රඹුක්‌ඔළුව ගම්මානය අසලින් ගලා යන්නේ දුම්බර කළුපහනා කන්ද පිසගෙන එන ලග්ගල කළු ගංගාවයි. එය අඹන් ගඟටත්, එතැනින් මහවැලි නදියටත් එකතු වීමෙන් මහවැලි ගංගාවේ දියවර වැඩි කරන්නේ මනම්පිටියට නුදුරු තුන්මෝදරිනි. දුම්බර කළුපහනා කන්දේ පිණිබිඳුවකින් පටන් ගන්නා මෙම කළු ගංගාව අතිශය රමණීය දිය දහරක්‌ බවට පත්වන්නේ දුම්බර කැලෑව තුළ තවත් සුන්දර දියඇළි දෙකක්‌ම නිර්මාණය කරමිනි. ඒවා දුම්බර දූවිලි ඇළි වශයෙන් හැඳින්වීම වඩාත් නිවැරැදිය. එනමුත් රඹුක්‌ඔළුව, ඇටන්වල, වල්පොලමුල්ල, ගඟහේන්වල, රණමුරේ, නාරංගමුව ආදී ගම්මානවල ගැමියා මෙම දිය ඇළි හඳුන්වන්නේ උඩ දූවිලි ඇල්ල හා පාත දූවිලි ඇල්ල යන නම්වලිනි. පාත දූවිලි ඇල්ල ගල් දෙබොක්‌කාවක්‌ මැද පිහිටි තරමක්‌ ගුප්ත පෙනුමකින් යුතු පරිසරයක පිහිටි දැකුම්කලු දිය ඇල්ලකි. උඩ දූවිලි ඇල්ල හරිම අපූරු තැනක පිහිටා ඇති දිය ඇල්ලකි. එනම් මෙම ඇල්ලට යන ගමන අතිශයින්ම අනතුරුදායක ත්‍රාසජනක ගමනකි. ඉතා පටු මාර්ගයක්‌ දිගේ ගමන් කළ යුතු මෙහි එක පැත්තක අඩි තුන්හාර සියයක බෑවුමකි. අනෙක්‌ පසින් දැවැන්ත ගල් බිත්තියකි. ඒ කෙසේ හෝ මෙම පටු මාර්ගය දිගේ ඉහළට ගිය විට දිය ඇල්ල මෙන්ම ඒ අසල පිහිටි දැවැන්ත ගල් ගුහාවක්‌ද දැකගත හැකිය. කොටස්‌ කිහිපයකින් සමන්විත මෙම ගල් ලෙනේ එක්‌ පසෙක හැට හැත්තෑ දෙනකුට වුවද ලැගුම් ගත හැකිය. 
මෙම ගල්ලෙනේ මීට දශකයකට පෙර එක්‌ රාත්‍රියක්‌ ලැගුම් ගැනීමේ අවස්‌ථාවක්‌ මේ ලියුම්කරුටද උදාවිය. ඒ ඇටන්වල සිට වල්පොලමුල්ල හරහා කලුපහනා කන්ද නැග මීමුරේටද, එතැනින් හුන්නස්‌ගිරියටද ගිය පාද යාත්‍රාවකට එක්‌ව සිටියදීය. එසේම දුම්බර මිතුරන් හා එක්‌ව සිටින අපට නොයෙක්‌ වර මේ දූවිලි ඇල්ල මං පෙතේ ඇවිද යැමේ අවස්‌ථා උදාවී ඇති අතර එහි යැමට කැමැති දූවිලි ඇල්ල ගල් ලෙනේ රැයක්‌ ගත කිරීමට උනන්දු අයටද දුම්බර මිතුරන් හා සමග අවස්‌ථා කිහිපයක්‌ම උදාකර දීමටද පසුගිය වකවානුවේදී අපට හැකිවිය. මෙවර දූවිලි ඇල්ල මංපෙත ඔස්‌සේ ඇවිද ගොස්‌ උඩදූවිලි ඇල්ල ගල් ලෙනේ එවන් රාත්‍රියක්‌ ගත කිරීමට අපට යළිත් අවස්‌ථාවක්‌ උදාවිය. ඒ රඹුක්‌ඔළුව ගමේ විදුහලට තෑගි බෝගත් රැගෙන නෑගම් ආ පන්නිපිටියේ මාධව මහතා ඇතුළු පිරිසේ ඉල්ලීම නිසාය. අගනුවර වාණිජ බැංකු කිහිපයක මෙන්ම වෙනත් රාජකාරිවලද නියුක්‌ත මෙම පිරිසේ උදවිය දූවිලි ඇල්ල ගල්ලෙනේ රාත්‍රියක්‌ ගත කරන්නට වෙන්කර ගත්තේ පසුගිය අප්‍රේල් මාසයේ සිටය. ඒ අනුව සංවිධානය වුණු මෙවර චාරිකාව අප පටන් ගත්තේ රඹුක්‌ඔළුවට තෑගි බෙදාදීමේ කෙටි, චාම් අවස්‌ථාවෙන් පසුවය.
ගමනට මාත් සමග මාධවගේ පවුල, ඔහුගේ සොයුරු ඇතුළු පවුල, කවදත් වන ගමන්වලදී පෙරමුණ ගන්නා ඉනෝකා, වෛද්‍ය ලලීන්ද්‍ර ඇතුළු දොළොස්‌ දෙනකුගෙන් පමණ පිරිසක්‌ එක්‌වූහ. දුම්බර මිතුරන්ගෙන් ජයසිංහ මල්ලීද, වසන්ත හා රඹුක්‌ඔළුවේ කැලෑව පීරූ තවත් පළපුරුදු ගම්වැසියන් දෙදෙනකුද ගමනට එක්‌වූහ. ඒ මේ ගමනේ ඇති අසීරුතාව නිසාමය. මුහුදු මට්‌ටමේ සිට අඩි හාරදහස්‌ පන්සියයක්‌ පමණ ඉහළින් පිහිටි දූවිලි ඇල්ල ගල් ලෙනට යන ගමන අතිශය දුෂ්කර බාධක පිරි ජල දුර්ග, ගිරි දුර්ග මැදින් යා යුතු ගමනකි. එවන් අභියෝග සියල්ලක්‌ භාර ගනිමින් කණ්‌ඩායමේ අපි දූවිලි ඇල්ල වනගත චාරිකාව ආරම්භ කළෙමු. ගල්මුල් උඩින් පැන දිය පහරවලින් බැස පාද දොවමින් දුම්බර වන වදුල තුළින් ඇවිද යන කල වනාන්තරයක අපූරුව කොතරම් විශ්මිත දැයි හැඟේ. රැහැයියන්ගේ මෙන්ම මූකලන් කොට්‌ටෝරුවන්ගේ නාදය වනාන්තරය පුරා රැව් පිළිරැව් දෙන අරුමැක්‌කේ අපි දූවිලි ඇල්ල සොයාගෙන ගියෙමු.
රඹුක්‌ඔළුවේ සිට දූවිලි ඇල්ලට අවම තරමින් කිලෝමීටර් 13 ක්‌ වත් දුර ඇත. හෝරාවලින් නම් පැය 5 - 6 ක ගමනකි. එනම් දූවිලි ඇල්ල නරඹන්නට යන්නේ නම් එය තනිකරම එක්‌දින චාරිකාවකි. එක රාත්‍රියක්‌ දූවිලි ඇල්ලේ ගතකළ යුතුමය. අපේ ගමනේදී දූවිලි ඇල්ලේ එක රාත්‍රියක්‌ ගතකරන නිසා අපට මේ ගමන් ලොකු බරක්‌ සැහැල්ලු වී ඇත. එහෙත් දණ බිම ගෑවෙන කඳු නැගීමට ඇති මේ චාරිකාව තනිකරම දුෂ්කර ක්‍රියාවකි. එය කියා විස්‌තර කරන්නට නොහැකියි. අත්දැකීමෙන් පමණක්‌ විඳිය යුතු ඒ දුෂ්කරතාව විශේෂයෙන් කාන්තා පක්‌ෂය විඳ ගත්තේ අපගේ පරම්පරාවද සිහිපත් කරමින් බව මම විශ්වාස කරමි.
කෙසේ හෝ දහවල් තේ විවේකයෙන් පසු දහවල් එක පමණ වන විට අප දුම්බර කැලෑවේ සෑහෙන පමණ දුර ගෙවා නිමකර තිබිණි. එහෙත් අපේ ගමනට මහා බාධාවක්‌ වෙමින් දහවල් දෙකට පමණ මුරුගසන් වර්ෂාවක්‌ කඩා හැලෙන්නට විය. නොකඩවා ඇද වැටුණු මෙම වැස්‌සෙන් අප මෙන්ම අපගේ ගමන් මලු සියල්ලද තෙත බරිත වූ නමුත් දූවිලි ඇල්ලේ අපේක්‍ෂිත චාරිකාව අතහැර දමන්නට අප කවුරුත් කැමැති වූයේ නැත. සියල්ලන්ගේම එකඟතාව පරිදි ගමන ඉදිරියටම ගිය අතර සවස තුනට පමණ අපට පාත දූවිලි ඇල්ලට ළඟාවීමට හැකිවිය. ඒ වන විට වැස්‌ස මඳක්‌ තුරල් වී තිබුණු නිසා පාත දූවිලි ඇල්ලේ අසිරිය විඳ ගැනීමෙන් පසු පෙරදා නවාතැනෙන් බැඳගෙන ආ දහවල් බත් ගෙඩිය පාත දූවිලි ඇල්ලේ ගල් තලාවේ දිග හැරගෙන කා වෙහෙස මඳක්‌ නිවා ගත්තේ මීළඟට එළැඹෙන ගමනේ බැරෑරුම්ම කොටසට නව ජීවයක්‌ ලබා ගන්නට මෙනි.
ජගත් කණහැරආරච්චි
http://www.divaina.com/2014/01/05/feature15.html
0 comments:
Post a Comment