උතුර, ත්‍රස්‌තවාදීන් අතින් මංකොල්ලකරුවන් අතට පත්වීද? එසේ නම් නුදුරේදීම හටගනු ඇත්තේ දැනට සෝමාලියාව මුහුදු කොල්ලකාරයන් විසින් පාලනය කරනු ලැබීමේ තත්ත්වය හා සමාන තත්ත්වයකි. යුද ජයග්‍රහණයෙන් පසු උතුරේ ජනතාව සැනසිලි සහගත ලෙස ඔක්‌සිජන් ස්‌වල්පයක්‌ ආශ්වාස කරන්නට උත්සාහ කළ සැණින් කප්පම්කාරයන් කිහිපදෙනෙක්‌ මතුව වැසියන් සුද්ධ කරන්නට වූහ. එය මැඬපවත්වන ලදුව, ආවා ගෲප් නමැති තවත් කල්ලියක්‌ මතුවී මිනී මරන්නට වූහ. එයත් මැඬපවත්වන ලදී. දැන් සිටින්නේ ඩීනෝ ගෲප් නමැති අලුත්ම අලුත් කල්ලියකි. ඊයේ (10 දා) "දිවයිනේ" පළ වූ පරිදි මෙකී කල්ලියේ නායකයාට වයස අවුරුදු 18 කි. උගේ පිරිවර 20 කි. මේ කොලුවාට කසාදයක්‌ කර දීමට වයස සම්පූර්ණ ද නැද්ද යන්න අපි නො දනිමු. වයස සම්පූර්ණ නම් කසාදයක්‌ කර දී මතක හිටින්නට ගුටි දී පැත්තකට කර තැබිය යුතු ය. මොවුන් යාපනය පුරා මංකොල්ලකෑම්වල යෙදී ඇත්තේ චැනල් 4 කණ්‌ඩායමට චිත්‍රපට සැදීම පහසුවන පරිදි යුද හමුදා ඇඳුම් ඇඳගෙන ය. මේ අනුව ශ්‍රී ලංකා යුද හමුදාව නිල ඇඳුම් පිටින්ම උතුර කොල්ලකන බව කියා වාර්තා චිත්‍රපටයක්‌ සාදා ලබන අවුරුද්දේ එක්‌සත් ජාතීන්ගේ මානව හිමිකම් කවුන්සිලයට ඉදිරිපත් කිරීමට දෙමළ ජාතික සන්ධානයට සහ ඔවුන්ට ජීවත්වීමට මුදල් දෙන ඩයස්‌පෝරාවට පුළුවන. කැලම් මැක්‌රේ එම චිත්‍රපටය ඉතා අඩු මිලට සාදා දෙනු ඇත. උතුර නිරූපණය කළ හැකි චිත්‍රාගාර සහ පසුතල ලන්ඩනයේ තිබෙන අතර ඒවායේ තල් ගස්‌ ඉන්දවීම පරිගණකය මගින් කළ හැකි ය. තමිල්නාඩුවේ දෙමළ නළුවන් යොදා ශ්‍රී ලංකාවට විරුද්ධව චිත්‍රපට තැනූ චැනල් 4 කැලම් මැක්‌රේ දැන් ඉතින් මොනවා නොකරත්ද?ඉහත සඳහන් ආකාරයේ සන්නද්ධ කණ්‌ඩායම් යනු යුද්ධයක නෂ්ටාවශේෂ ය. ලිබියාවේ සිවිල් යුද්ධයක්‌ නිමවීමෙන් පසු එරට පාලනය භාරගෙන ඇත්තේ සන්නද්ධ ගෝත්‍රික කණ්‌ඩායම් විසිනි. ඊජිප්තුවේ සිවිල් යුද්ධය නිමාවී නීත්‍යානුකූල ආණ්‌ඩුවක්‌ පිහිටුවා තිබුණත් සිවිල් යුද්ධයට දායක වූ විවිධ සන්නද්ධ ගෝත්‍රික කණ්‌ඩායම් අද ඒ රට තුළ සමාන්තර පාලනයක්‌ ගෙන යති. ඇµaගනිස්‌තානයේ තත්ත්වයත් මෙයම ය. ඉරාකයත් මෙසේම ය. සිවිල් යුද්ධයක්‌ යනු අත්‍යන්තයෙන්ම නරක දෙයකි. එය නැවතුණු විට මතුවන්නේ එය තිබුණාටත් වඩා නරක තත්ත්වයකි. මේ තත්ත්වය බරපතළ වූ විට නැවත වතාවක්‌ සිවිල් යුද්ධයක්‌ හටගනී. අප කළ යුත්තේ ඒ තත්ත්වයට රට පත්වීම වළක්‌වා ගැන්මය.
යාපනේ පාතාලය කවදත් තිබිණි. 1948 දී ශ්‍රී ලංකාවට නිදහස ලැබුණු දිනයේ පටන් එය වර්ධනය විය. යුද්ධය තිබූ කාලයේදීත් මේ පාතාලය මෙහෙමම තිබුණු අතර එය පෝෂණය කළෝ කොටි ය. අද යුද්ධය නැති නිසා එහි ගැඹුර පමණක්‌ නොව එයට අනුයුක්‌ත වීමට යත්න දරන අලුත් පාතාල කණ්‌ඩායම් ද අපට පෙනෙන්නට පටන්ගෙන ඇත. 'ආවා ගෲප්' එවැන්නකි. ඩිනෝ ගෲප් දෙවැන්න ය. යුද්ධයක්‌ තිබූ භූමියක යුද්ධායුධ ගණන් කිරීමට බැරි ය. එබැවින් යාපනය වැනි ප්‍රදේශයක පාතාල කල්ලිවලට යුද අවිවලින් අඩුවක්‌ පාඩුවක්‌ තිබෙන්නට බැරි ය. යම් කිසි අඩුපාඩුවක්‌ තිබුණත් කොටි සංවිධානයේ ආයුධ වළවල් හාරා සැණෙකින් එම අඩු පාඩු සම්පූර්ණ කර ගැනීමේ හැකියාව උතුරේ මෙන්ම නැගෙනහිර පළාත්වල ත්‍රස්‌ත කණ්‌ඩායම්වලට හැකි බව අපි මතක තබා ගත යුත්තෙමු. අප ඔවුන් කුඩුපට්‌ටම් කළ යුත්තේ ඔවුන් සතු ආයුධවල ධාරිතාව ද මතකයෙහි තබාගෙන ය.
http://www.divaina.com/2014/02/12/editor.html
0 comments:
Post a Comment