ශ්‍රී ලංකාව සම්බන්ධව අන්තර් ජාතික රටවල මැදිහත්වීම ඉන්දියාව කිසිසේත්ම අනුමත නොකරන බවත්, ශ්‍රී ලංකාවට කිසිදු බලපෑමක්‌ කිරීමට ඉන්දියාව ඉඩ නොතබන බවත් භාරතීය ජනතා පක්‍ෂයේ සභාපති ආචාර්ය සුබ්‍රමනියම් ස්‌වාමි මහතා පැවැසීය. ශ්‍රී ලංකාව ලොව වෙනත් බලවත් රටවල් සමඟ සබඳතා පැවැත්වීම ඉන්දියාවට බලපෑමක්‌ හෝ දෙරට අතර පවතින සුහදතාවට බාධාවක්‌ නොවන බවද හෙතෙම පැවැසීය. ඉන්දියාවේ ඇතැම් දේශපාලනඥයන් බලයට ඒම සඳහා ශ්‍රී ලංකාවට චෝදනා එල්ල කරමින් දෙමළ ජනතාව වෙනුවෙන් පෙනී සිටියද, ඔවුන් දෙමළ ජාතිකයන් නොව තෙළිඟු ජාතිකයන් බවද හෙතෙම පැවැසීය.තමා ඉන්දියාවේ නියම දෙමළ ජාතිකයෙකු බවද ආචාර්ය සුබ්‍රමනියම් ස්‌වාමි අවධාරණය කළේය.
යුද සමයේ ශ්‍රී ලංකාවේ යුද අපරාධ, සමූල ඝාතන සිදු නොවූ අතර, ඒවා සිදුවනුයේ ගාසා තීරය ඇතුළු වෙනත් රටවල බවද හෙතෙම පැවැසීය.
ශ්‍රී ලංකාවේ සටන්කාමීන්ට තමිල්නාඩුවේ යුද පුහුණුව ලබාදීම තම මව වන ඉන්දිරා ගාන්ධි මහත්මිය කළ ඓතිහාසික වරදක් බව තම මිත්‍රයකු වූ රජීව් ගාන්ධි මහතා වරක්‌ තමා සමඟ ප්‍රකාශ කළ බවද සුබ්‍රමනියම් ස්‌වාමි මහතා වැඩිදුරටත් පැවැසීය.
කොළඹ ගලධාරි හෝටලයේ ඊයේ (20 වැනිදා) පැවැති ආරක්‍ෂක සම්මන්ත්‍රණයේදී 'ඉන්දීය ශ්‍රී ලංකා' මැයෙන් දේශනයක්‌ පවත්වමින් ආචාර්ය සුබ්‍රමනියම් ස්‌වාමි එසේ පැවැසීය.
සිරිමෙවන් කස්‌තුරිආරච්චි, කීර්ති වර්ණකුලසූරිය
http://www.divaina.com/2014/08/21/news15.html
0 comments:
Post a Comment