Pages

Thursday, December 26, 2013

ලෝක සාහිත්‍ය වංශයම නිරීක්‍ෂණය කර බැලූ විට සිංහල කවියට හිමිවන්නේ පළමු තැනයි - එම්. ඩී. ජයසූරිය

"කොළඹ යුගයේ කවියෝ කවි ලිව්වේ නිර්මාණ කළේ අනාගතය දැකලයි. මහා උගත් යෑයි කියන බොහෝ අය කොළඹ යුගයේ කවියන්ව, ඔවුන් ලියූ කවි පහත්කොට සලකන්න හැදුවත් එම නිර්මාණවල ඇති විශිෂ්ටත්වය නිසා කෙසේවත් කොළඹ යුගය යටපත් කළ නොහැකියි. අපේ සාහිත්‍යයේ පමණක්‌ නොව ලෝක සාහිත්‍ය වංශයම නිරීක්‍ෂණය කර බැලූ විට සිංහල කවියට හිමිවන්නේ ප්‍රමුඛස්‌ථානයක්‌. ඒ අතරින් කොළඹ කවි යුගයට හිමිවන්නේ සුවිශේෂී ස්‌ථානයක්‌. සමහරු කුහක ලෙස සැලකුවත් කොළඹ යුගයේ කවියෝ ඇරඹූ ගමන අදටත් විනාශ නොවී පවතින්නේ ඒ සුවිශේෂී බව නිසාමයි", යෑයි ප්‍රවීණ ලේඛක එච්. ඩී. ජයසූරිය මහතා පැවසුවේ ප්‍රවීණ පුවත්පත් කලාවේදියකු, ප්‍රකට ග්‍රන්ථ කතුවරයකු, රූපවාහිනි වැඩසටහන් නිෂ්පාදකවරයකු හා හිටපු මාධ්‍ය ලේකම්වරයකු වන පී. ඇම්. සේනාරත්න මහතා විසින් රචිත "කොළඹ යුගයේ කවියෝ" ග්‍රන්ථය එළිදැක්‌වීමේ උළෙලේදීය. එම ග්‍රන්ථය ඉළිදැක්‌වීම කොළඹ 10 මරදාන, පූජ්‍ය ඇස්‌. මහින්ද හිමි මාවතේ පිහිටි දයාවංශ ජයකොඩි සමාගමේ නව පොත් ප්‍රදර්ශනාගාරයේදී එම සමාගමේ ප්‍රකාශනයක්‌ ලෙස සිදු කෙරිණි.

එහිදී එච්. ඩී. ජයසූරිය මහතා මෙසේද පැවැසීය.

"පී. ඇම්. සේනාරත්නයන්ගේ ලිවීමත් හරියට කොළඹ යුගයේ කවියක්‌ වගේම තමයි. ඔහු බොහොම වේගයෙන් ලියන අති දක්‍ෂ නිර්මාණශීලී ලේඛකයෙක්‌. අද රෑ ඔහුගේ අතේ කිසිම දෙයකින් නැති වුණත් හෙට උදේ වනවිට අලුත් පොතක්‌ ලියන්නට තරම් හැකියාව තිබෙන කෙනෙක්‌".

එම අවස්‌ථාවට සහභාගී වූ ප්‍රවීණ රූපවාහිනි මාධ්‍යවේදී ලාල් හේමන්ත මාවලගේ මහතා මෙසේ පැවැසීය.

"එදා ජාතික රූපවාහිනියේ විකාශය වූ කදමල්ල වැනි වැඩසටහන් රැසක පුරෝගාමියා ලෙස පී. එම්. සේනාරත්නයන් ඉටුකළ මෙහෙවර මෙරට රූපවාහිනි ඉතිහාසයේ රන් අකුරින් ලියෑවී තිබෙනවා. නගින ඉනිමගට පයින් ගහන මිනිසුන් සිටින මේ රටේ පී. ඇම්. සේනාරත්න කියන්නේ කාටවත් කුහකකම් නොකරපු විශිෂ්ට කලාකරුවෙක්‌, දක්‍ෂ ලේඛකයෙක්‌, ඊටත් වඩා හොඳ මනුෂ්‍යයෙක්‌. ඒ නිසාම තමයි කලාකරුවන්, මාධ්‍යවේදීන් ඇතුළු අපි හැමෝම ඔහුට ගරුකරන්නේ.

"කොළඹ යුගයේ කවියෝ" ග්‍රන්ථය එළිදැක්‌වීමේ අවස්‌ථාවට ප්‍රවීණ චිත්‍ර ශිල්පී පෑලියගොඩ දයානන්ද, සමස්‌ත ලංකා කවි සම්මේලනයේ ලේකම් දයාරත්න රණේපුර, වෛද්‍ය චන්දිමා විඡේගුණවර්ධන, ප්‍රවීණ ලේඛකයන් හා මාධ්‍යවේදීන් වන ප්‍රේමරත්න කොස්‌වත්ත, ටී. ආරියරත්න, ටී. පියසෝම, ගොංගිතොට සරත්, බඳගිරියේ අබේසිරිවර්ධන, ප්‍රේමදාස නුගේගොඩ, ලංකාදීප විමංසා සාහිත්‍ය අතිරේකයේ සංස්‌කාරක ගාමිණී කන්දෙපොළ, උපුල් ගලප්පත්ති ඇතුළු පිරිසක්‌ සහභාගි වූහ.

සචිත්‍ර නේරංජන ඇල්වලගේ
http://www.divaina.com/2013/12/26/news13.html

0 comments: