳි අලි මරුවන් අද අලි ඇතුන් හා මහා සටනකට අවතීර්ණ වී සිටියි. අලි මිනිස්‌ ගැටුම බරපතළ ප්‍රශ්නයක්‌ බවට පත්ව තිබෙන බව නිතිපතා ලැබෙන වාර්තාවලින් හෙළිදරව් වෙයි. මන්ද (මිනිස්‌ ජීවිත) දේපළ, භව භෝග අකා මකා විනාශ කරන හෙයිනි. කෙසේ වුවත් අලි මිනිස්‌ ගැටුම අද ඊයේ ඇතිවූවක්‌ නොවේ. ජීවත්වීමට අවැසි ඉඩකඩ මෙන්ම ආහාර සහ ජලය සඳහා මිනිසාත්, අලියාත් අතර ඇතිවන ගැටුමේදී ඉතාමත් කුරිරු ලෙස අටවන ලද හක්‌කපටස්‌ මුවට ගෙන සැපීමේදී ඒ තූළ ඇති විනාශකාරී පුපුරණ ද්‍රව්‍ය පුපුරා යැමෙන් අලි ඇතුන් දින ගණනක්‌ කිසිදු ආහාරයක්‌ හෝ දිය පොදක්‌ තම මුඛයට ගත නොහැකිව මියෑදෙන්නේ බලා සිටින්නවුන්ගේ දෙනෙත තෙත් කරමින් හා හදවත කම්පා කරමිනි. මෙම අලි මිනිස්‌ ගැටුම නිරන්තර සටනක්‌ වුවත් සද්දන්තයන් පවා එක පහරින් බිම හෙළීමට සමත්කම් දක්‌වන පිරිස්‌, ඉදිරියේ දී අසරණව පරදින දිනය වැඩි ඈතක නොවේ. වනගතව නිදහසේ ගෙවූ ජීවිතය අහිමි වීම, හැලහැප්පීම් හේතු කොටගෙන විනාශ වෙමින් පවතින අලි ඇතුන් පමණක්‌ නොව කුරුළු කොබෙයියන්ගේ පටන් අපා, දෙපා, සිවුපා මෙකී නොකී සෑම සතෙකුම හෙට අපේ රටට ආගන්තුක වේ නම් එය කොතරම් සාපයක්‌ද? අපරාධයක්‌ද? මේ සිදුවීම් දෙස විමසිsලි දෑසින් බලන්නෙකු ලෝකයේ අවසන් ගීය ගයන කුරුල්ලන්, පිල් විදහාගෙන අසිරිමත් අවසන් රංගනයක යෙදෙන මොණරුන් අවසන් කරණම ගසන වඳුරන්, මාළුන්, උරගයන්, ගහකොළ, වන පැළෑටි දකිනු ඇත.
ස්‌වභාවධර්මයේ පිහිට නොපතා ජීවත්වීමට හැකි ජීවියෙකු මෙතෙක්‌ ලෝකයේ කිසිමදාක බිහිවී නැත. සොබාදම් දිනිතියටත් පාඩම් උගන්වන්නට යන (පිරිසට) මිනිසුනට අත්විඳීමට සිදුවන හිරිහැරය අපමණය. මේ තත්ත්වයේ බලපෑමින් මිදෙන්නට ශ්‍රී ලංකාවටද හැකියාවක්‌ නැත.
ලංකාවේ වාර්තා වන අකල් අලි මරණ අනුව වර්ෂයකට දළ වශයෙන් වන අලි 200-250 අතර මියයන අතර ලංකාවේ අලි ඇතුන් ගහනය 5500 සංඛ්‍යාවක්‌ පමණ බවට ඇතැම් සංගණකයන් තොරතුරු සපයා ඇත. මෙම ප්‍රමාණය දෙස බලන විට තවත් දශක 5 - 6 ක්‌ පමණ යැමට මත්තෙන් සමස්‌ත අලි පරපුරම විනාශ වනු ඇත. වඳවී යනු ඇත. වන අලි පහරදීමෙන් (සිදුවන) සිදුවී ඇති මිනිස්‌ මරණ ගණන 60 - 70 අතර සංඛ්‍යාවකි. අලි පහරදීම නිසා මිනිසෙකු මියයැම මහත් ෙ€දවාචකයක්‌ ලෙස (එම ප්‍රදේශවාසීන්) ප්‍රජාව දනිති. ඒ නිසාම පසුගිය කාලයේ දේහය සහිත මිනී පෙට්‌ටි පාරට ගෙනවිත්, මාර්ගය අවහිර කරමින් උද්ඝෝෂණය කරන තත්ත්වයට මෙන්ම රාජ්‍ය දේපළවලට හානි පැමිණවීමේ තත්ත්වයට පෙළඹීම මගින් මෙහි ඇති බැරෑරුම්කම තේරුම්ගත හැකිය. සියල්ල ක්‍ෂණික උද්වේගයකින් කරන්නා වූ පුහු ආටෝප සිදුවීම් සේ පෙනේ. ජීවිත ආශාවෙන් විලාප නැගුමුත් පණණල රැක ගැනීමට නොහැකිව මරණය වැළඳගත් අලි ඇතුන් විනාශ කිරීමද, විනාශ වීමද ෙ€දවාචකයකි. මිනිසුන් බලනුයේ තමන්ගේ පාර්ශ්වය පමණි. ප්‍රශ්නයක්‌ ඇති බව පැහැදිලියි. නමුත් යථාර්ථයෙන් තේරුම් ගෙන නැත. ශතවර්ෂ ගණනාවක්‌ තිස්‌සේ අලි ඇතුන් විසින් භුක්‌ති විඳි ඔවුන්ගේ නිජබිම ආත්මාර්ථකාමී මිනිසුන් විසින් පැහැරගෙන ඇත. කොල්ලකා ඇත. ප්‍රශ්නය ඇත්තේ එතැනයි.
එදා හෙළ මිහිමඬල සැරසූ තුන්පත් රෑන, එදා දිගන්තය පුරා විහිදී ගිය කුංචනාදය, එදා අභීතව යුද බිමට ගිය ජවසම්පන්න සිව් රඟ සෙනගෙහි මූලික සේනාංකය අද වැටී සිටින (මුqහුණදෙන) ඉතාමත් ශෝචනීය තත්ත්වයෙන් මුදාගන්නට කිසිවෙක්‌ නැත. මිහිතලය මත අද ජීවත්වන දැවැන්තයන් මේ ඉරණමට ගොදුරු වී ඇතත් මොවුන් විරාජමානව සිටි ස්‌වර්ණමය යුගයක්‌ද පැවති බව අතීතයෙන් සනාථ වේ. ඔවුන්ගේ තේජස කොතරම් දැයි කිවහොත් බෞද්ධ, හින්දු ආදී පෙර අපර දෙදිග ඓතිහාසික සංස්‌කෘතික මානව විද්‍යාත්මක ලිත මූලාශ්‍රවල පවා සඳහන්ව තිබීමෙන් පෙනී යයි.
රටක වන පැළෑටි සහ වන සතුන් අධ්‍යාපනික විද්‍යාත්මක ආර්ථික සහ විනෝද ක්‍රීඩාත්මක වටිනාකමකින් පිරුණු ජාතික සම්පතක්‌ බව පිළිගන්නා ලද්දෙන් අනාගත පරම්පරාව සඳහා එය රැක තැබීම අප හැම මත පැවරෙන වගකීමක්‌ මෙන්ම යුතුකමක්‌ බවද නිතැතින්ම පිළිගැනුණේය. දැව ජාවාරම, සතුන් දඩයම, ඇතුන්ගේ දළ බිඳීම, අලි ඇතුන් මරා දැමීම වැනි අයුතු ක්‍රමෝපායයන් මගින් මුදල් ඉපයීම පහසු කටයුත්තක්‌ බවට හරවාගෙන තිබීමෙන් හා ජනාවාස ඉදිවීම, ඊනියා සංවර්ධන සැලසුම් ක්‍රියාත්මක වීම තුළින් ලංකාවේ ස්‌වභාව සෞන්දර්ය නගරයට හිලව් වෙමින් පවතින බව නොරහසකි. නිලට නිලේ දිලෙන ගහකොළ තුරුලතාවන්ගෙන් ගහන වන සම්පත කවර දේශයකට වුවද මහරූ සම්පතකි. මෙවන් අභයභූමි දෙස්‌ විදෙස් සංචාරකයන්ගේ නෙත් සිත් ඇදගත් පාරාදීස මෙන් විය. බහුතරයක් මිනිසුන් ආදරය කරන ඒ සම්පත අතළොස්‌සකගේ බලපෑම් හා ඕනෑ එපාකම්වලට නතුකර ගන්නට ඉඩහැර බලා සිටීම කොතෙක්‌ නම් දුරට යුක්‌ති සහගතදැයි යන්න විමසා බැලිය යුතු කාලය එළඹ ඇත. මේ ඝන වනාන්තර ප්‍රදේශයම අලි ගැවසුම් භූමියකි. නීති විරෝධී වනාන්තර එළිපෙහෙළි කිරීම්වලට අමතරව වන සතුන් දඩයම ඉතා බහුල ලෙස සිදුවීමද තවත් එක්‌ ෙ€දවාචකයකි. මානුෂික කතාවන් මෙකී සිදුවීම් පෙළ පසුබිමේ හිඳ හඬ නඟන්නේ නැත්තේ ඇයි? යන්න හා සොබාදහම විනාශ වීමෙන් පරිසරයට මෙන්ම රටේ ආර්ථිකයටද සිදුවන හානිවීම්වලට වගකිව යුත්තෝ කවරහුද? යන්න හඳුනාගෙන ඇත්ද? ගැටලුව වන්නේ පවතින නීති උල්ලංඝනය කරමින් කරන විනාශ හමුවේ වගකිවයුතු පාර්ශ්ව මුනිවත රැකීමයි. මෙම ප්‍රශ්නය ගැන කතාබහ කිරීම බොහෝ විට සිදුවී ඇතත් ක්‍රියාවට නැගීම සිදුව තිබෙන්නේ "වැසි සමයේ වඳුරන් ගෙවල් සෑදීමට සාකච්ඡා කරගන්නා ආකාරයටය".
සංවර්ධනයේ අවශ්‍යතා වැඩියෙන් සැලකිල්ලට ගන්නේ නම් අලින් සඳහා නිදහස්‌ සුව තැනක්‌, නිශ්චිත වන බිම්, වන තීරු, තෘණ භූමි ලබා දුනහොත් අලි මිනිස්‌ ගැටුම මඳකට හෝ නැවතීමට ඉඩ ඇත. එසේම තව තවත් වන බිම් එළිපෙහෙළි කර ජනාවාස කිරීම දැන් නවතා දැමිය යුතුය. අලි මිනිස්‌ ගැටුම අවම කිරීමට කුමක්‌ හෝ තිරසාර විසඳුමක්‌ ක්‍රියාත්මක කිරීම දැන් අප ඉදිරියේ තියෙන ප්‍රබලතම අවශ්‍යතාවකි.
අම්පිටියේ - ඒ. කේ. ඩබ්ලිව්. පෙරේරා
http://www.divaina.com/2013/12/31/feature02.html
තිපන් යනු යාපනයේ කොටි හමුදා නායකයායි. ඔහුගේ සමීපතම ඥතියා කිලිනොච්චි ද්‍රවිඩ සන්ධාන මන්ත්‍රී එස්‌. ශ්‍රීධරන්ය. ශ්‍රීධරන් පසුගියදා පාර්ලිමේන්තුව අමතමින් මිනීමරු කොටි කණ්‌ඩායම ඇගයීමට ලක්‌ කළේය. ඔහු එතනින් නැවතුණේ නැත. පසුගිය සතියේ ඉන්දීය සංචාරයක යෙදී කටුනායකට පැමිණෙන අවස්‌ථාවේ කොටි ක්‍රියාකාරියකු වූ තමිල්මානි ප්‍රභාකරන්ව මෙරටට ගෙන ආවේය. තමිල්මානි ප්‍රභාකරන් උතුරට ගියේ ද ශ්‍රීධරන්ගේ වාහනයෙනි. මොහු උතුරේ හමුදා කඳවුරු වීඩියෝගත කරද්දී අසුවිය. එහිදී ශ්‍රීධරන් පැවසුවේ තමිල්මානි තමාගේ මිත්‍රයකු බවයි.
මේ අන්දමට මහජනතාවගේ වරප්‍රසාද ලබමින් කටයුතු කරන ශ්‍රීධරන් වැන්නවුන් සම්බන්ධව රජය ගත් ක්‍රියාමාර්ගය කුමක්‌ද?
ඉන්දීය පාර්ලිමේන්තුව තුළදී බින්දර්වාලා නමැති සීක්‌ ත්‍රස්‌ත නායකයා සැමරීමට ඉඩක්‌ ලැබෙනු ඇතැයි කිව හැකිද?
කිලිනොච්චි මහ විදුහලේ විදුහල්පතිව සිටි ශ්‍රීධරන් විදේශ රටවලට ගොස්‌ කළ ප්‍රකාශවල අන්තර්ගත වූයේ ශ්‍රී ලංකා විරෝධී පිළිවෙතයි. ඔහු හැසිරෙන්නේ ප්‍රභාකරන් තවමත් උතුරු ප්‍රදේශ පාලනය කරන්නාක්‌ මෙනි. මෙයට වසර ගණනකට පෙර කොටි ක්‍රියාකාරීන්ට එරෙහිව එදා ආණ්‌ඩු ක්‍රියා නොකිරීම නිසා කොටි සංවිධානය වර්ධනය විය.
දැන් ශ්‍රීධරන් ඉරණමඩු වැවේ වතුර යාපනයට ගෙන යැමට ඉඩ නොදෙන බවට ද තර්ජනය කරයි.
ශ්‍රීධරන්ගේ සොහොයුරා වූ ශ්‍රී කූගන් දැන් ස්‌විස්‌ටර්ලන්තයේ සුරීච් නුවර සිට කොටි වෙබ් අඩවියක්‌ මෙහෙයවයි.
මේ පසුබිම මැද මැයි 17 නමැති සංවිධානයට සම්බන්ධ තමිල්මානි ප්‍රභාකරන්ව මෙරටට ගෙනඒමට ශ්‍රීධරන් ක්‍රියා කළේ මන්ද?
ලබන මාර්තු 26 දා ජිනීවා මානව හිමිකම් කොමසාරිස්‌වරිය වන නවි පිල්ලේ සිය වාර්තාව ප්‍රකාශයට පත් කිරීමට නියමිතය.
මේ නිසා තමිල්මානි ප්‍රභාකරන් මෙරටට පැමිණියේ ඒ සඳහා වීඩියෝ පටයක්‌ නිර්මාණය කිරීමට බව පැහැදිලිය. ලොව කිසිම රටක ආරක්ෂක කඳවුරු හෝ හමුදා භටයන්ගේ ආගමනය වීඩියෝගත කිරීමට ඉඩ නොදේ.
මේ අයුරින් ශ්‍රී ලංකාවේ මාධ්‍යවේදියකුට ඉන්දියාවට ගොස්‌ එරට හමුදා කඳවුරු වීඩියෝගත කළ හැකිද?
මෙම තත්ත්වය මත ශ්‍රීධරන් දියත් කර ඇති මෙහෙයුම හෙළි වී ඇත. ඔහු ත්‍රිකුණාමලයේ මිනීමරු කොටියා වූ එලිලන්ගේ බිරිය ආනන්දි සසිහරන්ව උතුරු පළාත් සභාවට ගෙන ආවේය. ආනන්දි නමැත්තිය දැන් ප්‍රසිද්ධියේම කොටි හඬ නඟයි.
මෙවන් වාතාවරණයක්‌ මැද ශ්‍රීධරන් තමිල්නාඩුවේ පුවත්පතකට ප්‍රකාශ කර තිබුණේ ඊළම ඉලක්‌කය බවයි. ප්‍රභාකරන් මාවිල්ආරු සොරොව්ව වැසුවේය. ශ්‍රීධරන් දැන් ඉරණමඩු ජලාශයේ ජලය යාපනයට ගෙන යැමට ඉඩ නොදෙන බව කියා සිටී. එකී ක්‍රියාදාමයන් දෙකම එකමය. මෙහිදී නැඟෙන ප්‍රශ්නය ඉරණමඩු ජලාශය ශ්‍රීධරන්ගේ බූදලයක්‌ ද යන්නයි. ශ්‍රීධරන් කිලිනොච්චි මන්ත්‍රී ලෙස පත්වූයේ වැඩි ඡන්ද 8000 කිනි. මේ පසුබිම මැද ඉරණමඩු ජලාශයේ ජලය යාපනයට ගෙන යැමට ඉඩ නොදෙන බවට ශ්‍රීධරන් පවසන්නේ සිය ඡන්ද ප්‍රතිශතය වැඩි කර ගැනීමටද?
මෙලෙස ශ්‍රීධරන් තමන්ට රිසි පරිදි ක්‍රියා කරද්දී ද්‍රවිඩ සන්ධානය ශ්‍රී ලංකා හමුදාවට එරෙහිව ජාත්‍යන්තර විමර්ශනයක්‌ ඉල්ලා සිටින බවට වාර්තා විය.
එසේනම් ප්‍රභාකරන්ගේ රූකඩය වූ ද්‍රවිඩ සන්ධානය කොටි සිදු කළ යුද අපරාධ රැසකට වගකිවයුතුය. මේ නිසා ද්‍රවිඩ සන්ධානයට එරෙහිව ද ජාත්‍යන්තර විමර්ශනයක්‌ කළ යුතු නොවේද?
මෙරට අතීතය වසන් කළ නොහැක. ද්‍රවිඩ සන්ධානයේ පසුබිම නිරීක්‍ෂණය කළ විට ඔවුන් ප්‍රභාකරන්ගේ සියලුම ක්‍රියා අනුමත කරනු ලැබිණ. ද්‍රවිඩ එක්‌සත් විමුක්‌ති පෙරමුණේ නායක අමිර්තලිංගම් යෝගේශ්වරන් ඝාතන ගැන ප්‍රභාකරන් වගකිවයුතු යෑයි ආර්. සම්පන්දන් හෝ කිසිම ද්‍රවිඩ දේශපාලකයෙක්‌ පැවසුවේ නැත. මගේ තාත්තවයි අම්මවයි කොටි මැරුවා. එහෙත් ද්‍රවිඩ සන්ධානය ඊට එරෙහිව කිසිම හඬක්‌ නැඟුවේ නැහැ. ඒ වගේම ළමුන්ව යුද සේවයට බඳවා ගත් දේශපාලකයන් දෙන්නෙක්‌ ද්‍රවිඩ සන්ධානයේ සිටිනවා. ඔවුන් යුද අපරාධකරුවන් යෑයි මඩකලපු ශ්‍රී ල.නි.ප. සංවිධායක අරුන් තම්බිමුත්තු පැවසීය.
මේ පසුබිම මැද ද්‍රවිඩ සන්ධානයේ කොටි හිතවාදීන්ගේ වෙස්‌ මුහුණු ගැලවිය යුතු කාලය එළැඹී ඇත. තීරු බදු රහිත වාහන පහසුකම්, මන්ත්‍රී වරප්‍රසාද, තානාපති නිලධාරීන් සතු ගමන් බලපත්‍රවලට සමාන ගමන් බලපත්‍ර හිමිකම් ලබන ශ්‍රීධරන් පසුගිය කාලය මුළුල්ලේ කැනඩාව ඇතුළු රටවල් රැසකට ගියේය.
එහිදී ඔහු ක්‍රියා කළ අයුරු කොටි වෙබ් අඩවිවල සඳහන් විය. මෙවන් තත්ත්වයක්‌ මත ශ්‍රීධරන් වැන්නවුන්ට තවදුරටත් ශ්‍රී ලංකාවේ ප්‍රජාතන්ත්‍රවාදයට එරෙහිවීමට ඉඩදිය හැකිද? ද්‍රවිඩ සන්ධානයේම හිටපු මන්ත්‍රීවරයකු වූ කඡේන්ද්‍රන් සෙබළුන් 10000 ක්‌ පෙට්‌ටිවලින් යාපනයේ සිට කොළඹට එවන බවට තර්ජනය කළේ ද පාර්ලිමේන්තුවේ සිටය.
දැන් පාර්ලිමේන්තුවේ සිට හඬ නඟන්නේ ශ්‍රීධරන්ය. ඉරණමඩු ජලාශයේ ජලය උතුරට ගෙන යැමට ඉඩ නොදෙන බවට තර්ජනය කරන ශ්‍රීධරන් ඉදිරියේදී ඉරණමඩු ගුවන් ධාවන පථයට ගුවන් යානා බැස්‌සවීමට ඉඩ නොදෙන බව කීවොත් ඇති වන තත්ත්වය කුමක්‌ද?
ශ්‍රීධරන් මෙරටට ගෙන ආ තමිල්මානි ප්‍රභාකරන් මාධ්‍යවේදී වෙස්‌ගත් කොටි කොන්ත්‍රාත්කරුවෙකි.
ඔහු මෙයට පෙර ද ශ්‍රී ලංකාවට පැමිණියේය. එහෙත් බුද්ධි අංශවලට අසුවූයේ නැත. එහෙත් පුදුමය නම් කටුනායක ගුවන්තොටුපළින් මේ කොටි ක්‍රියාකාරීන්ට මෙරටට ඒමට ඉඩ ලැබීමයි.
පසුගිය මස ජෙයපාලන් නමැති කොටි කවියා අසුවිය.
ජෙයපාලන් බැලීමට මිරිහානට ගියේ මෙරට පාර්ශ්වයන්ය. තමිල්නාඩුවේ චෙන්නායි ගුවන්තොටුපළට ශ්‍රී ලංකාවේ මාධ්‍ය පාර්ශ්ව පැමිණි අවස්‌ථාවේ ආගමන නිලධාරීන් නඟන ප්‍රශ්නය නුඹලාගේ සංචාරයේ අරමුණ කුමක්‌ද? යන්නයි. එහෙත් තමිල්නාඩු කොටි ක්‍රියාකාරීන්ට මෙරටට පැමිණ උතුරට යැමට දොර විවෘත වී තිබේ. මෙය පුදුමයක්‌ නොවේ. ටැමිල් සී.එන්.එන්. නමැති කොටි වෙබ් අඩවියේ කන්නන්ට මෙරටට පැමිණ ආරක්ෂක සමුළුවක අසුන් ගැනීමට අවස්‌ථාව හිමි විය.
කීර්ති වර්ණකුලසූරිය
http://www.divaina.com/2013/12/31/feature01.html
කන්ද උඩරට රාජධානිය බ්‍රිතාන්‍ය පාලනයට නතුවීමෙන් පසුව සිරගත කළ අපේ ජාතික වීරවරයන්ගේ ස්‌පර්ශය ලැබූ මහනුවර බෝගම්බර බන්ධනාගාරය 2014 නව වසරේදී විශේෂ ව්‍යාපෘතියක්‌ සඳහා යොදා ගන්නවායි සංස්‌කෘතික හා කලා කටයුතු අමාත්‍ය ටී. බී. ඒකනායක මහතා ඊයේ (30 දා) මහනුවරදී ප්‍රකාශ කළේය.
ජනාධිපති මහින්ද රාජපක්‍ෂ මහතාගේ අනුදැනුම මත ආරක්ෂක අමාත්‍යාංශයේ ලේකම් ගෝඨාභය රාජපක්‍ෂ මහතා සහ පුරාවිද්‍යා දෙපාර්තමේන්තුව සමග සාකච්ඡා කර බෝගම්බර ඓතිහාසික බන්ධනාගාරය ජාතියට වැදගත් වන වටිනා ව්‍යාපෘතියක්‌ සඳහා යොදා ගන්නා බව අමාත්‍ය ටී. බී. ඒකනායක මහතා තවදුරටත් පැවැසීය.
අමාත්‍ය ටී. බී. ඒකනායක මහතා මේ බව පැවැසුවේ මධ්‍යම සංස්‌කෘතික අරමුදලේ මහනුවර ව්‍යාපෘතියේ වාර්ෂික "මැදරට සංස්‌කෘතික උරුමය" ශාස්‌ත්‍රීය සම්මන්ත්‍රණයට සහභාගී වෙමිනි.
මහනුවර ශ්‍රී දළදා මාලිගාවෙහි රන් ආවුද මණ්‌ඩපයේ දී මෙම සම්මන්ත්‍රණය පැවැත්විණ. ලංකාවේ අවසන් සිංහල රාජධානිය වූ මහනුවර පුරාවිද්‍යාත්මක වශයෙන් ජාතියේ උරුමය සුරක්‍ෂිත කළ වැදගත් ස්‌ථානයක්‌ බව පැවසූ අමාත්‍ය ඒකනායක මහතා මහනුවර එදා ශ්‍රී විභූතිය නැවත විදහා දැක්‌වෙන වැඩපිළිවෙළක්‌ නව වසර ආරම්භයත් සමග ජනවාරි මාසයේදී ආරම්භ කෙරෙන බව පැවැසීය.
ජනාධිපති මහින්ද රාජපක්‍ෂ මහතාගේ ප්‍රධානත්වයෙන් එම වැඩපිළිවෙළ මහනුවර කොළඹ වීදියෙන් ආරම්භ වන්නේ යෑයිද අමාත්‍යවරයා පැවැසීය.
මධ්‍යම පළාත් ආණ්‌ඩුකාර ටිකිරි කොබ්බෑකඩුව මහතා මෙම අවස්‌ථාවට සහභාගි වෙමින් මධ්‍යම සංස්‌කෘතික අරමුදල මගින් මහනුවර ඓතිහාසික පූජනීය ස්‌ථාන සංරක්‍ෂණය සඳහා විශාල වැඩකොටසක්‌ සිදුවන බවත් ජනාධිපති මහින්ද රාජපක්‍ෂ මහතාගේ උපදෙස්‌ පරිදි රජය ප්‍රතිපාදන ලබාදෙන බවත් පැවැසීය.
අස්‌ගිරි මහා විහාර පරිවේණාධ්‍යක්‍ෂ පූජ්‍ය නාරම්පනාවේ ආනන්ද ස්‌වාමීන්ද්‍රයන් වහන්සේ ද සංස්‌කෘතික ත්‍රිකෝණයේ මහනුවර කළමනාකාර එච්. එම්. එම්. හේරත්, සංස්‌කෘතික අරමුදලේ අධ්‍යක්‍ෂ ජනරාල් මහාචාර්ය ගාමිණී අධිකාරි, පේරාදෙණිය විශ්වවිද්‍යාලයේ පුරාවිද්‍යා අංශයේ මහාචාර්ය සුදර්ශන සෙනෙවිරත්න, මහාචාර්ය ටී. කේ. ජයරත්න යන මහත්වරු ඇතුළු කීප දෙනෙක්‌ ද මෙහිදී අදහස්‌ දැක්‌වූහ.
සිරිල් විමලසුරේන්ද්‍ර
http://www.divaina.com/2013/12/31/news30.html
Pic
Source
පහ වසර ශිෂ්‍යත්ව විභාගය අහෝසි නොකළ යුතු බව ජාතික හෙළ උරුමයේ නායක ආචාර්ය පූජ්‍ය ඕමල්පේ සෝභිත නාහිමියෝ පවසති.
ශිෂ්‍යත්ව විභාගය යනු නිදහස්‌ අධ්‍යාපනය විසින් සකසා ඇති රන් දොරටුවක්‌ බවත් සඳහන් කරන උන්වහන්සේ එහි යම් අඩුපාඩුවක්‌ තිබූ පමණින් එය අහෝසි කිරීම කිසිසේත් නොකළ යුතු බවද සඳහන් කළහ.
පහ වසර ශිෂ්‍යත්ව විභාගය නිසා පාසල් දරුවන්ට ඇතිවන පීඩනය පිළිබඳ විවාදයක්‌ නැතත් එය සාමාන්‍ය ජනයාගේ දරුවන්ට උසස්‌ පාසලකට ඇතුළත් වීමට තිබෙන සාධාරණ හා විශ්වාසනීය ක්‍රමය බවද ඕමල්පේ සෝභිත හිමියෝ පවසති.
අප රටේ පාසල් අතර පරතරය අහසට පොළොව තරම් විෂමතාවයක පවතින බව කටුක සත්‍යක්‌ බව පවසන උන්වහන්සේ එම පරතරය නැති නොකොට ශිෂ්‍යත්ව විභාගය අහෝසි කිරීම කිසිම සාධාරණයක්‌ නැතැයිද පවසති.
අධ්‍යාපනය සම්බන්ධයෙන් විශාල ආන්දොලනයක්‌ මෑත කාලයේ ඇතිවීම යහපත් නොවන බවත් අධ්‍යාපන පරිපාලනය විධිමත් කර අධ්‍යාපන ප්‍රතිපත්ති තීරණය කිරීම ඉක්‌මන් නොවී විධිමත් අධ්‍යයනයකින් හා සංවාදයකින් පමණක්‌ කළ යුතු බව තමාගේ විශ්වාසය බවත් පූජ්‍ය ඕමල්පේ සෝභිත නාහිමියෝ වැඩිදුරටත් සඳහන් කරති.
සිරිමන්ත රත්නසේකර
http://www.divaina.com/2013/12/31/news29.html
Pic
Source
'දේශපාලකයා ජනතාවට පරමාදර්ශී සහ අවංක විය යුතුය! ඒ සඳහා හොඳම මග බුදුන් වහන්සේගේ ධර්මයයි'
ථෙරවාදී බුදු දහම කෙරෙහි දැඩි ලෙස පැහැදීමට ලක්‌ වූ ජර්මනියේ ඕබන් ඩෆ් (oban Dorf) නගරයේ නගරාධිපති පනස්‌ පස්‌ හැවිරිදි දෙදරු පියකු වන හර්මන් ආකර් මහතා (Herman Acker) ඊයේ (30 දා) මිහින්තලේ රජමහා විහාරස්‌ථානයේදී තාවකාලික පැවිදි බව ලබාගත්තේය.
මිහින්තලා රජමහා විහාරාධිපති ගෞරව ශාස්‌ත්‍රවේදී වලවාහැංගුණුවැවේ ධම්මරතන හිමියන්ගේ අනුශාසනා මත උන්වහන්සේගේ ආචාර්ය උපාධ්‍යායත්වයෙන් ජර්මනියේ (ඕබන් ඩෝෆ්) රතනසිරි යන නමින් නගරාධිපතිවරයා පැවිදි බව ලැබීය.
පවුල් දහහතර දහසක්‌ පමණ ජීවත්වන ජර්මනියේ ඕබන් ඩෝෆ් නගරයේ නගරාධිපතිවරයා ලෙස වසර දහහතරක සිට කටයුතු කරන තමන් බුදුදහම පිළිබඳව පොත්පත් රාශියක්‌ පරිශීලනය කොට ඇති බවත් බුදුන්වහන්සේගේ දේශනා අනුව යමින් මනා ශික්‍ෂණයකින් යුතුව මහජන සේවය වඩාත් ඵලදායී ලෙස ඉටුකිරීම සඳහා ධර්මානුකූල ජීවිතයක්‌ ගතකිරීමේ අරමුණින් තමන් තාවකාලිකව හෝ පැවිදි බව ලැබීමට තීරණය කළ බවත් ජර්මනියේ රතනසිරි හිමියෝ "දිවයින" ට පැවසූහ.
දේශපාලන කටයුතුවල සහ මහජන සේවයෙහි නිරත වන විට දේශපාලකයා හැම විටම ජනතාවට පරමාදර්ශී වෙමින් අවංකව කටයුතු කළ යුතු බවත් ඒ සඳහා හොඳම මග බුදුන්වහන්සේ දෙසූ ධර්මය බවත් උන්වහන්සේ කීහ.
තමා මිහින්තලේ රජමහා විහාරස්‌ථානයේ වැඩවාසය කරන කෙටි කාලසීමාව තුළ හැකිතාක්‌ භාවනානුයෝගීව වැඩසිටිමින් බුදුදහම අධ්‍යයනය කිරීමට අපේක්‍ෂා කරන බව පැවසූ ජර්මනියේ රතනසිරි හිමියෝ ඒ සඳහා සුදුසුම ස්‌ථානය මිහින්තලා පුදබිම බවත් කීහ.
දැනට ඕබන් ඩෆ් නගරයේ නගරාධිපතිවරයා ලෙස ක්‍රියා කරන තමන් වහන්සේ 2015 වසරේදී නැවත වරක්‌ නගරාධිපති ධුරයට තරග කිරීමට අපේක්‍ෂා කරන බවත් උන්වහන්සේ පැවසූහ.
තමන් වහන්සේ මීට මාස කීපයකට පමණ ඉහතදී ජර්මනියේ ඕබන් ඩෆ් නගරයට වැඩම කළ අවස්‌ථාවේ එහි පැවති උත්සවයකදී නගරාධිපති හර්මන් ආකර් මහතා හමු වූ බවත් එහිදී බුදුදහම කෙරෙහි ආදරයක්‌, හැඟීමක්‌ තිබෙන තමාට තාවකාලිකව හෝ පැවිදි බව ලැබීමට කැමැත්තක්‌ ඇති බව හර්මන් ආකර් මහතා පැවසූ බවත් ඒ අනුව මේ රටට පැමිණ ඔහු මෙලෙස තාවකාලිකව පැවිදි දිවියට පත් වූ බවත් මිහින්තලේ රජමහා විහාරාධිපති වලවාහැංගුණුවැවේ ධම්මරතන හිමියෝ පැවසූහ.
මෙම අවස්‌ථාවට ඕබන් ඩෝෆ් නගර සභාවේ නාගරික මන්ත්‍රීවරියක වන ඇනට්‌ එල්බන් මහත්මිය සහ ඇගේ සැමියා වන ආර්. එන්. එල්බන් මහතා ද එක්‌වූහ.
ඡායාරූපය - අනුරාධපුර විශේෂ - පර්සි කුරුනේරු
http://www.divaina.com/2013/12/31/news15.html
ද්‍රවිඩ සන්ධාන මන්ත්‍රී එස්‌. ශ්‍රීධරන් මහතා දිගින් දිගටම රාජ්‍ය විරෝධී ක්‍රියාදාමයන්හි නිරතවීම නිසා ඔහුව පාර්ලිමේන්තුවෙන් නෙරපීමේ යෝජනාවක්‌ ගෙන ඒම කෙරෙහි රජයේ අවධානය යොමුවී ඇත.
ශ්‍රීධරන් ඉන්දියාවේ සංචාරයක නිරතවී ආපසු මෙරටට එන අවස්‌ථාවේ මැයි 17 නමැති තමිල්නාඩු බෙදුම්වාදී සංවිධානයේ ක්‍රියාකාරිකයකු වූ තමිල්මානි ප්‍රභාකරන්ද මෙරටට කැඳවාගෙන විත් ඇතැයි ආරක්ෂක බුද්ධි අංශ රජයේ බලධාරීන්ට දැනුම් දී තිබේ.
ශ්‍රීධරන් පාර්ලිමේන්තුවෙන් නෙරපීමට 2/3 ක ඡන්දයක්‌ අවශ්‍ය වේ.
ඩෙල්ෆ් දූපතේ පදිංචිකරුවකු වූ ශ්‍රීධරන් පසුව කිලිනොච්චි විදුහලේ විදුහල්පති ලෙසද ක්‍රියාකර ඇත.
යාපනයේ කොටි හමුදා නායක තීපන් ඔහුගේ සමීපතම ඥතියෙක්‌ වේ.
ශ්‍රීධරන් උතුරේ ගිනි ඇවිලවීමට උත්සාහ කරනවා යෑයි ආරක්ෂක බුද්ධි අංශ වැඩිදුරටත් රජයට අනතුරු අඟවමින් දන්වා ඇත.
කීර්ති වර්ණකුලසූරිය
http://www.divaina.com/2013/12/31/news08.html
Pic
Source
දකුණු සුඩානයේ ඇතිවූ ගැටුම් වලින් පුද්ගලයන් 120,000 ක්‌ අවතැන්වී ඇති බව එක්‌සත් ජාතීන්ගේ සංවිධානය කියයි.
ඉකුත් දෙසැම්බර් 15 දා සිට දකුණු සූඩාන රජයට එරෙහිව කැරැල්ලක්‌ ඇතිව තිබේ.
දකුණු සූඩාන වැසියන්ගේ ජීවිත බේරා ගැනීම සඳහා ආධාර වශයෙන් ඩොලර් මිලියන 166 ක්‌ අවශ්‍ය බව ආධාර සංවිධාන කියයි.
ජනපති සල්මා කිර්ට එරෙහි කැරළිකරුවෝ එරට තෙල් ළිංවල බලය අල්ලාගෙන ඇත.
http://www.divaina.com/2013/12/30/forign03.html
සූඩානය ගැන තතු
Pic
Source
මහනුවර හන්තාන රක්‍ෂිතය ආසන්න ප්‍රදේශයේ ඊයේ (28 දා) සවස ඇති වූ හදිසි ගින්නක්‌ හේතුවෙන් අක්‌කර 05 ක පමණ ප්‍රදේශයක්‌ විනාශ වී ඇත.
පෙරේදා සවස 3.30 ට පමණ ඇති වූ මෙම ගින්න මැඬපැවැත්වීමට ශ්‍රී ලංකා ගුවන් හමුදාව, යුද හමුදාව, නාවුක හමුදාව හා පොලිස්‌ නිලධාරීන් මෙන්ම ගිනි නිවන හමුදාවේ නිලධාරීන් විසින් වහා පියවර ගෙන ඇත. සවස 6.30 වන විට ගින්න සම්පූර්ණයෙන්ම නිවා දැමීමට හැකි වූ බව පොලිසිය සඳහන් කරයි.
මහනුවර හන්තාන රූපවාහිනි කුලුන අවට ආසන්න ප්‍රදේශයක ඇති වූ මෙම ගින්නෙන් කිසිදු දේපළ හෝ ජීවිත හානි සිදු වී නැතැයි පොලිසිය වැඩිදුරටත් සඳහන් කරයි.
මෙම ගින්නට හේතුව මෙතෙක්‌ අනාවරණය වී නොමැති අතර පොලිසිය පරීක්‍ෂණ පවත්වයි.
ධම්මික සල්වතුර
http://www.divaina.com/2013/12/30/provin02.html
Pic
Source
අධ්‍යාපන අමාත්‍යාංශය මගින් 'ශ්‍රී ලාංකේය අධ්‍යාපනයේ හැරවුම' නමින් ග්‍රන්ථයක්‌ නිකුත් කර තිබේ. මෙවැනි ලක්‍ෂණ සහ බරපතළ නම් ඇති ග්‍රන්ථ නිකුත් කිරීම කිහිප ආකාරයකින් හොඳ ය. පළමුව, නමෙහි ඇති බරපතළකම සහ ශාස්‌ත්‍රීය ගතිය නිසා වැඩි දෙනා පොත කියවන්නේ නැත. එහෙත් කවුරු හෝ ඒ පොත ගැන ප්‍රශ්න කළොත් "හරි ෂෝක්‌ පොත මාර ශාස්‌ත්‍රීයයි. ඒ වගේ කරුණු හොයන්න අවුරුදු ගණනක්‌ පර්යේෂණ කරන්න ඕනෑ..." යනාදී වශයෙන් කියා බේරිය හැකි ය. එවැනි පොත්වලින් ලැබෙන ඊළඟ ප්‍රයෝජනය වන්නේ රටේ මුද්‍රණ කර්මාන්තයේ පැවැත්ම තහවුරු වීම ය. තෙවනුව කඩදාසි කර්මාන්තයට ද මේ පොත් දායක වේ. පරණ කඩදාසි ප්‍රතිචක්‍රීකරණය කර දුන් කඩදාසි නිෂ්පාදනය කිරීමේදී මේ පොත් කඩදාසි පල්ප් සෑදීම සඳහා යොදා ගැනීමට පුළුවන. මෙබඳු පොත්වලින් පුරවන ලද ගබඩා ඇති රජයේ දෙපාර්තමේන්තු ඕනෑ තරම් ලංකාවෙහි තිබේ. මෙයට වසර විස්‌සකට පෙර පොත්වල මිතුරා දරුවා ය. මෙකල පොත්වල මිතුරා මීයා සහ කාවාය. එසේම වේයාය.
'ශ්‍රී ලාංකීය අධ්‍යාපනයේ හැරවුම' පොතෙහි වැදගත් කරුණු කිහිපයක් තිබේ. පළමුකොට, මේ රටේ සමස්‌ත ශිෂ්‍ය සංඛ්‍යාව හතළිස්‌ ලක්‍ෂ හාරදහසක්‌ බව පොත කියයි. දෙවනුව පුහුණු ගුරුවරුන් එක්‌ලක්‍ෂ විසිඅටදහසක්‌ සිටින බව ද එහි පළ වී ඇත. තුන්වනුව කිසිදු පුහුණුවක්‌ නැති ගුරුවරුන් පන්දහස්‌ අටසිය තිස්‌තුනක්‌ පාසල්වල සේවය කරන බව ද පොතෙහි සඳහන් ය. මෙන්න මේ තුන්වැනි කරුණ කියවන විට අපට හැඟී යන්නේ ශ්‍රී ලාංකීය අධ්‍යාපනය හැරවී ආපස්‌සට ගොස්‌ භයානක පල්ලමක්‌ කරා යොමුවන බව ය. මේ පල්ලම වූ කලී අකුරු ලිවීමට නොදන්නා, ඒ නිසා මනස සහ අත අතර කිසිදු ගනුදෙනුවක්‌ කිරීමට නොදත්, පරිගණක කී බෝඩ් එක පමණක්‌ හැසිරවීමට දන්නා පරම්පරාවක්‌ සිටින පල්ලමකි. ගෝලීයකරණයට සහ නවලෝක අනුක්‍රමයට අනුව නම් මේ පල්ලම ඉතා හොඳ ය. එහෙත් සිංහල ක්‍රමයට නොහොත් ලාංකීය ක්‍රමයට නම් මේ පල්ලම නරක ය.
නුපුහුණු ගුරුවරුන් ළමයින්ට ඉගැන්වීම දෙ ආකාරයක අනතුරකි. පළමුව, ළමයින්ට උගැන්වීමට තමන් සතුව යමක්‌ ඇතත් එය හරියට උගන්වන ආකාරය ගුරුවරයා නොදනී. දෙවනුව ඒ ගුරුවරයා උගන්වන අවිධිමත් දේවල් ඉගෙනීමට ළමයාගේ මනස ද නොදනී. මෙහිදී ජනප්‍රිය සිංහල වදන්වලියේ එන පරිදි ගුරාත් ගෝලයාත් යන දෙදෙනාම එකට 'චාටර්' වෙති. සිලබස්‌ එකක්‌ හෙවත් විෂය නිර්දේශයක්‌ කළමනාකරණය කිරීමට පුහුණුවක්‌ අවශ්‍ය ය. විෂය නිර්දේශයට අනුව පාඩම් උගන්වන විට ළමයි නගන ප්‍රශ්නවලට උත්තර දීමට පුහුණුවක්‌ අවශ්‍ය ය. ගුරු අභ්‍යාස විද්‍යාලය සහ ගුරු පුහුණුව යන ප්‍රශ්නෝත්තර තරගවලට ළමයින් සහ ගුරුවරුන් පුරුදු කිරීම බවක්‌ මෙයින් අදහස්‌ නොකෙරේ. මෙයින් කියෑවෙන්නේ ළමයා කළමනාකරණය කර ගැනීමට හයියක්‌ ගුරුවරුන්ට තිබිය යුතු බව පමණි. ගුරුවරයාට ඒ ශක්‌තිය නැති බව තේරුණු විට ගෝලයා, ගුරාගේ කරට නගින්නට තැත් කරයි. පාසල් ශිෂ්‍යයා යනු ඉතා ප්‍රවේසමින් පරිහරණය කළ යුතු ඉතාම යහපත්, සුපේෂල ශික්‍ෂාකාමී, එහෙත් වැඩේ වරද්දගත් විට මරුසිරාගේ තත්ත්වයට පත්විය හැකි භයානක ජොකියෙකි. 'ජොකියා' යනුවෙන් අදහස්‌ කෙරෙන්නේ ගෝලයා ගුරුගේ පිට උඩට යැමට තැත් කිරීම බව මෙහිලා සඳහන් කරමු.
ගුරුවරුන් පුහුණු කිරීමට ආණ්‌ඩුවට 'කැපසිටි' හෙවත් ධාරිතාවක්‌ නැති බව පෙනෙයි. ඔවුන් ගුරු වෘත්තියට බඳවාගන්නට ඇත්තේ දේශපාලන උපකාර වශයෙන් යෑයි කෙනෙක්‌ කීවොත් අප එයට ද විරුද්ධ ය. විශාල රැකියා හිඟයක්‌ පවතින රටක තරුණ තරුණියන් සේවයට බඳවාගෙන නිකම් හෝ වැටුප් දිය යුතුය. නැත්නම් වෙනත් ප්‍රශ්න හටගනී. එහෙත් පුහුණු කිරීමට බැරි තරම් ගුරු පිරිසක්‌ සේවයට බඳවා ගැනීමට ආණ්‌ඩුව කටයුතු කළේ ඇයිද යන්න අපට ප්‍රශ්නයකි.
http://www.divaina.com/2013/12/30/editor.html
Pic
Source
පසුගියදා නිව්යෝර්ක්‌ නගරයේ ඉන්දියානු නියෝජ්‍ය කොන්සල් ජනරාල්වරිය ඇමරිකානු නිලධාරීන් විසින් හිරභාරයට ගැනීමේ සිද්ධිය නිසා ඉන්දියාවත් ඇමරිකාවත් අතර ද්විපාර්ශ්වික සම්බන්ධතාවය ඉතිහාසයේ වෙනත් කිසිදාකට වඩා පහත් අඩියකට වැටුණු බව කිව හැක. මීට පෙර දශකවලදී ඉන්දීය ආණ්‌ඩුවත් ඇමරිකාවත් අතර නොගැලපීම් හා මත වෙනස්‌කම් තිබුණද මෙවර ඇතිවී තිබෙන්නේ හුදෙක්‌ම ආණ්‌ඩු අතර ප්‍රශ්නයක්‌ නොව ඉන්දීය මහජනතාව අතරින්, විශේෂයෙන්ම ඉන්දියාවේ බලගතු මධ්‍යම පන්තිය තුළින්ම ජනිතවී ඇති ඇමරිකානු විරෝධයකි. ඉන්දියාව සම්බන්ධයෙන් ඇමරිකාවේ වූ මේ සිදුවීම ලංකාවේ අපටද වැදගත් වෙයි. එමෙන්ම මේ ඇතිවී තිබෙන තත්ත්වය නිසා 2014 මාර්තු මාසයේදී ජිනීවා නුවර පැවැත්වීමට නියමිත එක්‌සත් ජාතීන්ගේ මානව හිමිකම් කවුන්සිලයේ ඉන්දියාව ඡන්දය දෙන ආකාරය වෙනස්‌ වීමට ඉඩ ඇත.
ලෝකයේ විශාල ප්‍රජාතන්ත්‍රවාදී රටවල් දෙකක්‌ අතර ඇතිවී තිබෙන මෙම සිද්ධිය ගෘහ සේවිකාවක්‌ මුල්කරගත් ප්‍රශ්නයකින් පැන නැගුණකි. නිව්යෝර්ක්‌ නගරයේ ඉන්දීය නියෝජ්‍ය කොන්සල් ජනරාල්වරිය වන දිව්‍යානි කොබ්රගේඩ්ට එරෙහිව ඇති චෝදනාව වන්නේ ඇයගේ ඉන්දීය ගෘහ සේවිකාව ඇමරිකාවට ගෙන ඒමට පුරවන ලද වීසා ඉල්ලුම් පත්‍රයේ ඇයට ගෙවනවා යෑයි කියා තිබූ වැටුපට වඩා අඩු වැටුපක්‌ ඇයට ගෙවා තිබෙන බවයි. ඇමරිකාවේ මෙය වංචනික ලෙස වීසා ලබා ගැනීමක්‌ හා කම්කරුවෙක්‌ "සූරා කෑමක්‌" හැටියට නිර්වචනය වීම නිසා ඇයට එරෙහිව අපරාධ නඩුවක්‌ ගොනුවී ඇත.
ඇමරිකානු බලධාරීන් මෙම ඉන්දීය තානාපති නිලධාරිනියට නඩු පැවරීමට පෙර ඇය හිරභාරයට ගත්තා පමණක්‌ නොව එය කර තිබුණේද ඇය තම දරුවා පාසලට ඇරලවන අවස්‌ථාවේය. ඒ අවස්‌ථාවේදී රාජතාන්ත්‍රික නිලධාරිනියගේ දැත්වලට මාංචු දමා ගෙනගොස්‌ සියලු ඇඳුම් ගලවා යෝනි මාර්ගය හා ගුද මාර්ගය ඇතුළු සිරුරේ සියලු විවර පරීක්‍ෂා කර බලා ඇත. මේ ආකාරයේ සිරුරේ විවර පරීක්‍ෂාවක්‌ යනු රෝහලක කෙරෙන සායනික ක්‍රියාදාමයක්‌ නොව ඒ අවස්‌ථාවේ එතන සිටින නිලධාරිනියක්‌ තම දැත්වලට රබර් අත්වැසුම් දමා ඇඟිලිවලින් කරන රළු ක්‍රියාදාමයකි. තානාපති නිලධාරිනියට මේ සියල්ල ඉවසීමට සිදුවූවා පමණක්‌ නොව ඇයට ඇප ලබාදෙනතුරු රඳවා තැබුවේද ගණිකාවන් හා කුඩුකාරියන් රඳවා සිටි සිරමැදිරියකය.
නිව්යෝර්ක්‌ නගරයේ තම නියෝජ්‍ය කොන්සල් ජනරාල්වරියට සිදුවූ මෙම අකරතැබ්බ ගැන ආරංචි වූ විට මුළු ඉන්දියාවම ගිනි ගත්තේය. මෙම තානාපති නිලධාරිනියට එරෙහිව ඇමරිකානු ආණ්‌ඩුව නිකන්ම නඩු පැවරුවේ නම් එය විශේෂ අවධානයට යොමුවන කාරණයක්‌ නොවනු ඇත. නමුත් ඉන්දියාවේ ප්‍රධාන පෙළේ තානාපති නිලධාරිනියකට මාංචු දමා ගෙනගොස්‌ යෝනි හා ගුද මාර්ග පරීක්‍ෂාවට ලක්‌කොට ඇයව ගණිකාවන් හා කුඩුකාරියන් සමග සිර කොට තැබීම සෑම ඉන්දියානුවෙක්‌ම තමාට පුද්ගලිකව සිදුවූ අපහාසයක්‌ ලෙස ගණන් ගෙන ඇති බව පෙනේ. මෙම තානාපති නිලධාරිනියට එරෙහිව ඇමරිකාවෙන් නඟා ඇති එක්‌ චෝදනාවක්‌ වන්නේ ඇය තම නිවසේ සිටි ගෘහ සේවිකාව සූරාගෙන කෑ බවයි. සාමාන්‍යයෙන් ඉන්දියාවේ නම් මධ්‍යම පන්තියේ කාන්තාවක්‌ තම ගෘහ සේවිකාව සූරා කෑමකට ලක්‌ කළා යෑයි චෝදනාවක්‌ නැඟුවහොත් ජනතාවගේ අනුකම්පාව යන්නේ එම ගෘහ සේවිකාව වෙත මිස ඇයගේ ස්‌වාමි දියණිය වෙත නොවේ. නමුත් මේ අවස්‌ථාවේදී සියල්ල වැඩකරන්නේ අනෙක්‌ පැත්තටය. මෙම ඉන්දීය තානාපතිනියගේ ගෘහ සේවිකාවට ඉන්දියාවේ හැටියට ඇත්ත වශයෙන්ම ගෙවා ඇති ගණන විශාල වැටුපකි. එය ඇමරිකාවට යැමට අත්සන් කරන ලද වීසා ඉල්ලුම් පත්‍රයේ සඳහන් ගණනට සමාන නොවූවත් ඉන්දියාවේ සිටින ගෘහ සේවිකාවකට ලැබිය හැකි මුදලට වඩා කීප ගුණයකින් වැඩි මුදලකි. මේ හේතුව නිසා මත භේදයට තුඩුදුන් මෙම ගෘහ සේවිකාවට අඩුම වශයෙන් ඉන්දියාවේ සිටින ගෘහ සේවිකාවන්ගේ වත් අනුකම්පාවක්‌ ලැබී නැති බව ඉන්දීය මාධ්‍යයේ පළවූ වාර්තාවලින් පෙනේ. මුළු ඉන්දියාවම ගෙන ඇත්තේ තානාපති නිලධාරිනියගේ පැත්තය.
නිව්යෝර්ක්‌ නගරයේදී තම තානාපති නිලධාරිනියට සිදුවූ අපහාසයට ප්‍රතිචාර දැක්‌වීමක්‌ වශයෙන් ඉන්දියාව දැඩි ක්‍රියාමාර්ග කීපයක්‌ ගෙන ඇත. ඔවුන් මුලින්ම කළේ නවදිල්ලියේ ඇමරිකානු තානාපති කාර්යාලය ඉදිරියේ තිබූ ආරක්ෂක මාර්ග බාධක බුල්ඩෝසර් හා බැකෝ යන්ත්‍ර දමා ඉවත් කිරීමයි. ඒ අවස්‌ථාවේදී ඉන්දියාවට පැමිණ සිටි ඇමරිකානු කොංග්‍රස්‌ මණ්‌ඩලයේ නියෝජිත කණ්‌ඩායම හමුවීම ඉන්දියාවේ ආණ්‌ඩුව මෙන්ම විපක්‍ෂයද ප්රතික්ෂේප කළේය. ඉන්දියාව තුළ සිටින ඇමරිකානු කොන්සල් මට්‌ටමේ නිලධාරීන්ගේ තානාපති හැඳුනුම්පත් සියල්ල අවලංගු කොට ඔවුන්ට අඩු වරප්‍රසාද පිරිනමන නව හැඳුනුම්පත් නිකුත් කිරීමට පියවර ගෙන ඇත. නවදිල්ලියේ ඇමරිකානු තානාපති කාර්යාලයට මත්පැන් ගෙන්වීමට තිබූ බලපත්‍රයද අහෝසි කොට ඇති අතර ඉන්දියාවේ සිටින ඇමරිකානු නිලධාරීන් තම ගෘහ සේවිකාවන්ට ගෙවන වැටුප් යනාදිය පිළිබඳව වෙනමම විමර්ශනයක්‌ ආරම්භ කොට ඇත. ඉන්දියාවේ සිටින එක්‌ ඇමරිකානු තානාපති නිලධාරියෙක්‌ සී.එන්.එන්. ප්‍රවෘත්ති සේවයට පවසා තිබුණේ ඉන්දියානු පොලිසිය විසින් කුමක්‌ හෝ හේතුවක්‌ පෙන්වා ඇමරිකානු තානාපති නිලධාරියෙක්‌ව සිර භාරයට ගෙන ඔහුටද මාංචු දමා සියලු ඇඳුම් ගලවා ශරීරයේ විවර පරීක්‍ෂාවකට ලක්‌ කරාවි යෑයි ඔවුන් බියෙන් සිටින බවයි.
නිව්යෝර්ක්‌ නගරයේ මෙකී ඉන්දීය තානාපති නිලධාරිනියගේ ගෘහ සේවිකාව පිළිබඳ ප්‍රශ්නය එක්‌ වරම ඇතිවූවක්‌ නොව මාස ගණනක්‌ මුළුල්ලේ ඇදී ගිය ක්‍රියාදාමයක ප්‍රතිඵලයකි. පසුගිය ජුනි මාසයේ සිට නිව්යෝර්ක්‌ නගරයේ තානාපතිනියගේ නිවසෙන් ගෘහ සේවිකාව අතුරුදන් වී ඇත. ඉන්දියාවේදී ගිවිසුම් අත්සන් කොට ඇමරිකාවට ගොස්‌ අතුරුදන් වූ මේ ගෘහ සේවිකාව පිළිබඳව ඉන්දීය ආණ්‌ඩුව විමර්ශනයක්‌ ආරම්භ කොට තිබිණි. ඇමරිකානු ආණ්‌ඩුව පසුගියදා ඉන්දියානු තානාපති නිලධාරිනියව සිරභාරයට ගැනීමට දින කීපයකට පෙර අතුරුදන් වූ ගෘහ සේවිකාවගේ මුළු පවුලම ඉන්දියාවෙන් ඇමරිකාවට ගෙන්වා තිබිණි. මේ ආකාරයට ඉන්දීය පුරවැසියන් හොර රහසේ ඉන්දියාවෙන් ගෙනයැම ගැන ද ඉන්දීය ආණ්‌ඩුව මහත් සේ උරණ වී සිටී. ඉන්දීය ආණ්‌ඩුව තම තානාපති නිලධාරිනියව ඇමරිකානු උසාවියෙන් බේරා ගැනීම සඳහා ඇයව නිව්යෝර්ක්‌ නගරයේම එක්‌සත් ජාතීන්ගේ සංවිධානයේ ධුරයකට මාරුකර යවා ඇත. ඇයගේ නව ධුරය නිසා ඇයට ඇමරිකානු උසාවියෙන් ආරක්‍ෂාවක්‌ ලැබේ. නමුත් ප්‍රශ්නයකට ඇත්තේ ඇයට එරෙහිව උසාවියේ චෝදනා ගොනුකොට තිබෙන්නේ නව ධුරය ලැබීමට පෙරය. ඒ නිසා ඇයට දිගටම තානාපති මුක්‌තභාවය ලැබීමට පෙර ගොනු කරන ලද චෝදනාවලට උත්තර බැඳීමට සිදුවනු ඇත. මේ අවස්‌ථාවේදී දිව්Hdනි කොබ්රගේඩ් නමැති මෙම නිලධාරිනිය සිටින්නේ ඇමරිකානු ඩොලර් 250,000 ක ඇප ගිවිසුමක්‌ මතය. ඇය සතියකට වතාවක් ඇමරිකානු පොලිසියේ පෙනී සිටිය යුතුය. ඇය චෝදනාවලට වැරදිකරු වුවහොත් අවුරුදු 15 ක සිර දඬුවමක්‌ විඳීමට සිදුවනු ඇත. ඇමරිකානු බලධාරීන් ද මේ ප්‍රශ්නයෙන් පස්‌ස ගසන්නේ නැත. ඔවුන් කියන්නේ ඇමරිකාවේ නීතිය කාටත් එක සමානව ක්‍රියාත්මක විය යුතු බවයි. එමෙන්ම මෙම තානාපති නිලධාරිනිය හිරභාරයට ගෙන ඇයගේ ඇඳුම් ගලවා ශරීර විවර පරීක්‍ෂා කිරීමට ඇමරිකාවේ සාමාන්‍ය ක්‍රියාපටිපාටියට අනුකූල බව කියමින් එය ද ඔවුන් සාධාරණීකරණය කරයි.
මෙම තානාපති නිලධාරිනියට සිදුවූ මේ අකරතැබ්බයට ඉන්දියාවේ සෑම තරාතිරමකම මිනිසුන් දක්‌වා ඇති ප්‍රතිචාරය අහඹු ලෙස ඇතිවූවක්‌ ද නොවේ. මෙය පසුගිය වසර ගණනාව තුළ ඇමරිකාව විසින් ඉන්දියාවට කර ඇති මහා අපහාස වැලක නොඉවසිය හැකි අවසාන සිද්ධියකි. ලංකාවේ රාජපක්‍ෂ ආණ්‌ඩුව බලයට පත්වීමටත් පෙර ඇමරිකානු ආණ්‌ඩුව ගුජරාට්‌ ප්‍රාන්තයේ මහ ඇමැති වූ නරේන්ද්‍ර මෝඩිට ඇමරිකාවට පැමිණීම තහනම් කරන ලදී. ඒ ඔහු මානව හිමිකම් උල්ලංඝනය කර තිබෙනවාය යන චෝදනාව මතය. ඉන්පසු 2009 දී ඉන්දියාවේ හිටපු ජනාධිපතිවරයකු වන අබ්දුල් කලාම් මහතා ගුවන් යානයකට ගොඩවීමට පෙර ඇමරිකානු ආරක්ෂක නිලධාරීන් විසින් මුලු සර්වාංගයම අතපත ගා පරීක්‍ෂාවට ලක්‌ කොට තිබිණි. ඒ ඔහු හිටපු ජනාධිපති බව දැන දැනම ය. එම වසරේම ඉන්දීය නළු ශාරුක්‌ ඛාන් මුස්‌ලිම් නමක්‌ තිබීම හේතුවෙන් ඇමරිකානු ගුවන්තොටුපළක පැය කිහිපයක් අත්අඩංගුවේ සිටියේය. 2010 දී ඇමරිකාවේ සිටි ඉන්දීය තානාපතිනිය වූ මීරා ශංකර් මැතිනිය මිසිසිපි ගුවන්තොටුපළේදී පැත්තකට ගෙනගොස්‌ පරීක්‍ෂාවට ලක්‌ කොට තිබිණි. තමා ඇමරිකාවේ සිටින ඉන්දීය තානාපතිනිය බව පවසා තානාපති මුක්‌ත භාවය ප්‍රකාශ කොට සිටියදීත් ඇය මේ ආකාරයට පරීක්‍ෂාවට ලක්‌කොට තිබිණි. 2011 දී ඉන්දියාවේ හිටපු ජනාධිපති අබ්දුල් කලාම් මහතා නිව්යෝර්ක්‌ ගුවන්තොටුපළේදී නැවත වතාවක් පරීක්‍ෂාවට ලක්‌ වූ අතර මේ දෙවැනි අවස්‌ථාවේදී ඇමරිකානු නිලධාරීන් විසින් ඔහු පැලඳ සිටි සපත්තු කුට්‌ටමත් කබායත් පරීක්‍ෂා කිරීමට යෑයි කියා ගලවාගෙන ගොස්‌ තිබිණි. ඔවුන් එය කළේ ද ඔහු ඉන්දියාවේ හිටපු ජනාධිපති බව හොඳාකාරවම දැනගෙනය.
2012 සැප්තැම්බර් මාසයේදී ඉන්දීය පාලක කොංග්‍රස්‌ පක්‍ෂයේ නායිකා සෝනියා ගාන්ධි ඇමරිකානු රෝහලක වෛද්‍ය ප්‍රතිකාර ලබමින් සිටි අවස්‌ථාවේදී ඇමරිකානු උසාවියක්‌ විසින් ඇය 1984 ඉන්දිරා ගාන්ධිගේ ඝාතනයත් සමග ඉන්දියාව පුරා පැතිර ගිය සික්‌ විරෝධී කෝලහාලයට වගකිව යුත්තන් ආරක්‍ෂා කොට ඔවුන්ට වරප්‍රසාද පැවරීමේ චෝදනාවට වගඋත්තරකරු කොට ඇයට සිතාසි නිකුත් කළේය. සෝනියා ගාන්ධි ඒ අවස්‌ථාවේදී ගැලවුණේ ඇයට සිතාසි ලැබුණේ නැතැයි කීමෙනි. නමුත් මෙහි ප්‍රතිඵලය වන්නේ සිර භාරයට පත් වීමේ අවදානම නිසා සෝනියා ගාන්ධිට ද නැවත ඇමරිකාවට යැමට නොහැකි වීමයි. මේ අනුව ඉන්දියාවේ කොංග්‍රස්‌ පක්‍ෂයේ නායිකාව වන සෝනියා ගාන්ධිට පමණක්‌ නොව භාරතීය ජනතා පක්‍ෂයේ අගමැති අපේක්‍ෂක නරේන්ද්‍ර මෝඩි යන දෙදෙනාටම ඇමරිකාවට යාමට නොහැකි තත්ත්වයක්‌ උද්ගත වී ඇත. පසුගිය මස නොවැම්බර් 19 වැනිදා ඇමරිකාවේ රිපබ්ලිකන් පක්‍ෂය හා ඩිමොක්‍රටික්‌ පක්‍ෂය යන දෙකම එකතු වී නරේන්ද්‍ර මෝඩිටත් භාරතීය ජනතා පක්‍ෂයටත් එරෙහිව ඇමරිකානු කොංග්‍රස්‌ මණ්‌ඩලයේ විශේෂ යෝජනාවක්‌ ඉදිරිපත් කළ ආකාරය අපි පසුගියදා විස්‌තර කෙරුවෙමු. මේ යෝජනාවේ එක්‌ පරමාර්ථයක්‌ වුයේ 2014 ඉන්දීය මහ මැතිවරණයේදී භාරතීය ජනතා පක්‍ෂයට ඡන්දය නොදෙන්නැයි ඉන්දීය ජනතාවට උපදෙස්‌ දීමටය.
මේ අතරතුර 2012 සැප්තැම්බර් මාසයේදී සෝනියා ගාන්ධිට සිතාසි නිකුත් කළ ඇමරිකානු උසාවිය නැවත වරක්‌ ඇයට එරෙහිව ඇති චෝදනාවලට 2014 ජනවාරි 2 වැනිදාට පෙර උත්තර බඳින්නැයි කියමින් නොතීසි නිකුත් කර ඇත.
1984 සික්‌ විරෝධී කෝලහාල යනු ඉන්දියාවේ සිදුවූ සිද්ධියකි. ඉන්දියාවේ සිදුවූ දෙයකට ඇමරිකානු උසාවියක්‌ ඇමරිකාවේදී නඩු ඇසීමෙන් සිදුවන්නේ ඉන්දියාවද තමාට අයත් බලප්‍රදේශයක්‌ වශයෙන් ඇමරිකානු උසාවිය සලකා කටයුතු කිරීමයි. ඒ අනුව ඇමරිකානු උසාවියකට ඕනෑම ඉන්දීය පුරවැසියකුට එරෙහිව නඩු අසා දඬුවම් ක්‍රියාත්මක කිරීමට ද බලය ඇත. මේ ආකාරයට නඩු පවරා ඇත්තේ ද වත්මන් ඉන්දීය පාලක පක්‍ෂයේ නායිකාවට එරෙහිවය· මුලු ඉන්දියාවේම සියලුම පුරවැසියන්ගේ ශරීර විවර ඇමරිකාව විසින් පරීක්‍ෂාවට ලක්‌ කළ ආකාරයේ ප්‍රතිචාරයක්‌ ඉන්දියාව පුරා අපට දැන් දක්‌නට ලැබෙන්නේ මේ සියලු සිද්ධීන් එකපිට එක සිදුවීම නිසාය. නමුත් මේ සියල්ල තිබියදීත් ඉන්දියාව ඇමරිකාවේ මිත්‍ර රටක්‌ ලෙස සැලකේ. මිතුරන් මෙබඳු නම් සතුරන් කුමට දැයි ඕනෑම කෙනකුට මේ සිද්ධීන් දාමය දෙස බලන විට පෙනේ. ඇමරිකාව විසින් 2005 සිට අද දක්‌වා ඉන්දියාවට කර ඇති අපහාස මෙන් දශමයක්‌ වත් ලංකාවට කර නැති බව කිව යුතුය.
ඇමරිකාවට එරෙහිව ඉන්දියාව තුළ ඇති වී තිබෙන මේ විරෝධයත් සමග ලබන මාර්තු මාසයේදී ඉන්දියාවට ඇමරිකාව සමග එක්‌ වී ලංකාවට එරෙහිව යෝජනා ගෙන ඒමට හැකිවේද යන්න සැක සහිතය. අද භාරතීය ජනතා පක්‍ෂයත් කොංග්‍රස්‌ පක්‍ෂයත් යන දෙකම තරගයට ඇමරිකාවට විරෝධය පළ කරති. මේ පක්‍ෂ දෙකටම ඇමරිකාවෙන් මහා බරපතළ අපහාස සිදුවී ඇත. ඒ හේතුවෙන් ලබන මාර්තුවේදී ඇමරිකාව ලංකාවට එරෙහිව ගෙන එන යෝජනාවේදී ඡන්දය දීමෙන් වැලකී සිටීමට ඉන්දියාවට සිදුවීමට ඉඩ ඇත. මෙවර තමිල්නාඩුවේ බලපෑම නිසාවත් ඉන්දීය මහ ආණ්‌ඩුව ඇමරිකාව සමග එක්‌ වී ලංකාවට එරෙහිව යෝජනා ගෙන ඒවි යෑයි සිතීමට අසීරුය. ඇමරිකාව අතින් අපහාසයට ලක්‌වූ ඉන්දීය හිටපු ජනාධිපති අබ්දුල් කලාම් ද තමිල්නාඩුවේ උපත ලද දෙමළ කතා කරන මුස්‌ලිම්වරයකු බව මෙහිදී සැළකිය යුතුය.
වම් ඉවුර | සී. ඒ. චන්ද්‍රප්‍රේම
http://www.divaina.com/2013/12/30/feature01.html
වකුගඩු රෝගය මාරාන්තික නොවේ යෑයි අනුරාධපුර වකුගඩු රෝහලේ විශේෂඥ වෛද්‍ය රජීව දිසානායක මහතා අවධාරණය කරයි. දැනට ජාතික ප්‍රශ්නයක්‌ බවට පත්ව ඇති වකුගඩු රෝගය සුව කිරීමේ කටයුතු අංග සම්පූර්ණ කිරීමට ඒ සඳහා ප්‍රමුඛත්වය ලබාදී රෝගය වැළඳීමට ඇති ඉඩකඩ පාලනය කරමින් සහ එම රෝගීන්ට අවශ්‍ය සියලු ප්‍රතිකාර කලට වේලාවට නිසි පරිදි සැපයීමට පියවර ගැනීමෙන් මෙම රෝග මරාන්තික තත්ත්වයෙන් මුදවා ගත හැකි යෑයි විශේෂඥ වෛද්‍ය රජීව දිසානායක මහතා සඳහන් කරයි.
