ලෝකය සත්‍ය පිපාසාවෙන් සිටින යුගයක වර්තමාන භික්‍ෂු පරම්පරාව ඉංග්රීසි වැනි ජාත්‍යන්තර භාෂාවක් මැනවින් අධ්‍යනය කිරීම ධර්ම සන්නිවේදනයට මහා පිටු බලයක් යැයි පැපිළියානේ සුනේත්‍රාදේවී මහ පිරිවෙනෙහි පිරිවේනාධිපති, ශ්‍රී ජයවර්ධන පුර විශ්ව විද්‍යාලයේ ජ්‍යෙෂ්ඨ කථිකාචාර්ය පූජ්‍ය මැදගොඩ අභයතිස්ස නාහිමිපාණන් වහන්සේ ප්‍රකාශ කර සිටියහ.උන් වහන්සේ මෙලෙස ප්‍රකාශ කර සිටියේ ථේරවාදී බෞද්ධ දර්ශනය ලොවපුරා ප්‍රචාරය කිරීමට අවශ්‍ය ඉංග්රීසි දැනුම භික්‍ෂු වහන්සේලා සහ සිල් මාතාවන් සඳහා ලබාදීමේ අරමුණින් අධ්‍යාපන නියෝජ්‍ය අමාත්‍ය මොහාන් ලාල් ග්‍රේරු මහතා විසින් නොමිලේ පවත්වා ගෙන යනු ලබන භික්‍ෂු ඉංග්රීසි අධ්‍යාපන වැඩසටහන යටතේ පාඨමාලා සාර්ථකව නිම කළ භික්‍ෂුන් වහන්සේලා සහ සිල් මාතාවන්ට ඩිප්ලෝමා හා සහතික පත්‍ර ප්‍රදානය කිරීමේ අවස්ථාවට සහභාගි වෙමිනි.
ශ්‍රී ලංකා අමරපුර මහා නිකායේ අනුනායක අති පූජ්‍ය කොටුගොඩ ධම්මාවාස නාහිමි පාණන්වහන්සේගේ මූලිකත්වයෙන් පැවති මෙම ඩිප්ලෝමා ප්‍රදානෝත්සවයේදී වැඩිදුරටත් අදහස් දැක්වූ අති පූජ්‍ය ආචාර්ය මැදගොඩ අභයතිස්ස නාහිමිපාණන් වහන්සේ, ලෝකය දේව වාදී, භක්ති වාදී ආගම් වලින් ඈත් වෙමින් බුද්ධිවාදී බුදු දහමට සමීප වන යුගයක් මේ. එසේ ලෝකය බෞද්ධ දර්ශනයට සමීප වන විට අපේ මහා සංඝරත්නය ධර්මයෙන් පමණක් නොවෙයි, ඒ ධර්ම සම්ප්‍රේෂණය සඳහා ජාත්‍යන්තර භාෂාවන්ගෙන්ද සන්නද්ධ වී සිටිය යුතුයි. බුදුන් වහන්සේ පවා භාෂාව පිළිබඳ විශාල අවධානයකින් සිටියා. අටුවා වල සඳහන් වන පරිදි භාෂා සීයයක් කතා කළ හැකි කෙනා තමයි නිරුත්ති පඨිසම්භිධානයෙන් යුක්ත වන්නේ. ඒ අනුව බලන කොට ලෝකයේ ශ්‍රේෂ්ඨතම සන්නිවේදකයා වන්නේ බුදුන් වහන්සේයි.
භික්‍ෂු වහන්සේලා ඉංග්‍රීසියෙන් කථා කරන කොට සමහරු හිතනවා භික්‍ෂුව බටහිර ගැති වෙලා කියා. භික්‍ෂුව ඉංග්රීසි ඉගෙන ගත යුතුද? ඔව්. එදා සිටි හික්කඩුවේ සුමංගල නායක හාමුදුරුවෝ වැනි නායක ස්වාමින්වහන්සේලා ව්‍යක්ත ඉංග්‍රිසියෙන් සුද්දන් සමඟ හරි හරියට කථා කලා. විදේශිකයින්ට පවා නිවැරදි මඟ පෙන්නුවේ ඒ නිසා.
අද අපේ බෞද්ධ භික්‍ෂුන් වහන්සේලා රටේ ලෝකේ ඇවිදින කොට භාෂා ප්‍රශ්නය නිසා බොහෝ බාධාවන්ට ලක් වෙනවා. හාමුදුරු කෙනෙක් ධර්ම දේශකයෙකු වන්නේ ධර්මාසනයට වාඩි වූ මොහො‍තේ පමණක් නොවෙයි. මග තොට, බස් නැවතුම, ගුවන් තොටුපොල, සෑම තැනම බෞද්ධ භික්‍ෂුවට විශාල ධර්ම සන්නිවේදන කාර්ය භාර්යයක් කළ හැකි වෙනවා. භාෂාව තමයි මිනිස් චින්තනයේ මෙවලම බවට පත් වෙන්නේ. බුදුන් වහන්සේ පවා දේශනා කරනවා භාෂාවේ වචන නොවෙයි අර්ථය ගැන සිතන්න කියා. පාත්තරය හදුන්වන පද හතක් තියනවා. ඒ නිසා භාෂාත්මක ප්‍රයෝගයට වඩා වැදගත් වන්නේ නියම ලෙස අර්ථය සම්ප්ප්‍රේෂණය කිරීමයි.
වර්තමානය වන විට ධර්මය විකෘති කරන පිරිසක් බිහි වෙමින් පවතිනවා මතු බවයේ මීයන් වන්නේ මහ පොලව යා කරන කෙනාලු. ඒ නිසා භක්තිවාදී බුදු දහම නොව බුද්ධි වාදී බුදු දහම ලෝකයට සංනිවේදනය කරන්න අපේ රටේ වත්මන් බෞද්ධ භික්‍ෂුවට විශාල කාර්යභාරයක් පැවරී තිබෙනවා. මුළු ලෝකයම සත්‍ය ගවේෂී යුගයකට පැමිණ තිබෙන මොහොතක අධ්‍යාපන නියෝජ්‍ය අමාත්‍ය මොහාන් ලාල් ග්‍රේරු මහතා තම පෞද්ගලික මෙහෙයවීමෙන් මෙවැනි වැඩසටහනක් ඇරඹීම සම්බුද්ධ ශාසනයේ ප්‍රගමනයට කළ ඉතා වටිනා මහ පිංකමක් හැටියටයි මහා සංඝරත්නය අගය කරන්නේ.
මෙ‍හිදී අදහස් දැක්වූ මොහාන් ලාල් ග්‍රේරු පදනමේ නිර්මාතෘ අධ්‍යාපන නියෝජ්‍ය අමාත්‍ය මොහාන් ලාල් ග්‍රේරු මහතා, වරක් එංගලන්තයේ ජාතික භෞතික විද්‍යා ඇතුලු මහාචාර්ය කණ්ඩායමක් මා සමඟ ඉතා කෙටි වෙලාවක් බුදු දහම ගැන සාකච්ඡා කලා. මා අනිත්‍ය, දුක්ඛ, අනාත්ම ගැන කළ කෙටි පැහැදිලි කිරීමන් එතන සිටි දෙදෙනෙකු බෞද්ධාගමිකයින් බවට පත් වුණා. මට හිතුනා මම දන්නා මේ සුළු දැනුමෙන් බටහිර ජාතිකයින් මෙතරම් බෞද්ධ දර්ශනය පිළිබඳව පැහැදුනා නම් අපේ දැන උගත් ස්වාමින්වහන්සේලාට ජාත්‍යන්තර සන්නිවේදන හැකියාව දියුණු කරන්න පුළුවන් නම් ලෝකය සොයන, ලොව සනසන බෞද්ධ දර්ශනය ලොව පුරා කෙතරම් ප්‍රචලිත කළ හැකිද කියා. ඒ අනුව තමයි මම භික්‍ෂු ඉංග්රීසි අධ්‍යාපන වැඩසටහන මට පුළුවන් ආකාරයෙන් ආරම්භ කළේ. අද ලෝකයම යථාර්තය සොයනවා. බුදු දහමේ යථාර්තය මැනවින් පැහැදිලි කර තිබෙනවා. බුදුන් වහන්සේ සාරාසංක්‍යෙ කල්ප ලක්‍ෂයක් පෙරුම් පුරා අවබෝධ කර ගත් සත්‍ය ඉදිරියට ගෙන යන්නේ අපේ මහා සංඝරත්නයයි. ඒත් රටේ පුරවැසියන් දෙදහසකට එක් ස්වාමින් වහන්සේ නමක් පමණ වැඩසිටින්නේ. පිරිවෙන් පාංශකූල, බණ, දාන, පිරිත් වැඩසටහන් වලට වැඩම කළ පසු වෙනත් දෙයක් ඉගෙන ගන්නට කාලය සීමිත වන්නට පුළුවන්. ඒත් අපි මවගේ කුසේ සිට මරණය දක්වා ඉගෙන ගන්නවා. ඒ නිසා අපේ මහා සංඝරත්නය ධර්මය අනුගමනය කරන අතර තුර ලෝක සත්වයාගේ හිත සුව පිණිසත් ධර්ම ප්‍රචාරය කරන්නට ඉංග්රීසි අධයාපනය ලබන්නට අදහස් කරනවානම් එය ඉතාම කාලෝචිතයි. ඒ වෙනුවෙන් මොහාන් ලාල් ග්‍රේරු පදනම හරහා ඔනෑම අවස්ථාවක භික්‍ෂුන් වහන්සේලාට නොමිලේම ඉඩ ප්‍රස්ථා ලබා දීමට සූදානම්ව සිටිනවා යැයි ප්‍රකාශ කළේය.
මෙම අවස්ථාවට ත්‍රෛනිකායික මහා සංඝරත්නය වැඩම කර සිටි අතර බුදු සරණ ප්‍රධාන කර්තෘ සීසර් සුදසිංහ මහතා ඇතුලු බෞද්ධ සංවිධාන නියෝජිතයින් රැසක්ද සහභාගි වූහ.
http://lankacnews.com/sinhala/news/108000/
0 comments:
Post a Comment