පිළිකා රෝගය මර්දනය කරනු පිණිස දෙන එන්නත් යෑයි කීවාට කෙළවරක්‌ නැති ඉන්ජෙක්‌ෂන් තොගයක්‌ තිබේ. මේවා අතුරින් එක්‌ වැදගත් ඉන්ජෙක්‌ෂන් එකක මෙරට මිල රුපියල් හැත්තෑදහසකි. සමහර විට දින හතෙන් හතට, දහයෙන් දහයට, හෝ නිශ්චිත කාල වකවානු තුළ රෝගියාට දෙනු ලබන මේ එන්නත් නිසා රෝගියාගේ භාරකරුවෝ මහපාරට වැටෙති. එබඳු එන්නත් හතක්‌ රෝගියාට දුන්නොත් එතැනම මුදල රුපියල් හත්ලක්‍ෂයකි. එන්නත් විස්‌සක්‌ දුන්නොත් දාහතරලක්‍ෂයකි. ගෙයක්‌ ඉඩමක්‌ රුපියල් විසි ලක්‍ෂයකට උකස්‌ කර එන්නත් මිලට ගත් විට හය මසක්‌ යන විට පොලිය එකතු වී එය ගෙවා ගැනීමට නොහැකිව උකස්‌කාරයාට දේපළ සින්න වෙයි. එතැන් සිට කතාව විශාල ඛේදවාචකයකි. මරණ කිහිපයකි. රුපියල් හැත්තෑදාහේ ඉන්ජෙක්‌ෂන් එක රුපියල් හතළිස්‌දහසට මෙරටට ගෙන්වීමට ඇතැම් සමාගම් සූදානම් ය. එහෙත් මේ වෙළෙඳපොළ ඒකාධිකාරය තුළ ලෙඩා පමණක්‌ නොව ඔහුගේ සමස්‌ත පවුලම මිය ගියත් මාකට්‌ එකෙහි ඇත්තේ හැත්තෑ දහසේ ඉන්ජෙක්‌ෂන් එක ය. මේ අනුව රෝගියාද ඔහුගේ පවුලේ අයද ඉතා නරක ලෙස සූරාකනු ලැබෙයි. මේ ඒකාධිකාරයේ ආරක්‍ෂකයා කවරෙක්‌ද? කීමට කනගාටු නමුත් අප දන්නා සත්‍යය කියමු. මේ නීච වැඩපිළිවෙළෙහි ආරක්‍ෂකයෝ සෞඛ්‍ය අමාත්‍යාංශයේ ඇතැම් නිලධාරීහු ය. ඇතැම් දේශපාලනඥයෝ ය. ඇතැම් දොස්‌තරවරු ය. මේ ප්‍ර්‍රශ්නයට එකම පිළිතුර ජාතික ඖෂධ ප්‍රතිපත්තියයි. මේ ප්‍රතිපත්තිය ඉදිරිපත් කිරීමට සූදානමින් සිට, පිටරටදී පැවැති සාදයකට සහභාගි වීමෙන් පසු හදිසියේ රෝගීව මියගිය, ඖෂධ සංස්‌ථාවේ ආරම්භක සභාපති ආචාර්ය සේනක බිබිලේ මහතා ගැන මෙහිදී අපි මෙනෙහි කරන්නෙමු. ජාතික ඖෂධ ප්‍රතිපත්තිය පාර්ලිමේන්තුවට ගෙනවුත් ක්‍රියාත්මක කිරීමටත්, සිගරට්‌ පැකට්‌වල පිළිකාවල පින්තූර යෙදවීමටත් මහත් වෙහෙසක්‌ ගන්නා සෞඛ්‍ය ඇමැති මෛත්‍රිපාල සිරිසේන පරෙස්‌සම් වියයුතු බව නැවත නැවතත් කියමු.ඖෂධ ව්‍යාපාරය තරම් ලාභ දායක වෙනත් ජාවාරමක්‌ වෙතොත් ඒ කුඩු බිස්‌නස්‌ පමණි. ඉස්‌සර එම තැන හිමිව තිබුණේ ආයුධ බිස්‌නස්‌ එකට ය. අද සෞඛ්‍ය ක්‍ෂේත්‍රය ඖෂධ මිල, දොස්‌තර වර්ජන, නොසැලකිල්ල, හොරකම් යනාදිය නිසා නිතරම පරිහානිය පැත්තට යන්නට බලවත් උත්සාහයක නිරත වෙයි. පිළිකා රෝහලේ අකුණු සන්නායකය රුපියල් විසිලක්‍ෂයක්‌ වටිනා බවත්, එය කිසියම් අයකු විසින් හොරා ගනු ලැබ ඇති බවත් සෞඛ්‍ය ඇමැතිතුමා පසුගියදා හිඟුරක්‌ගොඩ දී පවසා තිබිණි. මෙය හොරා ගත් එකා එය තම නිවසෙහි ම සවිකර ගත යුතු ය. නැතහොත් දැනට ඇරඹී ඇති වැසි කාලයේ දවසක ඔහුට හෙණ පහර කා මිය යැමට සිදුවනවා ඇත. දැනට වෙළෙඳපොළෙහි පවතින ඖෂධ මිල ගැන කල්පනා කරන විට අපට හැඟී යන්නේ බෙහෙත් කොම්පැනිකාරයන් ද තම නිවෙස්‌වල ඉතා බලගතු අකුණු සන්නායක සවිකර ගත යුතු බවකි. මන්ද ඒ මිනිසුන් කරන පව්වලට ඔවුන්ගේ ගෙවල්වල සිටින අහිංසක අඹුදරුවන් පළි නැත.
ලංකාව තුළ මේ මොහොතේ පිළිකා රෝගීහු දහස්‌ ගණනක්‌ සිටිති. සිගරට්‌ සහ කෘත්‍රිම ආහාර නිසා තව රෝගීහු දහස්‌ ගණනක්‌ මග එති. මේ අයගෙන් 99% කට එන්නත් සඳහා රුපියල් හැත්තෑදහස බැගින් වැය කළ නොහැක. එ බැවින් ඖෂධ ප්‍රතිපත්තිය ප්‍රකාශයට පත් කර වෙළෙඳ නාමවලින් නොව ඖෂධීය නාමයෙන් ඖෂධ විකිණීම පටන් ගත යුතුය. එවිට ඔය හැත්තෑදහස පන්දහසට බසිනවා ඇත.
http://www.divaina.com/2014/03/22/editor.html
සබැඳි ලිපි -
[
ජාතික ඖෂධ ප්‍රතිපත්තිය ක්‍රියාත්මක කරවීමhttp://denethharinna.blogspot.com/2014/03/blog-post_18.htmlජාතික ඖෂධ ප්‍රතිපත්තිය මාෆියාකරුවන් නිර්වින්දනය කරයිද?http://denethharinna.blogspot.com/2014/03/blog-post_5761.htmlකිසිදු රජයකට ක්‍රියාත්මක කිරීමට නොහැකිවූ මහාචාර්ය සේනක බිබිලේ ඖෂධ ප්‍රතිපත්තිය වෙනුවෙන් ඖෂධ පනත ක්‍රියාත්මක කරනවා - සෞඛ්‍ය ඇමැතිhttp://denethharinna.blogspot.com/2014/03/blog-post_8866.html
]
0 comments:
Post a Comment