Pages

Wednesday, June 11, 2014

කෝට්‌ටේ ආනන්ද ශාස්‌ත්‍රාල විදුහල් භූමියේ ඓතිහාසික උමං දොරටුවේ කැණීම් කටයුතු ඇරඹේ

පෙර රජ දවස නිර්මාණය කරන ලද කෝට්‌ටේ ආනන්ද ශාස්‌ත්‍රාල විදුහල් භූමියේ පිහිටි ඓතිහාසික උමං දොරටුවේ කැණීම් කටයුතු පුරාවිද්‍යා දෙපාර්තමේන්තුව හා කෝට්‌ටේ මහනගර සභාව ඒකාබද්ධව ඊයේ (10 දා) උත්සවාකාරයෙන් ආරම්භ කරන ලදී.

ජාතික උරුමයන් පිළිබඳ අමාත්‍ය ආචාර්ය ජගත් බාලසූරිය මහතාගේ ප්‍රධානත්වයෙන් කෝට්‌ටේ නගර සභාවේ නගරාධිපති ජනක රණවක මහතාගේ සංවිධානයෙන් එම උත්සව කටයුතු පවත්වන ලදී.

ඓතිහාසික කෝට්‌ටේ රාජධානියේ පැවැති ශ්‍රී විභූතිය අනාගත පරපුරට දැකබලා ගත හැකි වන පිණිස නගරාධිපතිවරයාගේ සංකල්පයකට අනුව කෝට්‌ටේ ඓතිහාසික ස්‌ථාන සංරක්‍ෂණය කිරීමේ වැඩ පිළියෙළ යටතේ මෙම කැණීම් කටයුතු ඊයේ ආරම්භ කරන ලදී.

මෙම අවස්‌ථාවට අමාත්‍ය ආචාර්ය ජගත් බාලසූරිය, පුරාවිද්‍යා අධ්‍යක්‍ෂක ජනරාල් සෙනරත් දිසානායක, පුරාවිද්‍යා දෙපාර්තමේන්තුවේ විශේෂ මෙහෙයුම් අධ්‍යක්‍ෂක කර්නල් පරාක්‍රම රන්දෙණිය, කෝට්‌ටේ නගරාධිපති ජනක රණවක මහතා ඇතුළු නාගරික මන්ත්‍රීවරු රැසක්‌ සහභාගි වූහ.

උමං මග සඳහා දෙපසින් උමං දොරටු දෙකක්‌ තිබූ බවට සලකුණු තිබෙන එම උමං මගේ එක්‌ ඇතුළු දොරටුවක්‌ ඉහළින් මකර තොරණක්‌ නෙළා තිබෙන අතර දැනට ක්‍ෂයවී ඇති මකර තොරණ අදත් පැහැදිලිව දැක ගත හැකි අතර අනෙක්‌ ඇතුළු දොරටුවේ සිංහ පාදයක ලකුණ දකින්නට තිබේ.

කෝට්‌ටේ රජ දවස කොළඹ කොටුවේ පෘතුගීසීන්ගේ ග්‍රහනයේ සිටි මායා දුන්නේ කුමාරයා බේරාගැනීම සඳහා මෙම උමග කොළඹ පෘතුගීසි බල කොටුව දක්‌වා කැපූ බවට ඇතැම් ඉතිහාසගත සාහිත්‍ය වාර්තා දක්‌වන අතර උමං මග අභ්‍යන්තරයේ විවිධ දිසාවන්ට බෙදී යන උමං මාර්ගයන් ඇති බවක්‌ද ජනවහරේ සඳහන් වේ.

ජනවහරට අනුව රජුගේ අන්තඃපුරය වත්මන් මිරිහාන ප්‍රදේශයේ පිහිටි බවත් එම ස්‌ථානය වෙත පෙර රජදරුවන් රහසිගතව ගමන් කළේ මෙම උමග තුළින් බවටත් මතයක්‌ පවතින අතර, එදා මිහිරි යහන ලෙස හැඳින්වූ එම ස්‌ථානය පැවති පෙදෙස අද "මිරිහාන" ලෙස පරිවර්තනය වූ බවද ජනවහරේ සඳහන්වේ.

උමං මගේ කැණීම් කටයුතුවල ආරම්භක අවස්‌ථාවට සහභාගි වූ ජාතික උරුමයන් පිළිබඳ අමාත්‍ය ආචාර්ය ජගත් බාලසූරිය මහතා අනාගත පරපුර වෙනුවෙන් කෝට්‌ටේ නගරාධිපති ජනක රණවක මහතාගේ අදහසකට අනුව ආරම්භ කළ මෙම වැඩ පිළිවෙලට තම අමත්‍යාංශයේ පූර්ණ සහාය ලබා දෙන බව උත්සව සභාව අමතමින් පවසා සිටියේය.

පුරාවිද්‍යා අධ්‍යක්‍ෂ ජනරාල්, කෝට්‌ටේ නගරාධිපති ජනක රණවන යන මහත්වරු ද මෙහිදී අදහස්‌ දැක්‌වීය.

ඇන්ටන් ප්‍රනාන්දු - ප්‍රදීප් ප්‍රසන්න සමරකෝන්
http://www.divaina.com/2014/06/11/news26.html

0 comments: